મુખ્ય હાઇલાઇટ્સ:
- કડક પગલાં: અમરેલી જિલ્લા પોલીસે વર્ષોથી કાયદાની પકડથી દૂર ભાગતા ૧૦ મોસ્ટ વોન્ટેડ આરોપીઓની યાદી જાહેર કરી.
- રોકડ ઈનામ: આરોપીઓ વિશે સચોટ માહિતી આપનાર નાગરિકને રૂ. ૧૦,૦૦૦નું રોકડ ઈનામ આપવામાં આવશે.
- ઓળખ ગુપ્ત રહેશે: બાતમી આપનાર વ્યક્તિનું નામ અને તમામ વિગતો પોલીસ દ્વારા સંપૂર્ણપણે ગુપ્ત રાખવામાં આવશે.
- ગંભીર ગુનાઓ: અપહરણ, છેતરપિંડી, ચોરી અને પોક્સો જેવા કેસોમાં વર્ષ ૧૯૮૮થી ફરાર આરોપીઓનો સમાવેશ.
અમરેલી:
અમરેલી જિલ્લામાં લાંબા સમયથી કાયદાની પકડથી દૂર ભાગતા અને વિવિધ ગુનાઓમાં નાસતા ફરતા આરોપીઓ વિરુદ્ધ જિલ્લા પોલીસ દ્વારા અત્યંત કડક વલણ અપનાવવામાં આવ્યું છે. રાજ્ય સરકારના ગૃહ વિભાગની ખાસ સૂચના અને માર્ગદર્શન હેઠળ અમરેલી જિલ્લા પોલીસ અધિક્ષક સંજય ખરાત દ્વારા જિલ્લાના જુદા જુદા પોલીસ મથકોમાં નોંધાયેલા ગંભીર ગુનાઓમાં નાસતા ફરતા ‘ટોપ-૧૦’ મોસ્ટ વોન્ટેડ આરોપીઓની સત્તાવાર યાદી જાહેર કરવામાં આવી છે.
સચોટ બાતમી આપનારને રોકડ ઈનામ અને ગુપ્તતાની ખાતરી
અમરેલી પોલીસ દ્વારા સ્પષ્ટ જાહેરાત કરવામાં આવી છે કે આ યાદીમાં દર્શાવેલા કોઈપણ નાસતા ફરતા આરોપી અંગે જો કોઈ નાગરિક ચોક્કસ અને સચોટ માહિતી આપશે, તો તેને જિલ્લા પોલીસ દ્વારા રૂ. ૧૦,૦૦૦ (અંકે રૂપિયા દસ હજાર પૂરા) નું રોકડ ઈનામ એનાયત કરવામાં આવશે. આ ઉપરાંત, માહિતી આપનાર નાગરિકની સુરક્ષાને ધ્યાને રાખીને તેમની ઓળખ અને વિગતો સંપૂર્ણપણે ગુપ્ત રાખવાની ખાતરી પણ પોલીસે આપી છે.
૧૯૮૮થી ફરાર આરોપીઓ અને ગંભીર ગુનાઓનો સમાવેશ
જિલ્લાના અમરેલી તાલુકા, લાઠી, બાબરા, સાવરકુંડલા (ટાઉન/રૂરલ), રાજુલા, ધારી અને ખાંભા પોલીસ સ્ટેશનમાં નોંધાયેલા કેસો અન્વયે આ યાદી તૈયાર કરવામાં આવી છે. આ આરોપીઓ સામે અપહરણ, છેતરપિંડી, વિશ્વાસઘાત, ચોરી, ધમકી તેમજ પોક્સો જેવા અતિ ગંભીર ગુનાઓ નોંધાયેલા છે. ખાસ નોંધનીય છે કે આ યાદીમાં સમાવિષ્ટ કેટલાક આરોપીઓ વર્ષ ૧૯૮૮, ૧૯૯૪, ૧૯૯૭, ૧૯૯૯, ૨૦૦૩, ૨૦૦૫, ૨૦૧૨, ૨૦૧૩ અને ૨૦૨૧ જેવા જુદા જુદા વર્ષોથી કાયદાની આંખમાં ધૂળ નાખીને નાસતા ફરી રહ્યા છે.
અમરેલી પોલીસ દ્વારા જાહેર કરાયેલા ટોપ-૧૦ વોન્ટેડ આરોપીઓ:
૧. મગન ચીમન ગોહિલ – અમરેલી તાલુકા પોલીસ સ્ટેશન
૨. છલીયા ભાવસિંહ પલાસ – લાઠી પોલીસ સ્ટેશન
૩. રામદાસ ઉર્ફે કાળુ અમરદાસ ગોંડલીયા – બાબરા પોલીસ સ્ટેશન
૪. બાબુભાઈ એસ. પટેલ – સાવરકુંડલા ટાઉન પોલીસ સ્ટેશન
૫. વૈભવ બીપીનભાઈ માટલીયા – સાવરકુંડલા પોલીસ સ્ટેશન
૬. ગોબર નાથા પટેલ – રાજુલા પોલીસ સ્ટેશન
૭. ત્રિકમલાલ કે. ચાવડા – રાજુલા પોલીસ સ્ટેશન
૮. અશોકભાઈ મારવાડી – ધારી પોલીસ સ્ટેશન
૯. ગણપતભાઈ નાનજીભાઈ પરમાર – ખાંભા પોલીસ સ્ટેશન
૧૦. પ્રકાશ રતિલાલ બધાણી – રાજુલા પોલીસ સ્ટેશન
નાગરિકોને સહયોગ આપવા માટે પોલીસની ખાસ અપીલ
અમરેલી જિલ્લા પોલીસ દ્વારા સ્પષ્ટ ચેતવણી આપવામાં આવી છે કે ગુનેગારોને આશરો આપનારા કે મદદ કરનારા વચેટિયાઓ સામે પણ કડકાઈથી કામ લેવામાં આવશે. જિલ્લા પોલીસ અધિક્ષક સંજય ખરાતે જણાવ્યુ કે જો કોઈ નાગરિક પાસે આ યાદીમાં દર્શાવેલ કોઈપણ આરોપી અંગેની વિશ્વસનીય માહિતી હોય, તો તેઓ તાત્કાલિક નજીકના પોલીસ સ્ટેશનનો અથવા સીધા જિલ્લા પોલીસ અધિકારીઓનો સંપર્ક કરી શકે છે. જનસહયોગથી જ ગુનાખોરી ડામી શકાશે અને કાયદાનું રાજ વધુ મજબૂત બનશે તેવી પોલીસે ખાસ અપીલ કરી છે.
અહેવાલ: ભાવેશ વાઘેલા અમરેલી
About the Author
