મુખ્ય હાઇલાઇટ્સ:
- બિસ્માર રસ્તા: પાટનગરના સેક્ટર-૫ ના અનેક આંતરિક માર્ગો પર ચોમાસાની શરૂઆતમાં જ મોટા-મોટા ખાડા પડ્યા.
- ગામડા જેવી સ્થિતિ: તસ્વીરોમાં સ્પષ્ટ દેખાતી દયનીય સ્થિતિ, વહીવટી તંત્રના સ્માર્ટ સિટીના દાવાઓ પોકળ સાબિત થયા.
- અકસ્માતનો ભારે ભય: ખાડાઓમાં વરસાદી પાણી ભરાઈ જવાના કારણે વાહનચાલકો અને રાહદારીઓ માટે જીવનું જોખમ વધ્યું.
- તંત્રની ઉદાસીનતા: સ્થાનિક રહીશો દ્વારા વારંવાર લેખિત અને મૌખિક રજૂઆતો કરવા છતાં મહાનગરપાલિકા તંત્ર ઘોર નિદ્રામાં.
- જનતાની કડક માંગ: કોઈ મોટી જાનહાનિ કે ગંભીર અકસ્માત સર્જાય તે પહેલાં યુદ્ધના ધોરણે રસ્તાનું સમારકામ શરૂ કરવામાં આવે.
ચોમાસાના પ્રારંભે જ આંતરિક માર્ગો જર્જરિત બન્યા
ગાંધીનગરના સેક્ટર-૫ માં વરસાદી મોસમ શરૂ થતાં જ માર્ગોની હાલત અત્યંત દયનીય અને જર્જરિત બની ગઈ છે. સેક્ટરના વિવિધ આંતરિક રસ્તાઓ પર ઠેર-ઠેર મસમોટા ખાડાઓ સામ્રાજ્ય જમાવીને બેઠા છે. સ્થાનિક રહેવાસીઓના જણાવ્યા મુજબ, ચોમાસા પહેલા રોડનું યોગ્ય સમારકામ ન થવાના કારણે આ પરિસ્થિતિ સર્જાઈ છે. રસ્તાઓની આ દુર્દશાના કારણે શાળાએ જતા નાના બાળકો, ટ્યુશન જતા વિદ્યાર્થીઓ, મહિલાઓ, વૃદ્ધો અને રાહદારીઓને અવરજવર કરવામાં લોઢાના ચણા ચાવવા જેવી સ્થિતિ ઊભી થઈ છે.
પાણી ભરાતા અકસ્માત ઝોન બન્યા સેક્ટરના રસ્તાઓ
હાલમાં પડી રહેલા વરસાદના કારણે રસ્તા પરના મોટા ખાડાઓમાં પાણી ભરાઈ જાય છે. પાણી ભરાવાને લીધે વાહનચાલકોને ખાડાનો અંદાજ આવતો નથી, જેના કારણે રોજેરોજ નાના-મોટા અકસ્માતો સર્જાઈ રહ્યા છે અને ટુ-વ્હીલર ચાલકો સ્લિપ થઈ રહ્યા છે. વાહનચાલકો પોતાના વાહનો બચાવવા જતાં અન્ય વાહનો સાથે અથડાય છે, જેથી અહીં અકસ્માતનો ભય સેંકડો ગણો વધી ગયો છે. નાગરિકો પોતાના જ પાટનગરમાં અસુરક્ષિત અનુભવી રહ્યા છે.
વારંવારની રજૂઆતો છતાં મનપા તંત્રની આંખ આડા કાન
સ્થાનિક વાસીઓનો સીધો આક્ષેપ છે કે આ બિસ્માર રસ્તાઓ અંગે ગાંધીનગર મહાનગરપાલિકાના સત્તાધીશો અને જવાબદાર અધિકારીઓને અવારનવાર રજૂઆતો કરવામાં આવી છે. આમ છતાં મનપા તંત્ર દ્વારા આજદિન સુધી કોઈ પણ પ્રકારની નક્કર કે અસરકારક કામગીરી કરવામાં આવી નથી. તંત્રની આ પ્રકારની આળસુ નીતિ અને ઉદાસીનતા સામે સેક્ટર-૫ ના નાગરિકોમાં ભારે આક્રોશ અને રોષ ફાટી નીકળ્યો છે.
મોટી જાનહાનિ થાય તે પહેલા કામ શરૂ કરવા માંગ
હાલમાં સોશિયલ મીડિયા અને તસ્વીરોમાં સેક્ટર-૫ ના રસ્તાઓની જે કફોડી દશા દેખાઈ રહી છે, તેનાથી ગાંધીનગરના સ્માર્ટ વહીવટની પોલ ખુલી ગઈ છે. સ્થાનિક નાગરિકો હવે એક જ સુરે માંગ કરી રહ્યા છે કે, મનપાના સત્તાધીશો કોઈ ગંભીર અકસ્માત કે કોઈ માસૂમનો જીવ જાય તેની રાહ જોયા વિના, તાત્કાલિક ધોરણે જાગે. વહેલી તકે આ તમામ બિસ્માર માર્ગો પર પેચવર્ક અથવા નવો રોડ બનાવવાનો મક્કમ નિર્ણય લઈ કામગીરી શરૂ કરવામાં આવે, જેથી કરીને પાટનગરના કરદાતા નાગરિકોને સુવિધાજનક અને સુરક્ષિત માર્ગ વ્યવસ્થા મળી રહે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
