ભુજ શહેર મામલતદાર કચેરીમાં એસીબીએ સફળ છટકો ગોઠવી રેવન્યુ તલાટીને ₹૩૫ હજારની લાંચ લેતા રંગેહાથ ઝડપી પાડ્યો છે. આ કાર્યવાહી જાગૃત નાગરિકની ફરિયાદના આધારે કરવામાં આવી હતી.
મળતી માહિતી મુજબ આરોપી ચંદુભાઈ ગેલાભાઈ હરણ (ઉંમર ૩૪ વર્ષ), રેવન્યુ તલાટી તરીકે મામલતદાર કચેરી, ભુજ (શહેર) ખાતે ફરજ બજાવે છે. ફરિયાદીના જણાવ્યા અનુસાર તેમની વડીલોપાર્જિત જમીનનું વેચાણ થયા બાદ તેમની પાસે અન્ય કોઈ ખેતીની જમીન બાકી રહી નહોતી. ખેડૂત ખાતેદારનો દરજ્જો ચાલુ રાખવા માટે જરૂરી ખેડૂત ખાતેદારનો દાખલો આપવા આરોપીએ શરૂઆતમાં ₹૪૦ હજારની ગેરકાયદે લાંચની માંગણી કરી હતી.
બાદમાં રકઝકના અંતે ₹૩૫ હજાર આપવા સમજૂતી થઈ હતી. ફરિયાદી લાંચ આપવા ઇચ્છતા ન હોવાથી તેમણે એસીબીનો સંપર્ક કર્યો હતો. ફરિયાદના આધારે એસીબીએ છટકાનું આયોજન કર્યું હતું.
છટકા દરમિયાન આરોપીએ ફરિયાદી પાસેથી ₹૩૫ હજારની લાંચની માંગણી કરી અને રકમ સ્વીકારતા જ એસીબીની ટીમે તેને રંગેહાથ ઝડપી લીધો હતો. એસીબીએ લાંચની સંપૂર્ણ ₹૩૫ હજારની રકમ કબજે કરી કાયદેસરની કાર્યવાહી હાથ ધરી છે.
આ સફળ કાર્યવાહી પોલીસ ઇન્સપેક્ટર જે.જે. ચૌધરીના માર્ગદર્શન હેઠળ કરવામાં આવી હતી. સમગ્ર કામગીરી પર મદદનીશ નિયામક કે.એચ. ગોહિલનું સુપરવિઝન હતું, જ્યારે નાયબ નિયામક બળદેવસિંહ વાઘેલાના માર્ગદર્શન હેઠળ કાર્યવાહી પૂર્ણ કરવામાં આવી હતી.
મુખ્ય હાઇલાઇટ્સ:
- ભુજમાં એસીબીનો સફળ લાંચ વિરોધી છટકો.
- રેવન્યુ તલાટી ચંદુભાઈ ગેલાભાઈ હરણ રંગેહાથ ઝડપાયા.
- ખેડૂત ખાતેદારનો દાખલો આપવા ₹૩૫ હજારની લાંચની માંગણી.
- જાગૃત નાગરિકની ફરિયાદના આધારે એસીબીએ ગોઠવ્યો છટકો.
- લાંચની સંપૂર્ણ ₹૩૫ હજારની રકમ કબજે.
- મામલતદાર કચેરી, ભુજ ખાતે કાર્યવાહી.
- આરોપી સામે ભ્રષ્ટાચાર નિવારણ કાયદા હેઠળ ગુનો નોંધવાની કાર્યવાહી શરૂ
અહેવાલ: મહેશભાઈ જળું
About the Author
