મુખ્ય હાઇલાઇટ્સ:
- ભાવનગર અને ગોહિલવાડની પુષ્ટિમાર્ગીય હવેલીઓ, બેઠકજી અને કૃષ્ણ મંદિરોમાં હિંડોળા ઉત્સવનો મંગલ પ્રારંભ.
- અષાઢ વદ એકમથી શ્રાવણ વદ એકમ સુધી આખો એક માસ ભક્તિસભર વાતાવરણમાં ઉજવાશે પવિત્ર ઉત્સવ.
- પરિમલ સ્થિત ગોવર્ધનનાથજી હવેલી સહિત વિવિધ ધર્મસ્થાનકોમાં મનોહર શણગાર અને આકર્ષક સુશોભન કરાશે.
- ફૂલ, ફળ, સુકામેવા, મોતી, રાખડી અને ચલણી નોટ-સિક્કાઓથી સજ્જ કલાત્મક હિંડોળામાં ઠાકોરજી બિરાજશે.
ભાવનગર અને ગોહિલવાડમાં હિંડોળા પર્વનો પ્રારંભ
ભાવનગર સહિત સમગ્ર ગોહિલવાડમાં સમસ્ત વૈષ્ણવ સમાજ તેમજ સ્વામિનારાયણ સંપ્રદાય દ્વારા પરંપરાગત રીતે હિંડોળા ઉત્સવની ભક્તિમય ઉજવણીનો પ્રારંભ થઈ રહ્યો છે. તમામ પુષ્ટિમાર્ગીય હવેલીઓ, બેઠકજી, ઈસ્કોન મંદિર, કૃષ્ણ મંદિર તેમજ વિવિધ ઠાકરદ્વારાઓમાં ભગવાન શ્રીકૃષ્ણની બાલ્યાવસ્થાની આરાધનાના આ પવિત્ર પર્વની ભારે ઉત્સાહપૂર્વક ઉજવણી કરવામાં આવશે. ગત વર્ષે પુરુષોત્તમ માસના કારણે સતત ૫૨ દિવસ સુધી હિંડોળા ઉત્સવ યોજાયો હતો, જ્યારે આ વર્ષે અષાઢ વદ એકમથી એક માસ સુધી આ ઉત્સવ ધામધૂમથી ઉજવાશે.
વિવિધ હવેલીઓમાં કલાત્મક શણગાર અને સુશોભન
ભાવનગર શહેરના પરિમલ સ્થિત ગોવર્ધનનાથજીની હવેલી તેમજ ગારિયાધારની ગોવર્ધનનાથજી હવેલી ખાતેથી હિંડોળા ઉત્સવનો પ્રારંભ થઈ રહ્યો છે, જ્યારે નંદાલય હવેલી અને ઘોઘાની મદનમોહનલાલજી હવેલી ખાતે રવિવારથી દરરોજ સાંજે નિત્યક્રમ મુજબ ચિત્તાકર્ષક સુશોભન અને શણગાર કરવામાં આવશે. આ ઉત્સવ દરમિયાન ઠાકોરજી સમક્ષ દર્શન કરવા માટે ભાવિક વૈષ્ણવોનું ભક્તિમય મહેરામણ ઉમટી પડશે.
અઢળક કલાત્મક વૈવિધ્ય ધરાવતા હિંડોળામાં ઠાકોરજી ઝૂલશે
હિંડોળા ઉત્સવના પ્રારંભિક તબક્કામાં કલાત્મક સુરંગના અને ત્યારબાદ ફળ, ફૂલ, ફ્રુટ, શાકભાજી, આસોપાલવ, કાચ, સાવનભાદો, સુકામેવા, મોતી, બગીચા, જરદોશી, સ્ટોન, રાખડી, પવિત્રા તેમજ ચલણી સિક્કાઓ અને નોટો સહિતની અઢળક વેરાયટીઓથી નિર્મિત કલાત્મક હિંડોળા સજાવવામાં આવશે. આ વિવિધ સુશોભિત હિંડોળામાં ઠાકોરજીને વિરાજમાન કરી ઝુલાવવામાં આવશે. આ ઉપરાંત વૈષ્ણવો દ્વારા પોતપોતાના ઘરમંદિરમાં પણ ભાવપૂર્વક પારણા ઉત્સવ ઉજવવામાં આવશે. આ ભવ્ય આયોજનને લઈને તમામ ધર્મસ્થાનકોમાં તૈયારીઓને આખરી ઓપ આપી દેવામાં આવ્યો છે.
ગાંધીનગર (પ્રવાસી પત્રકાર: રાજેશ પરીખ)
About the Author
