મુખ્ય હાઇલાઇટ્સ:
- મેઘરાજાનું આગમન: અસહ્ય ઉકળાટ અને ગરમી બાદ વિરમગામમાં વીજળીના કડાકા સાથે દોઢ ઇંચ વરસાદ ખાબક્યો.
- શહેર પાણી-પાણી: નગરના અનેક નીચાણવાળા વિસ્તારોમાં ઢીંચણસમા પાણી ભરાતા જનજીવન પ્રભાવિત થયું.
- પાલિકાની પોલ ખુલી: વરસાદ બંધ થયાના પાંચ કલાક સુધી પાણી ન ઉતરતા તંત્રના દાવાઓ પોકળ સાબિત થયા.
- ખોરવાયું જનજીવન: શનિવારે સવારે શાળાએ જતા વિદ્યાર્થીઓ, મહિલાઓ અને નોકરિયાતો ભારે હાલાકીમાં મુકાયા.
- અધૂરા કામો નડ્યા: જુલાઈ મહિનો શરૂ થયો હોવા છતાં ગટર અને ફોરલેન રોડના અધૂરા કામોથી જનતા પરેશાન.
પ્રથમ વરસાદમાં જ નીચાણવાળા વિસ્તારોમાં ઢીંચણસમા પાણી
વિરમગામ શહેરમાં પડેલા માત્ર દોઢ ઇંચ વરસાદમાં જ નગરપાલિકાની આયોજન વગરની કામગીરી સામે આવી છે. શહેરના નીચાણવાળા વિસ્તારો જેવા કે નાના પરકોટા, મોટા પરકોટા અને ભરવાડી દરવાજા વિસ્તારમાં રોડ પર ઢીંચણસમા પાણી ભરાઈ ગયા હતા. સૌથી નવાઈની વાત એ છે કે વરસાદ બંધ થયાના પાંચ કલાક વીતી ગયા હોવા છતાં પણ આ વિસ્તારોમાંથી પાણીનો નિકાલ થયો ન હતો. જેના કારણે શનિવારે સવારે શાળાએ જતા નાના બાળકો, નોકરિયાતો, મહિલાઓ અને વાહનચાલકો ભારે મુશ્કેલીમાં મુકાયા હતા અને પાણીમાંથી પસાર થવા મજબૂર બન્યા હતા.
સમયમર્યાદા વીતી ગઈ છતાં ગટર અને રોડના કામો અધૂરા
નિયમ મુજબ શહેરમાં ભૂગર્ભ ગટર, વરસાદી ગટર અને રોડ-રસ્તાના સમારકામના કામો ૧૫ જૂન પહેલાં જ પૂર્ણ કરી લેવાના હતા. જોકે, જુલાઈ મહિનો બેસી ગયો હોવા છતાં નગરપાલિકા તંત્રના પાપે આ તમામ કામો હજુ પણ અધૂરા લટકી રહ્યા છે. તંત્રની આ ધીમી અને મંથર ગતિની કામગીરીનો ભોગ અત્યારે વિરમગામની નિર્દોષ જનતા બની રહી છે.
મુખ્ય ફોરલેન માર્ગના કામમાં ભ્રષ્ટાચારના આક્ષેપો
શહેરમાં ખાસ કરીને મૂનસર દરવાજાથી લઈને રાજીવ નગર ત્રણ રસ્તા સુધીનો મુખ્ય ફોરલેન રોડ છેલ્લા ૬ મહિનાથી એકદમ કાચબા ગતિએ બની રહ્યો છે. સ્થાનિકોમાં ઉગ્ર ચર્ચા અને આક્ષેપો થઈ રહ્યા છે કે આ કામ કરનારી કોન્ટ્રાક્ટ એજન્સી પર નગરપાલિકાના સત્તાધીશોની મીઠી નજર છે, જેના કારણે કામમાં ઘોર વિલંબ થઈ રહ્યો છે. સુરેન્દ્રનગર અને અમદાવાદને જોડતા આ મુખ્ય માર્ગ પરથી દરરોજ નાના-મોટા તમામ સરકારી અધિકારીઓ અને પદાધિકારીઓ પસાર થાય છે, તેમ છતાં જનતાની આ ગંભીર સમસ્યા તરફ આખું તંત્ર આંખ આડા કાન કરીને બેઠું હોય તેમ લાગી રહ્યું છે.
અહેવાલ : ગાંધીનગર પ્રવાસી પત્રકાર રાજેશ પરીખ
About the Author
