મુખ્ય હાઇલાઇટ્સ:
- વડાપ્રધાન નરેન્દ્ર મોદીની ૮મી સપ્ટેમ્બરની મુલાકાત અગાઉ વડોદરા મ્યુનિસિપલ કોર્પોરેશન દ્વારા હાથ ધરાયું મોટું મહાઅભિયાન.
- ‘સ્વચ્છતા સે સ્વાગત’ ઝુંબેશ હેઠળ ૧ થી ૪ સપ્ટેમ્બર દરમિયાન શહેરના તમામ ૧૯ વોર્ડ, ઐતિહાસિક વાવ, આંગણવાડીઓ અને હેલ્થ સેન્ટરોની કરાઈ સફાઈ.
- જેસીબી, મિકેનિકલ સ્વીપર્સ અને ઈ-વાહનો સહિત ૩૦૦ થી વધુ આધુનિક મશીનોની મદદથી ૧૪૦ કિલોમીટરથી વધુનો વિસ્તાર સફાઈ હેઠળ આવરી લેવાયો.
- પર્યાવરણ જાગૃતિ માટે સફાઈ અભિયાનની સાથોસાથ હજારો છોડનું વાવેતર અને નિઃશુલ્ક વિતરણ કરવામાં આવ્યું.
વડાપ્રધાનના પ્રવાસ પૂર્વે સંસ્કારી નગરીમાં ‘સ્વચ્છતા સે સ્વાગત’ અભિયાન
વડાપ્રધાન નરેન્દ્ર મોદી આગામી ૮મી સપ્ટેમ્બરે વડોદરાની મુલાકાતે આવી રહ્યા છે, જ્યાં તેઓ રાજ્ય માટે રૂ. ૩૫,૨૦૦ કરોડના વિવિધ વિકાસ પ્રકલ્પોનું ઉદ્ઘાટન અને ખાતમુહૂર્ત કરશે તેમજ ‘નમો ૪ વિકસિત ભારત’ કાર્યક્રમને સંબોધિત કરશે. આ ભવ્ય પ્રવાસ પૂર્વે વડોદરા મ્યુનિસિપલ કોર્પોરેશન દ્વારા સમગ્ર શહેરમાં ‘સ્વચ્છતા સે સ્વાગત’ અભિયાન હેઠળ વ્યાપક સફાઈ અને પર્યાવરણ ઝુંબેશ હાથ ધરવામાં આવી હતી. ૧ થી ૪ સપ્ટેમ્બર દરમિયાન ચાલેલા આ વિશેષ મહાઅભિયાનમાં હજારો સ્થાનિક રહીશો, સફાઈ કર્મચારીઓ, સરકારી અધિકારીઓ, લોકપ્રતિનિધિઓ તેમજ વિવિધ શૈક્ષણિક અને સામાજિક સંસ્થાઓના સ્વયંસેવકો ઉત્સાહભેર જોડાયા હતા.
તળાવો, આંગણવાડીઓ અને હેલ્થ સેન્ટરોની હાથ ધરાઈ ઝીણવટભરી સફાઈ
અભિયાનના પ્રારંભિક તબક્કામાં ૧ સપ્ટેમ્બરે કમલાનગર તળાવ અને તેની આસપાસના વિસ્તારોમાં ૧૬,૦૦૦ થી વધુ નાગરિકોએ સફાઈ કરી હતી, જ્યારે શહેરના તમામ ૧૯ વોર્ડમાં ૨૪,૦૦૦ થી વધુ લોકો આ પ્રવૃત્તિમાં જોડાયા હતા. બીજા દિવસે આ સફાઈ ઝુંબેશને વિસ્તારીને ૩૦ આંગણવાડી કેન્દ્રો અને ૭૮ સરકારી તથા ૨૩ ખાનગી મળી કુલ ૧૦૧ અર્બન પ્રાઇમરી હેલ્થ સેન્ટર્સ સુધી પહોંચાડવામાં આવી હતી. જ્યાં ૨૭,૦૦૦ થી વધુ નાગરિકો અને પાલિકાના કર્મચારીઓએ શ્રમદાન કરીને પરિસરને સ્વચ્છ બનાવ્યું હતું અને આશરે ૨,૪૦૦ જેટલા છોડનું વાવેતર કર્યું હતું.
ઐતિહાસિક વારસાના સ્થળો અને કાવડ યાત્રા રૂટનું નવીનીકરણ
શહેરના સાંસ્કૃતિક વારસાને જાળવવા માટે ૩ સપ્ટેમ્બરે પ્રખ્યાત કરોડિયા વાવ અને તેની આસપાસના ૪૭ કિલોમીટરના વિસ્તારમાં ૨૫,૦૦૦ થી વધુ લોકોની મદદથી સફાઈ હાથ ધરવામાં આવી હતી. ત્યારબાદ ૪ સપ્ટેમ્બરે કુદરતી સ્થળો જેવા કે ગોત્રી તળાવ અને બગીચા તેમજ આશરે ૮૦ કિલોમીટર લાંબા કાવડ યાત્રાના રૂટ પર ૧૨,૦૦૦ થી વધુ લોકોએ સફાઈ કરી હતી. આ કામગીરી માટે મિકેનિકલ સ્વીપર્સ, જેસીબી અને ડમ્પર્સ સહિત ૩૮૦ થી વધુ વાહનો અને મશીનો તૈનાત કરવામાં આવ્યા હતા. આ અભિયાન દ્વારા પાલિકાએ જાહેર સ્થળોની સફાઈ સાથે નાગરિકોમાં પર્યાવરણ અને વારસાની જાળવણી પ્રત્યે જાગૃતિ ફેલાવવાનો સફળ પ્રયાસ કર્યો છે.
અહેવાલ: ચેતન રાજપૂત
About the Author
