મુખ્ય હાઇલાઇટ્સ:
- નગરપાલિકા માટે મંજૂર થયેલા રૂ. ૪ કરોડ પૈકી પ્રથમ તબક્કાના રૂ. ૭૦ લાખના વિવિધ વિકાસકામોનો શુભારંભ.
- સાતોડીપરા વિસ્તારમાં રૂ. ૩૦ લાખના ખર્ચે સીસી રોડ અને વોર્ડ નં. ૨ માં રૂ. ૩૦ લાખના ખર્ચે ડૉ. બાબાસાહેબ આંબેડકર હોલ બનશે.
- સમસ્ત કોળી સમાજ સ્મશાનગૃહ ખાતે રૂ. ૧૦ લાખના ખર્ચે સ્નાનઘાટ અને યુરિન બ્લોકની સુવિધા ઉપલબ્ધ કરાવાશે.
- પૂજ્ય સંતો-મહંતો, ધારાસભ્યશ્રી અને ભાજપ સંગઠનના હોદ્દેદારો તથા નગરજનોની પ્રેરક ઉપસ્થિતિ.
ચલાલા શહેરમાં રૂ. ૭૦ લાખના વિવિધ વિકાસકાર્યોનું શાસ્ત્રોક્ત વિધિથી ખાતમુહૂર્ત
અમરેલી જિલ્લાના ચલાલા શહેરના સર્વાંગી વિકાસ અને જનસુવિધાઓમાં વધારો કરવાના હેતુથી નગરપાલિકા દ્વારા વિકાસકાર્યો ઝડપથી હાથ ધરવામાં આવી રહ્યા છે. ધારાસભ્ય શ્રી જે.વી. કાકડિયાના માર્ગદર્શન અને ખાસ ઉપસ્થિતિ વચ્ચે નગરપાલિકા દ્વારા મંજૂર કરવામાં આવેલા રૂ. ૪ કરોડના વિવિધ વિકાસ પ્રકલ્પો પૈકી રૂ. ૭૦ લાખના કામોનું ખાતમુહૂર્ત કરવામાં આવ્યું હતું. વિદ્વાન ભૂદેવો દ્વારા શાસ્ત્રોક્ત વિધિ-વિધાનપૂર્વક પૂજન અર્ચન કરીને કામોનો શુભારંભ કરાયો હતો. આ પ્રસંગે પૂજ્ય રતિદાદા, મહંત શ્રી મયુરબાપુ ગોસાઈ અને શ્રી રાજુદાદા જાની જેવા પૂજનીય સંતો તેમજ સ્થાનિક અગ્રણીઓ ઉપસ્થિત રહ્યા હતા.
વોર્ડ નં. ૨ અને ૩ માં સીસી રોડ તથા ડૉ. બાબાસાહેબ આંબેડકર હોલનું નિર્માણ થશે
વિકાસકાર્યોની વિગત આપતા નગરપાલિકા પ્રમુખ શ્રી જયરાજભાઈ વાળાએ જણાવ્યું હતું કે, વોર્ડ નં. ૩ ના સદસ્યોની સતત રજૂઆતથી સાતોડીપરા વિસ્તારમાં જાળવાળી શેરી પાસે રૂ. ૩૦ લાખના ખર્ચે નવીન સીસી રોડ બનાવવામાં આવશે. આ ઉપરાંત વોર્ડ નં. ૨ માં નગરપાલિકાના સદસ્યોની રજૂઆતને પગલે રૂ. ૩૦ લાખના અનુદાનથી ડૉ. બાબાસાહેબ આંબેડકર હોલનું નિર્માણ હાથ ધરવામાં આવ્યું છે. સાથે જ ચલાલા સમસ્ત કોળી સમાજના સ્મશાનગૃહ ખાતે રૂ. ૧૦ લાખના ખર્ચે નવીન સ્નાનઘાટ તથા યુરિન બ્લોકના બાંધકામનું ખાતમુહૂર્ત કરવામાં આવ્યું હતું.
જનપ્રતિનિધિઓ અને સંગઠનના આગેવાનોની ઉપસ્થિતિ, સન્માન કાર્યક્રમ યોજાયો
કાર્યક્રમ દરમિયાન અમરેલી જિલ્લા ખરીદ-વેચાણ સંઘના પ્રમુખ શ્રી જયંતીભાઈ પાનસુરીયા, ધારાસભ્ય શ્રી જે.વી. કાકડિયા અને અન્ય અગ્રણીઓએ પ્રસંગોચિત વક્તવ્ય આપી શહેરના સુવિધાસભર વિકાસની કટિબદ્ધતા દોહરાવી હતી. કોળી સમાજ અને ચલાલા નાગરિક સહકારી મંડળીના ચેરમેન શ્રી મનસુખભાઈ સાપરીયા તથા આગેવાનો દ્વારા ઉપસ્થિત મહાનુભાવોનું સાદર પુષ્પગુચ્છ અને ફુલહારથી સન્માન કરાયું હતું. આ ખાતમુહૂર્ત પ્રસંગે નગરપાલિકાના ઉપપ્રમુખ, વિવિધ સમિતિના ચેરમેનો, પૂર્વ પ્રમુખો, ભાજપ સંગઠનના હોદ્દેદારો તેમજ વિશાળ સંખ્યામાં ગ્રામજનો અને યુવાનો હાજર રહ્યા હતા.
અહેવાલ:બીપીન રાઠોડ ચલાલા અમરેલી
About the Author
