મુખ્ય હાઇલાઇટ્સ:
- સુરેન્દ્રનગર જિલ્લાના વઢવાણના હેરિટેજ ગણાતા ધોળી પોળ વિસ્તારમાં ગટરના ગંદા પાણી ભરાયા.
- ધોળી પોળથી એસબીઆઈ એટીએમ સુધીના ભરબજારમાં કાદવ-કીચડ અને દુર્ગંધનું સામ્રાજ્ય.
- મહાનગરપાલિકા તંત્રમાં વારંવાર લેખિત અને મૌખિક રજૂઆતો કરવા છતાં કોઈ જ ઉકેલ નહીં.
- વેપારીઓ અને રાહદારીઓને ગંદા પાણીમાંથી પસાર થવાની ફરજ પડતા ભારે હાલાકી.
- ગંદકી અને મચ્છરોના ઉપદ્રવના કારણે ગંભીર રોગચાળો ફાટી નીકળવાની પ્રબળ ભીતિ.
સુરેન્દ્રનગર જિલ્લાના વઢવાણ શહેરના પ્રવેશદ્વાર સમાન અને ઐતિહાસિક ધોળી પોળ વિસ્તારમાં વહીવટી તંત્રની ઘોર બેદરકારી અને ઉદાસીનતાના કારણે સ્થાનિક નાગરિકો અત્યંત નર્કાગાર જેવી સ્થિતિમાં જીવન જીવવા મજબૂર બન્યા છે. મહાનગરપાલિકા સમક્ષ અવારનવાર રજૂઆતો કરવા છતાં તંત્રના પેટનું પાણી પણ હલતું નથી, જેના કારણે પ્રજામાં ભારે આક્રોશ વ્યાપી ગયો છે.
એક તરફ વઢવાણ શહેરને હેરિટેજ સિટી તરીકે વિકસાવવા માટે કાગળ પર કરોડો રૂપિયાના વિકાસ પ્લાન તૈયાર કરવામાં આવે છે, પરંતુ વાસ્તવિક ગ્રાઉન્ડ લેવલની સ્થિતિ અત્યંત દયનીય અને કફોડી બની છે. વઢવાણના પ્રવેશદ્વાર ગણાતા ધોળી પોળ વિસ્તારથી લઈને એસબીઆઈ એટીએમ સુધીના ભરબજારમાં કોઈપણ વરસાદ વગર જ ડ્રેનેજ લાઈનો ઉભરાતા ગંદા અને દુર્ગંધયુક્ત પાણી રસ્તાઓ પર ફરી વળ્યા છે. જેના કારણે આ માર્ગ પરથી અવરજવર કરતા પગપાળા રાહદારીઓ, શાળાએ જતા બાળકો અને સ્થાનિક દુકાનદારોની હાલત કફોડી બની ગઈ છે.
સ્થાનિક વેપારીઓ અને રહીશોને રોજબરોજ આ ગંદા પાણી અને કાદવ-કીચડમાંથી પસાર થવાની લાચાર ફરજ પડી રહી છે. નાગરિકોનો આક્ષેપ છે કે વઢવાણ જ્યારે મહાનગરપાલિકામાં ભળ્યું છે ત્યારથી જ શહેરમાં સ્વચ્છતાનો ભારે અભાવ જોવા મળી રહ્યો છે અને તમામ વિકાસના કામો ઠપ્પ થઈ ગયા છે. સેનિટેશન વિભાગ પાછળ કાગળ પર કરોડો રૂપિયાનો ખર્ચ દર્શાવાય છે, પરંતુ હકીકતમાં જમીની સ્તરે કોઈ જ સંતોષકારક કામગીરી દેખાતી નથી.
ભરબજારમાં સતત પાણી ભરાઈ રહેવાને કારણે મચ્છરોનો ઉપદ્રવ અસહ્ય રીતે વધી ગયો છે, જેના પગલે સ્થાનિકોમાં ચામડીના દર્દો અને મેલેરિયા-ડેન્ગ્યુ જેવા ભયાનક રોગચાળો ફાટી નીકળવાની ભારે ભીતિ સેવાઈ રહી છે. શહેરીજનોની સુખાકારી અને આરોગ્ય સાથે ચેડાં કરી રહેલા મહાનગરપાલિકા તંત્ર સામે રોષે ભરાયેલા નાગરિકોએ વહેલી તકે ગટરના ગંદા પાણીના નિકાલની કાયમી વ્યવસ્થા કરવામાં આવે તેવી ઉગ્ર માંગ ઉચ્ચારી છે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
