મુખ્ય હાઇલાઇટ્સ:
- તંત્રનું ઉદાસીન વલણ: દસ્ક્રોઈ તાલુકાના અનેક ગામોમાં બુધવારે મોડી રાત્રે પડેલા સામાન્ય વરસાદમાં જ જળબંબાકારની સ્થિતિ.
- ગામડાઓ પ્રભાવિત: ધામતવાણ, હરણિયાવ, ચોસર, ગામડી અને ગતરાળ ગામના નીચાણવાળા વિસ્તારોમાં ભરાયા પાણી.
- બેદરકારી આવી સામે: ચોમાસા પૂર્વે કરવાની થતી ગટરો અને વરસાદી લાઇનોની સફાઈ ન થઈ હોવાનો ગ્રામજનોનો આક્ષેપ.
- સ્થાનિકોની માંગ: રસ્તાઓ બ્લોક થતાં જનજીવન પ્રભાવિત, ગ્રામજનોએ જવાબદાર વહીવટી તંત્ર સામે આક્રોશ ઠાલવી તાકીદે નિકાલની માંગ કરી.
સામાન્ય વરસાદમાં જ રસ્તાઓ બન્યા બેટ
અમદાવાદ જિલ્લાના દસ્ક્રોઈ તાલુકામાં ચોમાસાની શરૂઆતના પ્રથમ વરસાદે જ સ્થાનિક વહીવટી તંત્રની કામગીરીના ધજાગરા ઉડાડી દીધા છે. તાલુકાના ધામતવાણ, હરણિયાવ, ચોસર, ગામડી, ગતરાળ સહિતના ગ્રામ્ય વિસ્તારોમાં બુધવારે મોડી રાત્રે ધીમી ધારે સામાન્ય વરસાદ નોંધાયો હતો. જો કે, આ સામાન્ય વરસાદી ઝાપટામાં જ ગામના અનેક મુખ્ય માર્ગો અને રહેણાંક વિસ્તારોમાં ઘૂંટણસમા પાણી ભરાઈ જવાની ગંભીર સ્થિતિ સર્જાઈ હતી, જેના કારણે સ્થાનિક જનજીવન પ્રભાવિત થયું છે.
વરસાદી પાણીના નિકાલની વ્યવસ્થા ઠપ્પ
સ્થાનિક વિસ્તારોમાંથી વરસાદી પાણીના યોગ્ય નિકાલ માટે કોઈ આગોતરી વ્યવસ્થા ન હોવાના કારણે પાણી લાંબો સમય સુધી રસ્તાઓ અને નીચાણવાળા પ્લોટોમાં એકત્ર થઈ ગયું હતું. આના પરિણામે વહેલી સવારે નોકરી-ધંધે જતા લોકોને તેમજ પશુપાલકોને અવરજવર કરવામાં ભારે મુશ્કેલીઓનો સામનો કરવો પડયો હતો. સરકારી તંત્ર દ્વારા કાગળ પર કરાતા મોટા-મોટા દાવાઓ પ્રથમ વરસાદમાં જ ધોવાઈ ગયા હોય તેવો ઘાટ સર્જાયો છે.
પંચાયતો દ્વારા સફાઈ કામગીરીમાં વેઠ ઉતારાઈ હોવાનો આક્ષેપ
ગ્રામજનોએ રોષે ભરાઈને જણાવ્યું હતું કે, સ્થાનિક ગ્રામ પંચાયતો અને તાલુકા પંચાયતના જવાબદાર અધિકારીઓ દ્વારા ચોમાસું શરૂ થાય તે પહેલાં કરવાનું થતું જરૂરી આયોજન માત્ર કાગળ પર જ રહ્યું છે. વરસાદ પહેલાં જે અતિ મહત્વની ગણાતી વરસાદી ચેનલો, કાંસા અને ગટરોની ઊંડી સફાઈ કરવાની હોય છે, તે બિલકુલ કરવામાં આવી નહોતી. તંત્રની આ ઘોર બેદરકારી અને આળસના કારણે જ વહેલી સવારે આખો પંથક મુશ્કેલીમાં મુકાયો છે.
તાત્કાલિક નિકાલ માટે ગ્રામજનોની ઉગ્ર માંગ
પ્રથમ વરસાદમાં જ જે પ્રકારે ગામના રસ્તાઓ પાણીમાં ડૂબી ગયા છે, તેને જોતા આગામી દિવસોમાં જ્યારે ભારે વરસાદ ખાબકશે ત્યારે ગામડાઓની સ્થિતિ કેવી વણસશે તેને લઈને સ્થાનિકોમાં ભારે ચિંતા વ્યાપી ગઈ છે. ગ્રામજનોએ એકઠા થઈને જવાબદાર વહીવટી તંત્ર અને પંચાયતના હોદ્દેદારો સામે પોતાનો ભારે આક્રોશ વ્યક્ત કર્યો છે. લોકોએ માગ કરી છે કે કચેરીમાં બેઠેલા બાબુઓ એસી કેબિનમાંથી બહાર નીકળે અને ગામમાં ભરાયેલા પાણીના નિકાલની તાત્કાલિક યોગ્ય વ્યવસ્થા કરે તેમજ ભવિષ્ય માટે સફાઈ કામગીરી યુદ્ધના ધોરણે શરૂ કરાવે.
ગાંધીનગર પ્રવાસી પત્રકાર રાજેશ પરીખ
About the Author
