મુખ્ય હાઇલાઇટ્સ:
- જાફરાબાદ તાલુકાના વઢેરા ગામે ખેડૂતની વાડીમાં જાળીમાં ગળું ફસાઈ જવાથી ૩ માસના સિંહબાળનું શ્વાસ રૂંધાતા કરુણ મોત.
- બનાવની જાણ થતાં જ જાફરાબાદ વન વિભાગની ટીમ ઘટનાસ્થળે દોડી ગઈ.
- સિંહબાળના મૃતદેહને પોસ્ટમોર્ટમ અર્થે બાબરકોટ એનિમલ કેર સેન્ટર ખાતે ખસેડાયો.
- વન વિભાગ દ્વારા વાડી વિસ્તાર તેમજ આસપાસના સીમ વિસ્તારમાં હાથ ધરાયું સઘન સ્કેનિંગ અને તપાસ.
વાડીની જાળીમાં ગળું ફસાતાં સિંહબાળનું નીપજ્યું મોત
અમરેલી જિલ્લાના જાફરાબાદ તાલુકાના વઢેરા ગામે સીમ વિસ્તારમાં એક અત્યંત દુઃખદ અને કરુણ ઘટના સામે આવી છે. વઢેરા ગામે આવેલ ખેડૂત ગોવિંદભાઈ ભગવાનભાઈ સોલંકીના ખેતરમાં અંદાજે ૩ માસની નાની વયનું સિંહબાળ અચાનક વાડીની જાળીમાં ફસાઈ ગયું હતું. જાળીમાં ગળું ફસાઈ જવાના કારણે ગળા ભાગે ગંભીર દબાણ આવ્યું હતું અને શ્વાસ રૂંધાઈ જવાથી સિંહબાળનું તડપી-તડપીને કમકમાટીભર્યું મોત નીપજ્યું હતું.
વન વિભાગની ટીમ ઘટનાસ્થળે પહોંચી: પીએમ અર્થે ખસેડાયો મૃતદેહ
વાડીમાં સિંહબાળ મૃત હાલતમાં મળી આવતાં ખેડૂત દ્વારા તાત્કાલિક આ અંગે વન વિભાગને જાણ કરવામાં આવી હતી. ઘટનાની ગંભીરતા સમજીને જાફરાબાદ વન વિભાગની ટીમ ત્વરિત ઘટનાસ્થળે પહોંચી ગઈ હતી. વન અધિકારીઓ અને કર્મચારીઓએ સ્થળ પર પહોંચી જરૂરી કાર્યવાહી પૂર્ણ કર્યા બાદ સિંહબાળના મૃતદેહને મૃત્યુનું ચોક્કસ કારણ જાણવા માટે પોસ્ટમોર્ટમ અર્થે બાબરકોટ એનિમલ કેર સેન્ટર ખાતે ખસેડવાની તજવીજ હાથ ધરી હતી.
આસપાસના વિસ્તારમાં વન વિભાગ દ્વારા સઘન સ્કેનિંગ
આ કરુણ ઘટના બાદ વન વિભાગની ટીમ દ્વારા સમગ્ર વાડી વિસ્તાર તેમજ આસપાસના સીમ અને જંગલને અડીને આવેલા વિસ્તારોમાં સઘન સ્કેનિંગ હાથ ધરવામાં આવ્યું છે. સિંહબાળની માતા (સિંહણ) કે અન્ય બચ્ચાઓ આસપાસના વિસ્તારમાં છે કે કેમ તે અંગે પણ વન વિભાગ દ્વારા સર્વેલન્સ વધારી દેવામાં આવ્યું છે. આ સાથે જ વન વિભાગે બનાવ સંદર્ભે આગળની કાયદેસરની તપાસ અને કાર્યવાહી શરૂ કરી છે.
અહેવાલ: જીજ્ઞેશ બારૈયા
About the Author
