મુખ્ય હાઇલાઇટ્સ:
- અમદાવાદ રેલવે પોલીસની એસઓજી ટીમે વિરમગામ રેલવે સ્ટેશન ખાતે બે ટ્રેનોમાં હાથ ધર્યું સરપ્રાઈઝ ચેકિંગ.
- શાલીમાર-ભુજ એક્સપ્રેસમાંથી ₹૧૫.૯૮ લાખનો ૩૧.૯૭૦ કિલો ગાંજો બિનવારસી હાલતમાં મળી આવ્યો.
- શાલીમાર-પોરબંદર એક્સપ્રેસમાંથી ₹૧.૯૪ લાખની કિંમતનો ૩.૮૯૨ કિલો નશીલો પદાર્થ કબ્જે કરાયો.
- રેલવે પોલીસે કુલ ₹૧૭.૯૩ લાખનો મુદ્દામાલ જપ્ત કરી અજાણ્યા શખ્સો સામે એનડીપીએસ એક્ટ હેઠળ નોંધ્યો ગુનો.
રેલવે માર્ગે ચાલતી નશીલા પદાર્થોની હેરાફેરી પર પોલીસની લાલ આંખ
અમદાવાદ રેલવે પોલીસની સ્પેશિયલ ઓપરેશન ગ્રુપ (એસઓજી) દ્વારા વિરમગામ રેલવે સ્ટેશન પર હાથ ધરવામાં આવેલા સઘન ચેકિંગ દરમિયાન નશીલા પદાર્થોની હેરાફેરીનો મોટો પર્દાફાશ થયો છે. રેલવે માર્ગે નશીલા પદાર્થોની ઘૂસણખોરી અટકાવવા માટે એસઓજી ટીમે હાથ ધરેલા આકસ્મિક તપાસ અભિયાન દરમિયાન અલગ-અલગ બે એક્સપ્રેસ ટ્રેનોમાંથી કુલ ૩૫.૮૬૨ કિલો ગાંજાનો જથ્થો ઝડપી પાડવામાં આવ્યો છે. કબ્જે કરાયેલા ગાંજાની કુલ કિંમત ₹૧૭,૯૩,૧૦૦/- થવા જાય છે.
શાલીમાર-ભુજ અને શાલીમાર-પોરબંદર એક્સપ્રેસમાંથી જપ્ત થયો ગાંજો
પ્રથમ કાર્યવાહીમાં એસઓજીની ટીમે વિરમગામ રેલવે સ્ટેશને આવી પહોંચેલી ટ્રેન નંબર ૨૨૮૩૦ શાલીમાર-ભુજ એક્સપ્રેસમાં તપાસ હાથ ધરી હતી. આ ટ્રેનમાંથી રૂ. ૧૫,૯૮,૫૦૦ ની કિંમતનો ૩૧.૯૭૦ કિલો ગાંજો મળી આવ્યો હતો. જ્યારે બીજી કાર્યવાહીમાં ટ્રેન નંબર ૧૨૯૦૫ શાલીમાર-પોરબંદર એક્સપ્રેસમાં વિરમગામ સ્ટેશન પર ચેકિંગ દરમિયાન રૂ. ૧,૯૪,૬૦૦ ની અંદાજિત કિંમતનો ૩.૮૯૨ કિલો ગાંજો મળી આવ્યો હતો. પોલીસે બંને ટ્રેનોમાંથી બિનવારસી હાલતમાં રાખેલો નશીલો પદાર્થ જપ્ત કર્યો હતો.
અજાણ્યા શખ્સો સામે ગુનો નોંધી વધુ તપાસ શરૂ
અમદાવાદ રેલવે એસઓજી પોલીસે બંને બનાવો અન્વયે એનડીપીએસ એક્ટ હેઠળ કાયદેસરની ગુનાહિત કાર્યવાહી હાથ ધરીને અજાણ્યા તસ્કરો સામે ગુનો નોંધ્યો છે. આ નશીલા પદાર્થનો જથ્થો ક્યાંથી લાવવામાં આવ્યો હતો અને સૌરાષ્ટ્ર-કચ્છના કયા વિસ્તારોમાં સપ્લાય કરવાનો હતો તે દિશામાં પોલીસે તપાસના ચક્રો ગતિમાન કર્યા છે. રેલવે માર્ગે ડ્રગ્સ અને ગેરકાયદેસર સામાનની હેરાફેરી રોકવા માટે આગળના દિવસોમાં પણ ટ્રેનો અને રેલવે સ્ટેશનો પર ચેકિંગ વધુ સઘન બનાવવામાં આવશે તેમ પોલીસે જણાવ્યું છે.
ગાંધીનગર પ્રવાસી પત્રકાર: રાજેશ પરીખ
About the Author
