મુખ્ય હાઇલાઇટ્સ:
- એકતા નગર ખાતે દેશ-વિદેશના સૈલાનીઓ માટે ૬૦૦ પ્રવાસી ક્ષમતા ધરાવતી ભવ્ય ક્રૂઝનું સફળ લોન્ચિંગ.
- તમામ જરૂરી સુરક્ષા ધોરણો અને સરકારી વિભાગોની મંજૂરી બાદ ટૂંક સમયમાં જાહેર જનતા માટે શરૂ થશે સેવા.
- ૨૫૦ લોકો માટે ડાઇનિંગ, વિશાળ સ્ટેજ અને આકર્ષક ડેકોરેટિવ લાઇટિંગ જેવી આધુનિક સુવિધાઓથી સજ્જ.
- બર્થડે પાર્ટી, કોર્પોરેટ ઇવેન્ટ્સ અને સાંસ્કૃતિક કાર્યક્રમો માટે નવું આકર્ષણ, સ્થાનિક રોજગારીને પણ મળશે વેગ.
નર્મદાના નીરમાં વહેશે પ્રવાસનનું નવું આકર્ષણ
વિશ્વની સૌથી ઊંચી પ્રતિમા ‘સ્ટેચ્યૂ ઓફ યુનિટી’ (એકતા નગર) ખાતે આવતા દેશ-વિદેશના પ્રવાસીઓ માટે વધુ એક ભવ્ય નજરાણું ઉમેરાયું છે. સ્ટેચ્યૂ ઓફ યુનિટી ખાતે પર્યટન ક્ષેત્રને નવી ઊંચાઈઓ પર લઈ જવાના હેતુથી નર્મદા નદીના જળ વિસ્તારમાં ૬૦૦ પ્રવાસીઓની ક્ષમતા ધરાવતી અત્યાધુનિક અને ભવ્ય ક્રૂઝનું સફળતાપૂર્વક લોન્ચિંગ કરવામાં આવ્યું છે. આ નવી ક્રૂઝ સર્વિસ શરૂ થવાથી એકતા નગર આવતા પ્રવાસીઓ માટે નર્મદા નદીમાં સફર કરવાનો એક અદ્ભુત અને રોમાંચક અનુભવ ઉમેરાશે.
અત્યાધુનિક સુવિધાઓથી સજ્જ અને સુરક્ષાના તમામ માપદંડો પૂર્ણ
આ નવરચિત ભવ્ય ક્રૂઝમાં પ્રવાસીઓની સુવિધા માટે વિશેષ આયોજન કરવામાં આવ્યું છે. જેમાં એકસાથે ૨૫૦ લોકો બેસીને ભોજન માણી શકે તેવું વિશાળ ડાઇનિંગ એરિયા, મોટો સ્ટેજ અને રાત્રિના સમયે આકર્ષક ડેકોરેટિવ લાઇટિંગ સહિતની સુવિધાઓ ઉપલબ્ધ કરાવવામાં આવી છે. આ ક્રૂઝને પ્રવાસીઓ માટે ખુલ્લી મુકતા પહેલાં તમામ જરૂરી સુરક્ષા ધોરણોની ચકાસણી કરવામાં આવી છે અને સંબંધિત સરકારી વિભાગોની પૂર્વ મંજૂરી મેળવી લેવાઈ છે. આ તમામ પ્રક્રિયા પૂર્ણ થતાં જ ટૂંક સમયમાં આ સેવા પ્રવાસીઓ માટે વિધિવત રીતે શરૂ કરી દેવામાં આવશે.
રોજગારી અને ઇવેન્ટ ટૂરિઝમને મળશે મોટો વેગ
આ ભવ્ય ક્રૂઝ માત્ર પર્યટન પૂરતી સીમિત નહીં રહે પરંતુ ઇવેન્ટ ટૂરિઝમ માટે પણ એક મહત્વનું કેન્દ્ર બનશે. અહીં પ્રવાસીઓ માટે પર્યટનની સાથે જન્મદિવસની ઉજવણી, કોર્પોરેટ ઇવેન્ટ્સ, બિઝનેસ મિટિંગ્સ અને વિવિધ સાંસ્કૃતિક કાર્યક્રમોના આયોજન માટે એક નવું અને આકર્ષક સ્થળ ઉપલબ્ધ બનશે. આ પ્રોજેક્ટના કારણે એકતા નગર અને આસપાસના વિસ્તારોમાં પ્રવાસન ઉદ્યોગનો વિકાસ થશે, જેનાથી સ્થાનિક કક્ષાએ રોજગારીની નવી તકો પણ ઊભી થશે.
અહેવાલ: ફારૂક બિલખિયા
About the Author
