મુખ્ય હાઇલાઇટ્સ:
- દસ્ક્રોઈ તાલુકા પંચાયત અને આરોગ્ય કચેરી દ્વારા આયોજિત કાર્યક્રમમાં ભાવડા ગામ ખાતેથી ૮ આયુષ્માન આરોગ્ય મંદિરોનું લોકાર્પણ.
- ભાવડા, ચાંદીયેલ, ઉદરેલ, વસઈ, કુબડથલ, પસુંજ, હરણીયાવ અને ઓડ ગામે રૂ. ૪૫ લાખના ખર્ચે પ્રતિ મકાન નિર્માણ.
- ગ્રામીણ જનતાને સવારે ૯ થી ૫ વાગ્યા સુધી યોગા, નિરામય દિવસ, રસીકરણ અને કેન્સર સ્ક્રીનિંગ સહિતની ૧૨ પ્રકારની આરોગ્ય સેવાઓ મળશે.
- ધારાસભ્ય બાબુભાઈ પટેલ, જિલ્લા રોગચાળા નિયંત્રણ અધિકારી ચિંતન દેસાઈ, પંચાયતના પ્રતિનિધિઓ અને આરોગ્ય પરિવાર રહ્યા ઉપસ્થિત.
દસ્ક્રોઈના ભાવડા ખાતેથી ૮ નવા આયુષ્માન આરોગ્ય મંદિરોનું લોકાર્પણ
અમદાવાદ જિલ્લાના દસ્ક્રોઈ તાલુકામાં ગ્રામીણ નાગરિકોને ઘરઆંગણે જ ઉત્કૃષ્ટ અને આધુનિક આરોગ્ય સુવિધાઓ ઉપલબ્ધ કરાવવાના શુભ હેતુથી તાલુકા પંચાયત દસ્ક્રોઈ અને તાલુકા આરોગ્ય કચેરી દ્વારા એક વિશેષ લોકાર્પણ કાર્યક્રમનું ભવ્ય આયોજન કરવામાં આવ્યું હતું. આ પ્રસંગે દસ્ક્રોઈના ધારાસભ્ય બાબુભાઈ જમનાદાસ પટેલના વરદ હસ્તે તાલુકાના ભાવડા ગામ ખાતેથી એકસાથે ૮ આયુષ્માન આરોગ્ય મંદિરોના નવા નિર્માણ પામેલા મકાનોનું વિધિવત્ લોકાર્પણ કરવામાં આવ્યું હતું. આ નવનિર્મિત કેન્દ્રોથી વિસ્તારના હજારો ગ્રામજનોને પ્રાથમિક સારવાર મેળવવામાં મોટી સુગમતા રહેશે.
રૂ. ૩.૫૨ કરોડના ખર્ચે ૮ ગામોમાં તૈયાર કરાયા અદ્યતન પેટા આરોગ્ય કેન્દ્રો
દસ્ક્રોઈ તાલુકામાં નવ મંજૂર થયેલા ૮ આયુષ્માન પેટા આરોગ્ય કેન્દ્રો માટે રાજ્ય સરકાર દ્વારા પ્રતિ મકાન રૂ. ૪૫ લાખ લેખે કુલ રૂ. ૩ કરોડ ૫૨ લાખની માતબર ગ્રાન્ટ મંજૂર કરવામાં આવી હતી. આ ગ્રાન્ટ અંતર્ગત તાલુકાના ભાવડા, ચાંદીયેલ, ઉદરેલ, વસઈ, કુબડથલ, પસુંજ, હરણીયાવ અને ઓડ એમ કુલ આઠ ગામોમાં આધુનિક સુવિધાઓથી સજ્જ નવા મકાનો તૈયાર કરવામાં આવ્યા છે. નોંધનીય છે કે દસ્ક્રોઈ તાલુકાની ૨,૯૩,૧૭૯ ની વસ્તી માટે હાલ ૮ પ્રાથમિક આરોગ્ય કેન્દ્ર અને ૪૫ સબ સેન્ટર કાર્યરત છે, જેમાંથી ૩૩ આયુષ્માન આરોગ્ય મંદિર તરીકે ઉત્કૃષ્ટ સેવાઓ આપી રહ્યા છે.
ગામડાંના નાગરિકોને મળશે ૧૨ પ્રકારની પ્રાથમિક આરોગ્ય સેવાઓ
આ તમામ નવનિર્મિત આયુષ્માન આરોગ્ય મંદિરો ખાતે સીએચઓ, એફએચડબલ્યુ, એમપીએચડબલ્યુ અને આશા બહેનો દ્વારા દરરોજ સવારે ૯ થી સાંજે ૫ વાગ્યા સુધી સઘન આરોગ્ય સેવાઓ પૂરી પાડવામાં આવશે. અહીં દર મંગળવારે અને શુક્રવારે યોગા દિવસ તેમજ દર શુક્રવારે નીરામય દિવસની ઉજવણી હાથ ધરાશે. આ ઉપરાંત સગર્ભા માતાઓની સંભાળ, બાળ આરોગ્ય, રસીકરણ, ડાયાબિટીસ, બ્લડ પ્રેશર તેમજ કેન્સર સ્ક્રીનિંગ સહિતની ૧૨ પ્રકારની પ્રાથમિક અને અત્યાવશ્યક સ્વાસ્થ્ય સેવાઓ સ્થાનિકોને સીધી મળી રહેશે. આ લોકાર્પણ પ્રસંગે જિલ્લા અને તાલુકા સદસ્યો, સ્થાનિક સરપંચો, જિલ્લા રોગચાળા નિયંત્રણ અધિકારી ચિંતન દેસાઈ તથા આરોગ્ય વિભાગનો સ્ટાફ બહોળી સંખ્યામાં હાજર રહ્યો હતો.
ગાંધીનગર પ્રવાસી પત્રકાર રાજેશ પરીખ
About the Author
