મુખ્ય હાઇલાઇટ્સ:
- ધરપકડ: લીલાનગર વિસ્તારમાંથી મનોજ સોલંકી અને નીતિન સોલંકી નામના બે ઇસમોની અટકાયત.
- મુદ્દામાલ: બે રીક્ષા, ૧૩૫૦ કિલોગ્રામ ચોખા અને ૩૫૦ કિલોગ્રામ ઘઉં સહિત કુલ રૂપિયા ૩,૩૨,૨૫૦/- નો માલ જપ્ત.
- પોલીસ કાર્યવાહી: ભારતીય નાગરિક સુરક્ષા સંહિતાની કલમ ૩૫(૧)(ઇ) તથા ૧૦૬ મુજબ ગુનો નોંધી તપાસ શરૂ.
- અધિકારીઓ: ભાવનગર રેન્જ અને અમરેલી જિલ્લા પોલીસ વડાના માર્ગદર્શન હેઠળ સિટી સર્વેલન્સ ટીમની મોટી સફળતા.
રેન્જ આઈ.જી.પી. અને જિલ્લા પોલીસ વડાની કડક સૂચના
ભાવનગર રેન્જના ઇન્સ્પેક્ટર જનરલ ઓફ પોલીસ (આઈ.જી.પી.) આર.વી. અસારી દ્વારા રેન્જના તમામ જિલ્લાઓમાં બિલ કે આધાર-પુરાવા વગર ગેરકાયદેસર ચીજવસ્તુઓ રાખતા કે તેની હેરાફેરી કરતા ઇસમો સામે સત્વરે કડક કાર્યવાહી કરવા આદેશ આપવામાં આવ્યા છે. આ સૂચના અન્વયે અમરેલી જિલ્લા પોલીસ અધિક્ષક સંજય ખરાત દ્વારા પણ સ્થાનિક પોલીસને સઘન ચેકિંગ કરવા જણાવાયું હતું. જે અંતર્ગત અમરેલી ડિવિઝનના ઇન્ચાર્જ નાયબ પોલીસ અધિક્ષક વિસ્મય માનસેતાના સીધા માર્ગદર્શન હેઠળ અમરેલી સિટી પોલીસની ટીમ કાર્યરત થઈ હતી.
પેટ્રોલિંગ દરમિયાન લીલાનગરમાંથી બે રીક્ષા ઝડપાઈ
અમરેલી સિટી પોલીસ સ્ટેશનના પોલીસ ઇન્સ્પેક્ટર એમ.એમ. ઝાલાની આગેવાનીમાં સિટી સર્વેલન્સ ટીમ જ્યારે પોલીસ સ્ટેશન વિસ્તારમાં પેટ્રોલિંગમાં હતી, તે દરમિયાન ચોક્કસ બાતમી મળી હતી. આ બાતમીના આધારે પોલીસે અમરેલી સિટીના લીલાનગર વિસ્તારમાં વોચ ગોઠવી હતી. ત્યાંથી પસાર થઈ રહેલી બે શંકાસ્પદ બજાજ મેક્સિમા રીક્ષાઓને અટકાવીને તલાશી લેતા તેમાંથી બિલ વગરનો ઘઉં અને ચોખાનો અનાજનો મોટો જથ્થો મળી આવ્યો હતો. પોલીસે ઘટનાસ્થળેથી જ બે શખ્સોની ધરપકડ કરી કાયદેસરની કાર્યવાહી હાથ ધરી છે.
પકડાયેલા આરોપીઓની વિગત
પોલીસના હાથે ઝડપાયેલા બંને ઇસમો લીલાનગરના જ રહેવાસી છે: ૧. મનોજભાઇ ધીરૂભાઈ સોલંકી (ઉંમર વર્ષ ૨૬, રહે. લીલાનગર, તા.જિ. અમરેલી)
૨. નિતીનભાઇ હકાભાઇ સોલંકી (ઉંમર વર્ષ ૨૨, રહે. લીલાનગર, તા.જિ. અમરેલી)
રૂપિયા ૩.૩૨ લાખનો મુદ્દામાલ જપ્ત
સિટી સર્વેલન્સ ટીમે ઘટનાસ્થળેથી વાહનો અને અનાજ સહિત કુલ રૂપિયા ૩,૩૨,૨૫૦/- નો મુદ્દામાલ જપ્ત કર્યો છે, જેની વિગતો નીચે મુજબ છે:
- વાહનો: બે બજાજ કંપનીની મેક્સિમા રીક્ષા (જેની અંદાજિત કિંમત રૂપિયા ૧,૫૦,૦૦૦/- લેખે કુલ રૂપિયા ૩,૦૦,૦૦૦/-)
- ઘઉંનો જથ્થો: ૩૫૦ કિલોગ્રામ ઘઉં (કિંમત રૂપિયા ૫,૨૫૦/-)
- ચોખાનો જથ્થો: ૧૩૫૦ કિલોગ્રામ ચોખા (કિંમત રૂપિયા ૨૭,૦૦૦/-)
અમરેલી સિટી પોલીસની આ સફળ કામગીરીથી ગેરકાયદેસર અનાજની હેરાફેરી કરતા તત્વોમાં ફફડાટ વ્યાપી ગયો છે. પોલીસે બંને આરોપીઓ સામે ભારતીય નાગરિક સુરક્ષા સંહિતા મુજબ ગુનો નોંધી આગળની તપાસ તેજ કરી છે.
અહેવાલ ભાવેશ વાઘેલા અમરેલી
About the Author
