- અમદાવાદના ‘એલ’ ડિવિઝન ટ્રાફિક પોલીસ સ્ટેશનના એ.એસ.આઈ. મુકેશજી જીવણજી રાજપૂત એ.સી.બી.ના છટકામાં આબાદ ઝડપાયા.
- અકસ્માત અંગેની અરજી ફાઇલ કરી દફતરે કરવાના બદલામાં જાગૃત નાગરિક પાસે માગી હતી ₹૧૦,૦૦૦ ની લાંચ.
- સુભાષ બ્રિજ પોલીસ ચોકી નજીક આવેલી ચાની દુકાનમાં લાંચની રકમ સ્વીકારતાં જ એ.સી.બી.ની ટીમે પાડી રેડ.
- ૧૦૬૪ નંબર પર મળેલી ફરિયાદના આધારે એ.સી.બી. અધિકારીઓએ રંગેહાથ પકડી કાયદેસરની કાર્યવાહી હાથ ધરી.
અકસ્માતની અરજી રફા-દફા કરવા ₹૧૦,૦૦૦ ની લાંચ માગી
અમદાવાદ શહેરમાં લાંચરુશવત વિરોધી બ્યુરો (એ.સી.બી.) દ્વારા ભ્રષ્ટ અધિકારીઓ સામે લાલ આંખ કરીને વધુ એક સફળ ટ્રેપ ગોઠવવામાં આવી છે. મળતી માહિતી મુજબ, અમદાવાદ શહેરના ‘એલ’ ડિવિઝન ટ્રાફિક પોલીસ સ્ટેશન ખાતે એક નાગરિકના અસીલ વિરુદ્ધ અકસ્માત અંગેની અરજી આવી હતી. આ અરજીની તપાસ હાથ ધરી રહેલા એ.એસ.આઈ. મુકેશજી જીવણજી રાજપૂતે સદર અરજી આગળ ન વધારતાં દફતરે કરવા માટે (રફા-દફા કરવા માટે) ફરિયાદી પાસે ₹૧૦,૦૦૦ ની લાંચની ઉઘાડી માંગણી કરી હતી.
જાગૃત નાગરિકે એ.સી.બી.નો સંપર્ક કરી છટકું ગોઠવ્યું
ફરિયાદી લાંચની રકમ આપવા માગતા ન હોવાથી તેમણે તુરંત જ ભ્રષ્ટાચાર સામે અવાજ ઉઠાવી અમદાવાદ શહેર એ.સી.બી.ના ટોલ-ફ્રી નંબર ૧૦૬૪ પર સંપર્ક કર્યો હતો. નાગરિકની લેખિત ફરિયાદના આધારે એ.સી.બી. પી.આઈ. કે.એન. સોલંકી અને તેમની ટીમે તાત્કાલિક લાંચનું છટકું ગોઠવવાની યોજના બનાવી હતી. એ.સી.બી.ના સુપરવિઝન અધિકારી એમ.એચ. પુવાર અને ઇન્ચાર્જ નાયબ નિયામક હરેશ મેવાડાના માર્ગદર્શન હેઠળ આ સમગ્ર ટ્રેપનું આયોજન કરવામાં આવ્યું હતું.
સુભાષ બ્રિજ ચોકી પાસેની ચાની દુકાનમાંથી રંગેહાથ ઝડપાયા
આયોજન મુજબ, અમદાવાદના સુભાષ બ્રિજ પોલીસ ચોકીની બાજુમાં આવેલી ‘શ્રીજી ચાય વાલા’ નામની દુકાનની અંદર ગોઠવાયેલા છટકામાં આક્ષેપિત એ.એસ.આઈ. મુકેશ રાજપૂતે ફરિયાદી સાથે હેતુલક્ષી વાતચીત કરી હતી. જેવી તેમણે ₹૧૦,૦૦૦ ની લાંચની રકમ સ્વીકારી, તરત જ આસપાસ ગોઠવાયેલી એ.સી.બી.ની ટીમે દરોડો પાડીને તેમને સ્થળ પર જ રંગેહાથ ઝડપી લીધા હતા. એ.સી.બી.એ લાંચની સંપૂર્ણ ₹૧૦,૦૦૦ ની રકમ રીકવર કરીને આરોપી એ.એસ.આઈ. સામે ગુનો નોંધી આગળની કાયદેસરની કાર્યવાહી હાથ ધરી છે.
અહેવાલ: મહેશભાઈ જળું
About the Author
