મુખ્ય હાઇલાઇટ્સ:
- ધારી પોલીસ સ્ટેશન વિસ્તારમાંથી સગીરાનું અપહરણ કરી ૪ માસથી નાસતા ફરતા આરોપીને પકડી પાડતી અમરેલી પેરોલ ફર્લો સ્ક્વોર્ડ.
- ગીર ગઢડા તાલુકાના સમઢીયાળાના ૨૨ વર્ષીય આરોપી અશ્વિન વાઘેલાને બગસરાના સમઢીયાળા ખાતેથી ભોગબનનાર સાથે હસ્તગત કરાયો.
- નાસતા ફરતા આરોપી સામે નામદાર કોર્ટ દ્વારા વોરંટ પણ ઇશ્યુ કરવામાં આવ્યું હતું.
- પેરોલ ફર્લો સ્ક્વોર્ડે આરોપી અને ભોગબનનારને આગળની કાયદેસરની કાર્યવાહી અર્થે ધારી પોલીસ મથકે સોંપ્યા.
ભાવનગર આઈજી અને અમરેલી એસપીની સૂચનાથી નાસતા ફરતા આરોપીઓ સામે ઝુંબેશ
ભાવનગર વિભાગના પોલીસ મહાનિરીક્ષક આર. વી. અસારી દ્વારા રેન્જના જિલ્લાઓમાં બનતા ગુનાઓના કામે નાસતા ફરતા આરોપીઓ તથા કેદીઓને શોધી કાઢવા ખાસ સૂચના આપવામાં આવી હતી. જેને અનુસરીને અમરેલી જિલ્લા પોલીસ અધિક્ષક સંજય ખરાત દ્વારા નાસતા ફરતા ગુનેગારોને પકડી પાડવા માટે ખાસ માર્ગદર્શન અને સૂચનાઓ આપવામાં આવી હતી. આ માર્ગદર્શન હેઠળ એલસીબી પીઆઈ સી. પી. વાઘેલાના નેતૃત્વમાં અને પેરોલ ફર્લો સ્ક્વોર્ડના પીએસઆઈ એન. જી. સાપરાના સુપરવિઝન હેઠળ પેરોલ ફર્લો ટીમ સઘન તપાસમાં કાર્યરત હતી.
હ્યુમન ઇન્ટેલિજન્સ અને ટેકનિકલ સોર્સથી સચોટ બાતમી આધારે દરોડો
તપાસ દરમિયાન પેરોલ ફર્લો ટીમને હ્યુમન ઇન્ટેલિજન્સ અને ટેકનિકલ સોર્સ મારફતે ચોક્કસ બાતમી મળી હતી કે, ધારી પોલીસ સ્ટેશનમાં નોંધાયેલા ભારતીય ન્યાય સંહિતાની કલમો અને પોક્સો એક્ટ મુજબના અપહરણના ગુનામાં છેલ્લા ચાર માસથી નાસતો ફરતો આરોપી અશ્વિન ભીખાભાઈ વાઘેલા (ઉંમર વર્ષ ૨૨, મૂળ રહે. સમઢીયાળા, તા. ગીર ગઢડા, જી. ગીર સોમનાથ) ભોગબનનાર સગીરા સાથે હાલ બગસરા તાલુકાના સમઢીયાળા ગામે છુપાયેલો છે. બાતમી મળતાં જ પેરોલ સ્ક્વોર્ડની ટીમે તાત્કાલિક સ્થળ પર પહોંચી ૨૧ ઓક્ટોબર ૨૦૨૬ ના રોજ આરોપીને ભોગબનનાર સાથે ઝડપી પાડ્યો હતો.
૪ માસ પહેલાં લલચાવી ફોસલાવી ભગાડી ગયો હતો; કોર્ટે ઇશ્યુ કર્યું હતું વોરંટ
ઘટનાની વિગત મુજબ, આશરે ચાર માસ પહેલાં આરોપી અશ્વિન વાઘેલા ભોગબનનાર સગીરાને વાલીપણામાંથી લલચાવી ફોસલાવી ભગાડી ગયો હતો અને બદકામ કરવાના ઇરાદે અપહરણ કરી પોતાની સાથે રાખતો હતો. આ મામલે ધારી પોલીસ સ્ટેશનમાં ગુનો નોંધાયા બાદ આરોપી સતત નાસતો ફરતો હતો. નામદાર કોર્ટ દ્વારા પણ આરોપી વિરૂદ્ધ કાયદાકીય વોરંટ ઇશ્યુ કરવામાં આવ્યું હતું. પેરોલ ફર્લો સ્ક્વોર્ડે આરોપી અને ભોગબનનાર બંનેને કબજે લઈ આગળની તપાસ અને કાયદેસરની કાર્યવાહી અર્થે ધારી પોલીસ સ્ટેશનને સોંપવાની કામગીરી હાથ ધરી છે. આ કામગીરીમાં એલસીબી પીઆઈ સી. પી. વાઘેલા, પીએસઆઈ એન. જી. સાપરા, એએસઆઈ કે. જે. બેરા, જી. એમ. નગવાડીયા, મહિલા હેડ કોન્સ્ટેબલ ભાવનાબેન ચૌહાણ, મહિલા કોન્સ્ટેબલ ધરતીબેન લીંબાસીયા, આઈટી એક્સપર્ટ ધારાબેન ઠક્કર તથા ડ્રાઈવર અશ્વિનભાઈ ચાવડા રોકાયેલા હતા.
અહેવાલ ભાવેશ વાઘેલા અમરેલી
About the Author
