મુખ્ય હાઇલાઇટ્સ:
- બે વર્ષથી ફરાર આરોપી: અમરેલી સેશન્સ કોર્ટના પોક્સો કેસ અને સેશન્સ કેસના ટાર્ગેટેડ વોરંટનો આરોપી આખરે પોલીસ પકડમાં.
- ભેદી ફરાર: જામીન પર મુક્ત થયા બાદ પોતાની ધરપકડ ટાળવા માટે સતત નાસતો-ફરતો હતો આરોપી, કોર્ટે જારી કર્યું હતું પકડ વોરંટ.
- અંકલેશ્વરમાંથી ધરપકડ: અમરેલી સીટી પોલીસની સર્વેલન્સ ટીમે બાતમીના આધારે ભરૂચના અંકલેશ્વર ઉદ્યોગ નગરમાંથી દબોચ્યો.
- ચુસ્ત કામગીરી: ભાવનગર રેન્જના પોલીસ મહાનિરીક્ષક અને અમરેલી જિલ્લા પોલીસ વડાની સૂચના હેઠળ સર્વેલન્સ ટીમે ઓપરેશન પાર પાડ્યું.
અમરેલી:
અમરેલી જિલ્લા પોલીસ તંત્ર દ્વારા નાસતા-ફરતા ગુનેગારો અને કોર્ટના વોરંટની બજવણી કરવા માટે ચલાવવામાં આવી રહેલી ખાસ ઝુંબેશને વધુ એક મોટી સફળતા મળી છે. ભાવનગર રેન્જના પોલીસ મહાનિરીક્ષક (આઈ.જી.પી.) આર.વી.અસારી અને અમરેલી જિલ્લા પોલીસ અધિક્ષક સંજય ખરાત દ્વારા જિલ્લામાં લાંબા સમયથી ફરાર આરોપીઓને શોધી કાઢવા માટે કડક સૂચના આપવામાં આવી છે. જેના અનુસંધાને અમરેલી વિભાગના ઇન્ચાર્જ નાયબ પોલીસ અધીક્ષક વિસ્મય માનસેતાના સીધા માર્ગદર્શન હેઠળ, અમરેલી સીટી પોલીસની સર્વેલન્સ ટીમે સેશન્સ કોર્ટના પોક્સો કેસના ગંભીર ગુનામાં છેલ્લા બે વર્ષથી નાસતા-ફરતા એક આરોપીને દક્ષિણ ગુજરાતના અંકલેશ્વરમાંથી ઝડપી પાડી કાયદેસરની કાર્યવાહી હાથ ધરી છે.
જામીન પર છૂટ્યા બાદ ધરપકડ ટાળવા નાસતો ફરતો હતો આરોપી
આ ગુનાહિત કેસની વિગતો અનુસાર, મૂળ અમરેલી જિલ્લાના ચાંપાથળ ગામનો વતની અને હાલ મોરબી જિલ્લાના વાંકાનેર ખાતે રહેતો ૨૭ વર્ષીય મહેશ ઉર્ફે મયલો મનસુખભાઇ મકવાણા નામનો શખ્સ અમરેલી સેશન્સ કોર્ટના વર્ષ ૨૦૨૨ના પોક્સો કેસ નંબર ૧૨/૨૦૨૨ તથા સેશન્સ કેસ નંબર ૨૩/૨૦૨૪ ના ગંભીર ગુનામાં સંડોવાયેલો હતો. આ કેસની કાનૂની પ્રક્રિયા દરમિયાન આરોપી જામીન પર મુક્ત થયો હતો. જો કે, જામીન મળ્યા બાદ કોર્ટની શરતોનો અનાદર કરીને પોતાની અંતિમ ધરપકડ ટાળવા માટે તે છેલ્લા બે વર્ષથી સતત નાસતો-ફરતો હતો. આરોપી કોર્ટમાં હાજર ન થતાં નામદાર સેશન્સ કોર્ટ દ્વારા તેની સામે પકડ વોરંટ (ટાર્ગેટેડ વોરંટ) જારી કરવામાં આવ્યું હતું.
ગુપ્ત બાતમીના આધારે અંકલેશ્વર ઔદ્યોગિક વિસ્તારમાં પડી રેડ
નાસતા-ફરતા આરોપીઓને પકડવા માટે અમરેલી સીટી પોલીસ સ્ટેશનના પોલીસ ઇન્સ્પેક્ટર એમ.એમ.ઝાલાની સૂચનાથી સર્વેલન્સ ટીમ સતત ટેકનિકલ સોર્સ અને માનવ બાતમીદારોના સંપર્કમાં હતી. આ દરમિયાન પોલીસ ટીમને ચોક્કસ અને સચોટ બાતમી મળી હતી કે, વોરંટ વાળો આ આરોપી પોતા ઓળખ છુપાવીને ભરૂચ જિલ્લાના અંકલેશ્વર ઔદ્યોગિક વસાહત (જી.આઈ.ડી.સી.) વિસ્તારમાં ડ્રાઇવિંગની આડમાં આશરો લઈ રહ્યો છે. આ બાતમીના આધારે અમરેલી સીટી પોલીસની સર્વેલન્સ ટીમે તાત્કાલિક અંકલેશ્વર ખાતે પહોંચીને વોચ ગોઠવી હતી અને આરોપી મહેશ ઉર્ફે મયલા મકવાણાને સફળતાપૂર્વક ઝડપી પાડ્યો હતો.
સર્વેલન્સ ટીમની પ્રશંસનીય કાનૂની કાર્યવાહી
પોલીસે અંકલેશ્વર ખાતેથી આરોપીને હસ્તગત કરીને કાયદેસરના પકડ વોરંટની બજવણી કરી ધોરણસરની જેલ ભેગા કરવાની કાર્યવાહી હાથ ધરી છે. આ પ્રશંસનીય અને સફળ ઓપરેશનને પાર પાડવામાં અમરેલી સીટી પોલીસ સ્ટેશનની સર્વેલન્સ ટીમના હેડ કોન્સ્ટેબલ વરજાંગભાઈ રામાઆતા મુળીયાસીયા, પોલીસ કોન્સ્ટેબલ ધવલભાઇ દિલીપભાઈ મકવાણા, સોયેબભાઈ ઓસમાણભાઈ જુણેજા તથા વિશ્વદિપસીંહ ધર્મેન્દ્રસીંહ રાણા સહિતના જવાનોએ રાત-દિવસ જોયા વગર મહત્વની અને પ્રશંસનીય ભૂમિકા ભજવી છે.
અહેવાલ ભાવેશ વાઘેલા અમરેલી
About the Author
