મુખ્ય હાઇલાઇટ્સ:
- પ્રોજેક્ટમાં વિલંબ: જમીન સંપાદન અને ટેકનિકલ અવરોધોને કારણે બ્રોડગેજ રેલવે પ્રોજેક્ટની કામગીરી થંભી ગઈ.
- ઐતિહાસિક ઇમારતનું સંકટ: જૂનું સ્ટેશન બિલ્ડિંગ ટ્રેકની નજીક હોવાથી નવા નિર્માણમાં અવરોધરૂપ.
- સુવિધાઓનો અભાવ: પાર્કિંગ, શૌચાલય, પીવાનું પાણી અને દિવ્યાંગો માટેની સુવિધાઓનો સંપૂર્ણ અભાવ.
- અટવાયેલા કામો: ફાટક નંબર ૧૬ પાસે જમીન સંપાદન અને હનુમાનપરાના મંદિરોના સ્થળાંતરનો પ્રશ્ન વણઉકેલ્યો.
- લોક માંગ: પ્રોજેક્ટ પૂર્ણતા સાથે જ મહત્વની ટ્રેનો શરૂ કરવા અને કામગીરીમાં ઝડપ લાવવા માટે વહીવટી તંત્રને ચીમકી.
ઐતિહાસિક સ્ટેશન બિલ્ડિંગનું અસ્તિત્વ જોખમમાં: જમીન સંપાદન અને પાયાની સુવિધાઓના અભાવે પ્રોજેક્ટ અધ્ધરતાલ
અમરેલી: અમરેલી જિલ્લાના લાખો નાગરિકો માટે અત્યંત મહત્વકાંક્ષી ગણાતા બ્રોડગેજ રેલવે પ્રોજેક્ટની કામગીરીમાં થઈ રહેલા અતિશય વિલંબ અને સ્ટેશન પરની અપૂરતી સુવિધાઓને લઈને જિલ્લાવાસીઓમાં ભારે રોષ જોવા મળી રહ્યો છે. આ અંગે ગંભીર ચિંતા વ્યક્ત કરતા અમરેલી બ્રોડગેજ કમિટીના હોદ્દેદારો અને સામાજિક કાર્યકરોએ રેલવે સ્ટેશનની રૂબરૂ મુલાકાત લઈને સ્થળ નિરીક્ષણ કર્યું હતું, જેમાં પ્રોજેક્ટની અનેક ગંભીર ખામીઓ અને ટેકનિકલ અવરોધો સામે આવ્યા છે.
નિરીક્ષણ દરમિયાન સૌથી મોટો પ્રશ્ન વર્ષ ૧૯૧૨માં નિર્મિત ઐતિહાસિક સ્ટેશન બિલ્ડિંગનો સામે આવ્યો છે. આ ઈમારત રેલવે ટ્રેકની અત્યંત નજીક હોવાથી, તેને હટાવ્યા વિના નવું પ્લેટફોર્મ કે બ્રોડગેજ લાઇનનું નિર્માણ કરવું ટેકનિકલ રીતે અશક્ય જણાય છે. આ ઉપરાંત, ઈશ્વરીયા–માચીયાળા વચ્ચે ફાટક નંબર ૧૬ પાસે જમીન સંપાદનની પ્રક્રિયા પૂર્ણ ન થવાને કારણે કામગીરી સંપૂર્ણપણે ઠપ્પ થઈ ગઈ છે. હનુમાનપરા રોડ પરના મંદિરોના સ્થળાંતરનો મુદ્દો પણ હજુ વણઉકેલ્યો છે, તેમજ સ્ટેશન પરિસરમાં અંડરબ્રિજનું કામ પણ અધૂરું જોવા મળ્યું છે.
કમિટીના અગ્રણી રાજેશભાઈ ગાંધીએ રેલવે તંત્રની ધીમી ગતિ સામે આક્રોશ વ્યક્ત કરતા જણાવ્યું હતું કે, પ્રોજેક્ટની કામગીરીમાં થઈ રહેલી બેદરકારીને કારણે જિલ્લાની જનતા પીડાઈ રહી છે. સ્ટેશન પર મુસાફરો માટે વિશાળ પ્રતીક્ષાલય, પાર્કિંગ, સ્વચ્છ શૌચાલય અને પીવાના પાણી જેવી પાયાની સુવિધાઓનો પણ અભાવ જોવા મળ્યો છે. કમિટીએ સ્થાનિક સાંસદને રજૂઆત કરી માંગ કરી છે કે પ્રોજેક્ટ પૂર્ણ થાય તે પહેલા જ અમદાવાદ, સુરત, મુંબઈ અને હરિદ્વાર જેવી મહત્વની ટ્રેનોની મંજૂરી મેળવી લેવી જોઈએ, જેથી પ્રોજેક્ટ તૈયાર થતાં જ જનતાને તેનો લાભ મળી શકે. અંતમાં કમિટીએ તંત્રને ચેતવણી આપતા જણાવ્યું હતું કે તમામ અવરોધો યુદ્ધના ધોરણે દૂર કરી પ્રોજેક્ટને ત્વરિત ગતિ આપવામાં આવે.
અહેવાલ: ભાવેશ વાઘેલા અમરેલી
About the Author
