મુખ્ય હાઇલાઇટ્સ:
- લાઠીમાં રડતી હાલતમાં ત્રણ વર્ષનું બાળક મળી આવ્યું.
- સ્થાનિક નાગરિકે તાત્કાલિક પોલીસને જાણ કરી.
- પોલીસે માત્ર બે કલાકમાં બાળકના પરિવારની શોધખોળ કરી.
- બાળકને તેના પિતા અનસિંગભાઈ બદીયાભાઈ કટારાને સહીસલામત સોંપવામાં આવ્યો.
- પોલીસ ઇન્સ્પેક્ટર એમ.બી. ઔસુરાના માર્ગદર્શન હેઠળ સફળ કામગીરી.
- પરિવારજનો અને સ્થાનિકોએ લાઠી પોલીસની માનવતાભરી કામગીરીને બિરદાવી.
- “પોલીસ પ્રજાની મિત્ર” સૂત્રને લાઠી પોલીસે ફરી એકવાર સાર્થક કર્યું.
લાઠી
“પોલીસ પ્રજાની મિત્ર” સૂત્રને સાચા અર્થમાં સાબિત કરતી ઘટના લાઠીમાં સામે આવી છે. લાઠી પોલીસ સ્ટેશનના સ્ટાફે રડતી હાલતમાં મળી આવેલા ત્રણ વર્ષના માસૂમ બાળકને માત્ર બે કલાકની અંદર તેના પરિવાર સુધી સહીસલામત પહોંચાડી માનવતાનું ઉત્તમ ઉદાહરણ પૂરું પાડ્યું છે.
મળતી માહિતી મુજબ લાઠીના કેરીયા રોડ પર આવેલા ખોડિયાર નગર વિસ્તારમાં રહેતા રમણીકભાઈ ઘાટલિયાને અંદાજે ત્રણ વર્ષનું એક બાળક રડતી હાલતમાં મળી આવ્યું હતું. આસપાસ પૂછપરછ કરવા છતાં બાળકના પરિવાર વિશે કોઈ માહિતી મળી નહોતી. ત્યારબાદ તેમણે તાત્કાલિક લાઠી પોલીસ સ્ટેશનનો સંપર્ક કર્યો હતો.
પોલીસ ઇન્સ્પેક્ટર એમ.બી. ઔસુરાના માર્ગદર્શન હેઠળ સર્વેલન્સ સ્ટાફ તાત્કાલિક ઘટનાસ્થળે પહોંચ્યો હતો અને બાળકના વાલી-વારસની શોધખોળ શરૂ કરી હતી.
પોલીસની સતર્કતા અને ઝડપી કાર્યવાહીના પરિણામે માત્ર બે કલાકમાં બાળકના પિતા અનસિંગભાઈ બદીયાભાઈ કટારાની ઓળખ કરવામાં સફળતા મળી હતી. તેઓ હાલ લાઠીમાં રહે છે અને તેમનું મૂળ વતન અલીરાજપુર જિલ્લાના રિંગોલ ગામનું હોવાનું જાણવા મળ્યું હતું.
જરૂરી કાયદેસરની કાર્યવાહી પૂર્ણ કર્યા બાદ પોલીસે બાળકને તેના પિતા અને પરિવારજનોને સહીસલામત સોંપી દીધો હતો. પોતાના સંતાનને સુરક્ષિત પરત મળતાં પરિવારજનો ભાવુક બની ગયા હતા અને લાઠી પોલીસની માનવતાવાદી કામગીરી બદલ આભાર વ્યક્ત કર્યો હતો.
સ્થાનિક નાગરિકોએ પણ લાઠી પોલીસની સતર્કતા, સંવેદનશીલતા અને ઝડપી કામગીરીની પ્રશંસા કરી હતી.
અહેવાલ: ભાવેશ વાઘેલા અમરેલી
About the Author
