ગુજરાતના વાહનચાલકો અને મધ્યમ વર્ગના પરિવારો માટે મોંઘવારીના વધુ એક ખૂબ જ માઠા સમાચાર સામે આવ્યા છે. પેટ્રોલ અને ડીઝલના ભાવવધારાની સહી હજુ સુકાઈ નથી, ત્યાં જ અદાણી ટોટલ ગેસ (Adani Total Gas) દ્વારા કમ્પ્રેસ્ડ નેચરલ ગેસ (CNG) ના ભાવમાં પ્રતિ કિલો ₹૨.૨૪ નો તોતિંગ વધારો ઝીંકી દેવામાં આવ્યો છે. આ નવો ભાવવધારો આજ રોજ ૧૬મી મેથી જ અમલમાં આવી જતાં સવારથી જ સીએનજી પંપ પર ગ્રાહકોના ખિસ્સા હળવા થવા લાગ્યા છે. આ નિર્ણયને પગલે સામાન્ય જનતામાં છૂપો રોષ જોવા મળી રહ્યો છે.
દોઢ મહિનામાં જનતા પર બેવડો વાર: તાજા વધારા બાદ હવે ગુજરાતમાં અદાણી સીએનજીનો ભાવ પ્રતિ કિલો ₹૮૬.૧૦ ના ઐતિહાસિક સ્તરે પહોંચી ગયો છે. ઉલ્લેખનીય છે કે, અદાણી ગેસ દ્વારા ગ્રાહકોને ટૂંકા ગાળામાં જ મોંઘવારીનો આ બીજો મોટો ઝટકો આપવામાં આવ્યો છે. આ પૂર્વે ગત ૪થી એપ્રિલના રોજ પણ પ્રતિ કિલો ₹૧.૫૦ નો વધારો કરવામાં આવ્યો હતો. એટલે કે છેલ્લા માત્ર દોઢ મહિનાના ટૂંકા ગાળામાં જ સીએનજીના ભાવમાં કુલ ₹૩.૭૪ જેટલો તોતિંગ વધારો થઈ ચૂક્યો છે. જે મધ્યમ વર્ગના પરિવારો પેટ્રોલ અને ડીઝલના મોંઘા દાટ ભાવોથી કંટાળીને બચતની આશાએ સીએનજી કાર તરફ વળ્યા હતા, તેઓ હવે છેતરાયા હોવાની લાગણી અનુભવી રહ્યા છે.
રિક્ષા ચાલકો અને વાલીઓ પર સીધી અસર: આ ભાવવધારાની સૌથી કમરતોડ અસર રોજિંદી કમાણી કરીને ગુજરાન ચલાવતા ઓટો-રિક્ષા અને ટેક્સી ચાલકો પર પડશે. ઈંધણ મોંઘું થવાથી તેમની રોકાણ સામેની નેટ આવકમાં મોટો કાપ મુકાશે, જેના લીધે હવે શહેરોમાં રિક્ષા ભાડા વધે તેવી પૂરેપૂરી શક્યતા છે. આ ઉપરાંત, વેકેશન ખુલતાની સાથે જ શૈક્ષણિક સત્ર શરૂ થવાનું છે ત્યારે સીએનજીના આ આકરા ઝટકાને કારણે સ્કૂલ વાન અને શટલ રિક્ષાઓના ભાડામાં પણ તોતિંગ વધારો થવાની દહેશત સેવાઈ રહી છે, જેનો સીધો બોજ વાલીઓના ખિસ્સા પર આવશે.
મધ્યમ વર્ગનું બજેટ વેરવિખેર: રોજિંદા ધંધા કે નોકરી-વ્યવસાય માટે પોતાના ખાનગી સીએનજી વાહનો લઈને અપ-ડાઉન કરતા મધ્યમ વર્ગના લોકોનું માસિક બજેટ આનાથી સંપૂર્ણપણે ખોરવાઈ જશે. એકતરફ ઉનાળાની કાળઝાળ ગરમી વચ્ચે ઘરના લાઈટ બિલ અને અન્ય ખર્ચાઓ આસમાને છે, ત્યારે બીજી તરફ ઈંધણની આ લૂંટ સામાન્ય પ્રજાની કમર તોડી રહી છે. ગ્રાહકો અને વિવિધ સંગઠનો હવે સરકાર પાસે ટેક્સના માળખામાં ફેરફાર કરી અદાણી જેવી ખાનગી કંપનીઓના મનસ્વી ભાવવધારા પર અંકુશ લાવવાની માંગ કરી રહ્યા છે.
About the Author
