મુખ્ય હાઇલાઇટ્સ:
- આઠ સમિતિના ચેરમેનોનું પદગ્રહણ: ગાંધીનગર જિલ્લા પંચાયતની મહત્વની આઠ સમિતિઓના નવા ચેરમેનોએ હોદ્દો સંભાળ્યો.
- શક્તિ પ્રદર્શનમાં અણઘડ આયોજન: ધારાસભ્યો અને નેતાઓની હાજરીમાં આયોજકો ભીડ સંચાલન કરવામાં નિષ્ફળ રહ્યા.
- ભોજન સમારંભમાં ધાંધિયા: રસોઈ ખૂટી પડતા કાર્યકરો અને સમર્થકો ભૂખ્યા પેટે ઘરે પરત ફર્યા.
- નિષ્ઠાવાન કાર્યકરોમાં નારાજગી: આયોજકોની બેદરકારીને કારણે પક્ષના પાયાના કાર્યકરોમાં ભારે રોષ જોવા મળ્યો.
ગાંધીનગર જિલ્લા પંચાયત ખાતે ગુરુવારે આયોજિત આઠ સમિતિના ચેરમેનોના પદગ્રહણ સમારોહમાં સત્તાના પ્રદર્શન અને ભવ્ય સ્વાગત વચ્ચે વહીવટી અણઘડપણું સ્પષ્ટપણે છતું થયું હતું. પદગ્રહણના આ કાર્યક્રમમાં ધારાસભ્યો અને ભાજપના અગ્રણીઓની ઉપસ્થિતિમાં શક્તિ પ્રદર્શન કરવાના પ્રયાસમાં આયોજકો દ્વારા કરવામાં આવેલી ગંભીર ભૂલોને કારણે છેલ્લે કાર્યકરોએ ભારે હાલાકી ભોગવવી પડી હતી.
આયોજનમાં ભારે ધાંધિયા અને રસોઈની અછત નવનિયુક્ત ચેરમેનોમાં દિલીપસિંહ સોલંકી, વાસવદત્તા પટેલ, રશ્મીભાઇ ઠાકોર, રણવીરસિંહ ચૌહાણ, અજીતભાઇ પરમાર, નયનસિંહ વાઘેલા અને મહેશજી ઠાકોર સહિતના પદાધિકારીઓએ વિધિવત પદભાર સંભાળ્યો હતો. આ પ્રસંગને યાદગાર બનાવવા માટે ગાંધીનગર, કલોલ અને માણસાથી મોટી સંખ્યામાં સમર્થકોને એકત્રિત કરવામાં આવ્યા હતા. જોકે, આ ભીડને સંભાળવામાં આયોજકો સંપૂર્ણપણે નિષ્ફળ રહ્યા હતા. જિલ્લા પંચાયત કમ્પાઉન્ડમાં રાખવામાં આવેલા ભોજન સમારંભમાં વ્યવસ્થાના અભાવે લાંબી કતારો લાગી હતી અને થોડા જ સમયમાં રસોઈ ખૂટી પડતા અંધાધૂંધી સર્જાઈ હતી.
કાર્યકરોમાં આક્રોશનો માહોલ કલાકો સુધી લાઇનમાં ઉભા રહ્યા બાદ પણ અનેક કાર્યકરોને ભોજન મળ્યું નહોતું. જમણવાર અધૂરો રહેતા અનેક સમર્થકોએ અપમાનિત અનુભવ્યું હતું. ભૂખ્યા પેટે પરત ફરતા કાર્યકરોમાં શાસક પક્ષના સ્થાનિક નેતાઓની આ ઘોર બેદરકારી અને આયોજનની નિષ્ફળતા સામે ભારે આક્રોશ જોવા મળ્યો હતો. સત્તાના પ્રદર્શન પાછળ ખર્ચાયેલા આ કાર્યક્રમમાં છેલ્લે સામાન્ય કાર્યકર જ પીસાયો હોવાની ચર્ચા પંચાયત પરિસરમાં ચાલતી રહી હતી.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
