મુખ્ય હાઇલાઇટ્સ:
- ભાજપ કિસાન મોરચા ગુજરાત પ્રદેશ અધ્યક્ષ હિરેન હિરપરાના રાજ્યવ્યાપી સંગઠનાત્મક પ્રવાસનો ભાવનગરથી પ્રારંભ.
- પાલીતાણા ડેમ ખાતે ‘મન કી બાત – પ્રાકૃતિક કૃષિ કે સાથ’ કાર્યક્રમ અંતર્ગત ખેડૂતો સાથે યોજાયો સીધો સંવાદ.
- કુંભણ ખાતે મંદબુદ્ધિ આશ્રમ તેમજ પ્રાકૃતિક ફાર્મની મુલાકાત લઈ મેળવી વિગતવાર માહિતી.
- ‘ભાવ કમલમ’ ખાતે સંગઠનાત્મક બેઠક અને ફરિયાદકા ગામે સરકારી યોજનાઓના લાભાર્થી ખેડૂતો સાથે સંપર્ક કરાશે.
‘ધરતીનો સાદ – કિસાન સંવાદ’ અંતર્ગત ભાવનગર જિલ્લાથી સંગઠનાત્મક પ્રવાસ શરૂ
ભારતીય જનતા પાર્ટી કિસાન મોરચા દ્વારા સમગ્ર રાજ્યમાં ખેડૂતો સાથે જીવંત સંપર્ક સ્થાપિત કરવાના હેતુથી ‘ધરતીનો સાદ – કિસાન સંવાદ’ કાર્યક્રમનું આયોજન કરવામાં આવ્યું છે. આ અભિયાન અંતર્ગત કિસાન મોરચાના ગુજરાત પ્રદેશ અધ્યક્ષ હિરેન હિરપરાના રાજ્યવ્યાપી સંગઠનાત્મક પ્રવાસનો રવિવારે ભાવનગર જિલ્લાથી ભવ્ય પ્રારંભ થયો હતો. પ્રવાસ દરમિયાન પ્રદેશ અધ્યક્ષે ખેડૂતો સાથે સીધો સંવાદ સાધી પ્રાકૃતિક ખેતી, સામાજિક સંસ્થાઓની મુલાકાત તેમજ સંગઠનાત્મક મજબૂતી માટે વિવિધ કાર્યક્રમોમાં હાજરી આપી હતી.
પાલીતાણા અને કુંભણ ખાતે પ્રાકૃતિક ખેતી અંગે જાગૃતિ અને સંવાદ
પાલીતાણા ડેમ ખાતે લોકભારતી સંસ્થાના સહયોગથી યોજાયેલા ‘મન કી બાત – પ્રાકૃતિક કૃષિ કે સાથ’ કાર્યક્રમમાં હિરેન હિરપરાએ ખેડૂતોને સંબોધતાં જણાવ્યું હતું કે, સરકારની કૃષિ યોજનાઓ છેવાડાના ખેડૂતો સુધી પહોંચાડવી અને તેમની સમસ્યાઓ સાંભળવી એ કિસાન મોરચાની પ્રાથમિકતા છે. ત્યારબાદ તેમણે કુંભણ ખાતે મનસુખભાઈ લાઠીયાના પ્રાકૃતિક ફાર્મની મુલાકાત લઈ ખેતીની પદ્ધતિઓ, ઉત્પાદન અને પડકારો અંગે ખેડૂતો સાથે ચર્ચા કરી હતી. આ સિવાય તેમણે રાસાયણિક ખાતરો અને જંતુનાશકોનો વધુ ઉપયોગ કરતા ખેડૂતો સાથે પણ મોરચો સતત સંવાદ સાધશે તેમ ઉમેર્યું હતું.
સામાજિક સંસ્થાની મુલાકાત અને ફરિયાદકા ગામે લાભાર્થી સંવાદ
પ્રવાસ દરમિયાન હિરેન હિરપરાએ કુંભણ ખાતે આવેલ મંદબુદ્ધિ આશ્રમની મુલાકાત લઈને સંસ્થાની સેવાકીય કામગીરીને બિરદાવી હતી. તેમણે ભારપૂર્વક જણાવ્યું હતું કે સમાજના વિશેષ વર્ગની સેવા કરતી સંસ્થાઓને સહયોગ આપવો એ જાહેર જીવનનું અભિન્ન અંગ છે. આ પ્રવાસના ભાગરૂપે ભાવનગર જિલ્લા ભાજપ કાર્યાલય ‘ભાવ કમલમ’ ખાતે કિસાન મોરચાની વિશેષ સંગઠનાત્મક બેઠક યોજાશે, જ્યારે પ્રવાસના અંતિમ તબક્કામાં ફરિયાદકા ગામ ખાતે આવેલ રામજી મંદિરમાં મહાઆરતી કરી સરકારી યોજનાઓના લાભાર્થી ખેડૂતો સાથે સીધો વાર્તાલાપ કરવામાં આવશે.
અહેવાલ: ચેતન રાજપૂત
About the Author
