મુખ્ય હાઇલાઇટ્સ:
- અમરેલી એસપી સંજય ખરાતના આદેશથી ધારીની ‘મોનાલીસા ગ્રાફિક્સ’ નામની દુકાન પર ટ્રાફિક શાખાએ પાડ્યા દરોડા.
- સોશિયલ મીડિયા પર ગેરકાયદેસર ફેન્સી નંબર પ્લેટ બનાવવાની જાહેરાત પોઇન્ટ આઉટ થતાં પોલીસે લીધા આકરા પગલાં.
- ફેન્સી નંબર પ્લેટ બનાવતા વેપારીઓ અને વાપરતા વાહનચાલકો સામે કડક કાનૂની કાર્યવાહીની એસપીની સ્પષ્ટ ચેતવણી.
- માત્ર સરકાર માન્ય હાઇ સેક્યુરિટી રજીસ્ટ્રેશન પ્લેટ (એચએસઆરપી) નો જ ઉપયોગ કરવા જિલ્લા પોલીસ તંત્રની અપીલ.
સોશિયલ મીડિયા પર ફેન્સી નંબર પ્લેટની જાહેરાત મળતાં પોલીસ એક્શનમાં
અમરેલી જિલ્લામાં ટ્રાફિક નિયમોનું કડક પાલન કરાવવા અને ગુનાખોરી પર સંપૂર્ણ લગામ કસવા માટે જિલ્લા પોલીસ વડા દ્વારા વિશેષ ઝુંબેશ ચલાવવામાં આવી રહી છે. ધારી શહેરમાં સોશિયલ મીડિયા પ્લેટફોર્મ પર ગેરકાયદેસર ફેન્સી નંબર પ્લેટ બનાવી આપવાની જાહેરાત કરનાર દુકાનદાર સામે અમરેલી જિલ્લા પોલીસે લાલ આંખ કરીને ત્વરિત કાનૂની કાર્યવાહી હાથ ધરી છે. ધારી ખાતે કાર્યરત ‘મોનાલીસા ગ્રાફિક્સ’ નામની પેઢી દ્વારા સોશિયલ મીડિયા પર “અહીં વાહનો માટે ફેન્સી નંબર પ્લેટ બનાવી આપવામા આવશે” તેવી જાહેર પોસ્ટ મૂકીને પ્રચાર કરવામાં આવી રહ્યો હતો, જે સોશિયલ મીડિયા મોનિટરિંગ દરમિયાન જિલ્લા પોલીસ અધિક્ષક (એસપી) સંજય ખરાતના સીધા ધ્યાને આવી હતી.
ટ્રાફિક શાખાના દરોડા; દુકાનદારને આકરી કાનૂની તાકીદ
મામલાની ગંભીરતાને ધ્યાને લઈને જિલ્લા પોલીસ વડાના આદેશથી જિલ્લા ટ્રાફિક શાખાના પીએસઆઈ બરવાળીયા તેમજ તેમની ટીમે તાબડતોબ ધારી સ્થિત ‘મોનાલીસા ગ્રાફિક્સ’ની દુકાન પર પહોંચીને સઘન તપાસ હાથ ધરી હતી. પોલીસે દુકાન સંચાલકની આકરી પૂછપરછ કરીને સોશિયલ મીડિયા પરથી આ ગેરકાયદેસર જાહેરાત તાત્કાલિક હટાવવા સૂચના આપી હતી. આ સાથે જ પોલીસે સ્પષ્ટ શબ્દોમાં તાકીદ કરી હતી કે ફેન્સી કે વિચિત્ર ફોન્ટવાળી નંબર પ્લેટો લગાવીને અસામાજિક તત્વો ગુના આચરીને સહેલાઈથી નાસી છૂટતા હોય છે, જેથી આવી પ્લેટો બનાવવી એ પરોક્ષ રીતે ગુનેગારોને મદદ કરવા સમાન ગંભીર અપરાધ છે.
કાયદાનું ઉલ્લંઘન કરનાર સામે ફોજદારી કાર્યવાહીની ચેતવણી
મોટર વ્હીકલ એક્ટ અને આરટીઓ નિયમો હેઠળ સરકારી માન્યતા વગરની ફેન્સી નંબર પ્લેટ બનાવવી, વેચવી કે વાહન પર લગાડવી એ સંપૂર્ણપણે ગેરકાયદેસર અને શિક્ષાપાત્ર અપરાધ છે. આ અંગે અમરેલી જિલ્લા પોલીસ અધિક્ષક સંજય ખરાતે સ્પષ્ટ સંદેશ આપતાં જણાવ્યું છે કે જિલ્લાના તમામ નંબર પ્લેટ બનાવતા વેપારીઓએ નિયમ વિરુદ્ધની ફેન્સી પ્લેટો બનાવવાથી સદંતર દૂર રહેવું અને વાહનચાલકોએ પણ માત્ર સરકાર માન્ય એચએસઆરપી નંબર પ્લેટનો જ ઉપયોગ કરવો. હવે પછી જો કોઈ વેપારી કે વાહનચાલક કાયદાનું ઉલ્લંઘન કરતો જણાશે તો તેની સામે જરાય ઢીલ મૂક્યા વિના સીધી ફોજદારી કાર્યવાહી હાથ ધરવામાં આવશે.
અહેવાલ: ભાવેશ વાઘેલા (અમરેલી)
About the Author
