મુખ્ય હાઇલાઇટ્સ:
- કૃત્રિમ બુદ્ધિમત્તા (એઆઈ), બાયોટેક્નોલોજી અને સ્માર્ટ તબીબી ટેક્નોલોજી દ્વારા હેલ્થકેર બદલવા પર સઘન મંથન.
- બે દિવસીય રાષ્ટ્રીય પરિસંવાદમાં દેશ-વિદેશના વિજ્ઞાનીઓ, શિક્ષણવિદો અને તબીબી નિષ્ણાતો જોડાયા.
- વિદ્યાર્થીઓની ઇનોવેશન સ્પર્ધામાં ૧૭૪ થી વધુ અદ્યતન પ્રોજેક્ટ્સ અને કાર્યરત મોડલ્સ રજૂ કરાયા.
- સંશોધન, તબીબી માન્યતા અને રોજગારને વેગ આપવા પ્રતિષ્ઠિત કંપનીઓ સાથે મહત્વપૂર્ણ સમજૂતી કરાર (એમઓયુ) થયા.
આરોગ્ય ક્ષેત્રે આધુનિક તકનીકોના ઉપયોગ પર રાષ્ટ્રીય પરિસંવાદ
ગણપત યુનિવર્સિટી દ્વારા તાજેતરમાં ૭ અને ૮ ઓગસ્ટ, ૨૦૨૬ દરમિયાન “કૃત્રિમ બુદ્ધિમત્તા (એઆઈ), બાયોટેક્નોલોજી, ડિજિટલ હેલ્થ અને સ્માર્ટ તબીબી ટેક્નોલોજી દ્વારા આરોગ્યસંભાળમાં પરિવર્તન” વિષય પર બે દિવસીય ભવ્ય રાષ્ટ્રીય પરિસંવાદનું આયોજન કરવામાં આવ્યું હતું. આ પરિસંવાદમાં દેશ અને વિદેશના પ્રતિષ્ઠિત શિક્ષણવિદો, વૈજ્ઞાનિકો, તબીબી નિષ્ણાતો, ઉદ્યોગ જગતના પ્રતિનિધિઓ તેમજ નીતિનિર્માતાઓ અને યુવા સંશોધકો મોટી સંખ્યામાં એકત્રિત થયા હતા અને સુલભ તથા ટકાઉ આરોગ્યસંભાળના ઉકેલો અંગે વિસ્તૃત વિચારવિમર્શ કર્યો હતો.
માનવસેવા અને વંચિત સમુદાયો સુધી ટેક્નોલોજી પહોંચાડવા હાકલ
પરિસંવાદના ઉદ્ઘાટન સત્રમાં ગણપત યુનિવર્સિટીના પ્રમુખ અને પદ્મશ્રી ડૉ. ગણપત આઈ. પટેલ ઓનલાઇન જોડાયા હતા અને જણાવ્યું હતું કે ટેક્નોલોજીનો અંતિમ હેતુ માનવસેવા હોવો જોઈએ. ગ્રુપ પ્રો-ચાન્સેલર ડૉ. મહેન્દ્ર શર્માએ ગ્રામ્ય અને વંચિત સમુદાયો માટે નવીન ટેક્નોલોજીને સસ્તી અને સુલભ બનાવવાની જરૂરિયાત દર્શાવી અર્થપૂર્ણ નવીનતાના ચાર તબક્કા—અવલોકન, પ્રશ્ન, સર્જન અને સંભાળ પર પ્રકાશ પાડ્યો હતો. આ સત્રમાં કાર્યકારી ડિરેક્ટર જનરલ ડૉ. રાકેશ પટેલ, ડૉ. સૌરભ દવે, ડૉ. ગિરીશ પટેલ, ગુજકોસ્ટના મુખ્ય વૈજ્ઞાનિક અધિકારી ડૉ. પૂનમ ભાર્ગવ સહિતના મહાનુભાવો ઉપસ્થિત રહ્યા હતા.
યુવા સંશોધકો માટે ઇનોવેશન સ્પર્ધા અને અદ્યતન થીમ પુસ્તકનું વિમોચન
પરિસંવાદના પ્રથમ દિવસે વિદ્યાર્થીઓ માટે યોજાયેલી વિશેષ ઇનોવેશન સ્પર્ધા મુખ્ય આકર્ષણ રહી હતી. છ અલગ-અલગ વિષયક્ષેત્રોમાં યોજાયેલી આ સ્પર્ધામાં કુલ ૧૭૪ પ્રોજેક્ટ્સ રજૂ થયા હતા, જેમાં ૧૫૭ પોસ્ટર્સ, ૧૦ સ્ટાર્ટઅપ પ્રોજેક્ટ્સ અને ૭ કાર્યરત મોડલ્સનો સમાવેશ થતો હતો. આ ટેક્નિકલ સત્રોમાં ૩૭૫ થી વધુ સહભાગીઓ જોડાયા હતા. આ ઉપરાંત, આરોગ્ય ટેક્નોલોજીના ક્ષેત્રમાં થઈ રહેલા સમકાલીન વિકાસ અને સંશોધનોને પ્રતિબિંબિત કરતા એક વિશેષ ‘થીમ પુસ્તક’નું પણ મહાનુભાવોના હસ્તે વિમોચન કરવામાં આવ્યું હતું.
અમદાવાદ ખાતે બીજા દિવસે પેનલ ચર્ચા અને એમઓયુ સંપન્ન
પરિસંવાદનો બીજો દિવસ અમદાવાદ મેનેજમેન્ટ એસોસિએશન ખાતે યોજાયો હતો. જેમાં અમેરિકાના આઈબીએમ (IBM) ના ઉપપ્રમુખ સુઝેન લિવિંગસ્ટન અને યુનિવર્સિટી ઑફ નોર્થ ટેક્સાસના પ્રોફેસર ડૉ. સરાજુ મોહંતી ઓનલાઇન જોડાયા હતા, જ્યારે ભારત સરકારના સૂક્ષ્મ, લઘુ અને મધ્યમ ઉદ્યોગ મંત્રાલયના નાયબ નિયામક શ્રી અલક કુમાર મિત્રા તેમજ ડૉ. અમન ટી. પટેલ, ડૉ. નિરજ યાદવ અને ડૉ. કલ્પિતા દવે રૂબરૂ ઉપસ્થિત રહ્યા હતા. કાર્યક્રમ દરમિયાન સ્માર્ટ હોસ્પિટલો અને ટ્રાન્સલેશનલ બાયોટેક્નોલોજી જેવા વિષયો પર બે મહત્વપૂર્ણ પેનલ ચર્ચાઓ યોજાઈ હતી.
શૈક્ષણિક અને ઉદ્યોગ સહયોગને વધુ મજબૂત બનાવવા માટે ગણપત યુનિવર્સિટી દ્વારા ‘સ્પેક્ટ્રમ મેડ ટેક પ્રાઇવેટ લિમિટેડ’ સાથે સમજૂતી કરાર (એમઓયુ) કરવામાં આવ્યા હતા, જેનાથી વિદ્યાર્થીઓ માટે રોજગાર અને અદ્યતન સંશોધનને વેગ મળશે. સાથોસાથ ‘રેગન વેવ મેડિકલ ઇન્સ્ટ્રુમેન્ટ્સ’ સાથે પણ ટેક્નોલોજી સહયોગના પત્રોનું આદાન-પ્રદાન કરાયું હતું. પરિસંવાદના અંતે ઉત્કૃષ્ટ પ્રોજેક્ટ્સ રજૂ કરનારા વિજેતાઓને ઇનામો આપી સન્માનિત કરાયા હતા અને ડૉ. આનંદ માંકડિયાએ આભારવિધિ કરી હતી.
અહેવાલ: ચેતન રાજપૂત
About the Author
