મુખ્ય હાઇલાઇટ્સ:
- રાજુલા ટાઉન વિસ્તારમાં સોના-ચાંદીના કારીગરના ખિસ્સામાંથી ૨.૧૦ લાખની કિંમતની સોનાની ૨ બુટી ભરેલું બોક્સ પડી ગયું હતું.
- ભાવનગર રેન્જ આઈજી આર.વી. અસારી અને અમરેલી એસપી સંજય ખરાતના માર્ગદર્શન હેઠળ ‘તેરા તુજકો અર્પણ’ કાર્યક્રમ અંતર્ગત પોલીસે હાથ ધરી તપાસ.
- સીસીટીવી ફુટેજ અને હ્યુમન સોર્સની મદદથી ગ્રામ્ય વિસ્તારમાંથી ભિક્ષુક મહિલા પાસેથી દાગીના શોધી કાઢવામાં આવ્યા.
- તમામ કાનૂની ખરાઈ કરીને પોલીસે સોનાની બુટી મૂળ માલિકને પરત સોંપી ‘પોલીસ પ્રજાનો મિત્ર છે’ સૂત્ર સાર્થક કર્યું.
વેપારીને ડિલિવરી આપવા જતા સમયે ખોવાયું હતું ૨.૧૦ લાખનું બોક્સ
ભાવનગર રેન્જ આઈજી આર.વી. અસારી અને અમરેલી પોલીસ અધિક્ષક સંજય ખરાત દ્વારા જિલ્લામાં ગુમ થયેલ કે ખોવાયેલ મિલકત શોધીને મૂળ માલિકને પરત કરવા માટે ‘તેરા તુજકો અર્પણ’ અભિયાન ચલાવવામાં આવી રહ્યું છે. તે અંતર્ગત રાજુલાના વોરાવાડ વિસ્તારમાં રહેતા અને સોના-ચાંદીનું મજૂરી કામ કરતા અજીજભાઈ સિરાજભાઈ મલ્લીક એક વેપારીનો ઓર્ડર પૂરો કરીને ૨.૧૦ લાખ રૂપિયાની કિંમતની સોનાની ૨ બુટી ડિલિવરી કરવા જઈ રહ્યા હતા. આ દરમિયાન તેમના ખિસ્સામાંથી સોનાની બુટી ભરેલું નાનું બોક્સ ક્યાંક પડી ગયું હતું. ઘણી શોધખોળ બાદ પણ બોક્સ ન મળતાં અજીજભાઈએ આકુળ-વ્યાકુળ થઈ રાજુલા પોલીસનો સંપર્ક કરી મદદ માગી હતી.
સીસીટીવી ફુટેજ અને હ્યુમન સોર્સથી તપાસનો ધમધમાટ
ગંભીરતાને ધ્યાને લઈને રાજુલા ડિવિઝનના નાયબ પોલીસ અધિક્ષક નયના ગોરડિયા તથા પોલીસ ઇન્સ્પેક્ટર વી.એમ. કોલાદરાની સૂચના હેઠળ રાજુલા પોલીસ સ્ટાફે તાત્કાલિક વિસ્તારના સીસીટીવી કેમેરા ચકાસવાનું શરૂ કર્યું હતું. ટાઉન બીટ ઇન્ચાર્જ બી.એમ. વાળા, પોલીસ કોન્સ્ટેબલ અમિતભાઈ મકવાણા અને ટીમે અલગ-અલગ જગ્યાના સીસીટીવી ફુટેજ ચકાસતા અને સ્થાનિક પૂછપરછ કરતા એક અજાણી ભિક્ષુક મહિલા રસ્તા પરથી બોક્સ ઊંચકતી જોવા મળી હતી.
ગ્રામ્ય વિસ્તારમાંથી ભિક્ષુક મહિલાને શોધી દાગીના રિકવર કરાયા
પોલીસે હ્યુમન સોર્સનો ઉપયોગ કરી તપાસ લંબાવતા માલૂમ પડ્યું હતું કે આ મહિલા રાજુલામાં પહેલીવાર આવી હતી. પોલીસે મહેનત કરીને આ મહિલાને રાજુલાના ગ્રામ્ય વિસ્તારમાંથી શોધી કાઢી હતી. પૂછપરછ દરમિયાન મહિલાએ સ્વીકાર્યું હતું કે તેને રસ્તામાંથી આ બોક્સ મળ્યું હતું, પરંતુ તેમાં રહેલી બુટી સાચી છે કે ખોટી તેની તેને જાણ નહોતી. પોલીસે બોક્સ કબજે કરી અજીજભાઈની સોનાની બુટી હોવાની પૂરેપૂરી ખરાઈ કરી હતી.
મૂળ માલિકને દાગીના પરત સોંપાતાં ભાવુક દ્રશ્યો સર્જાયા
પોલીસે ૨.૧૦ લાખ રૂપિયાની સોનાની ૨ બુટી અજીજભાઈને વિધિવત પરત સોંપીને ‘તેરા તુજકો અર્પણ’ સૂત્રને સાર્થક કર્યું હતું. પોતાની રોજીરોટી અને કમાણીના નાણાં ડૂબતાં બચી જતાં અજીજભાઈએ રાજુલા પોલીસનો હૃદયપૂર્વક આભાર માન્યો હતો. આ સફળ કામગીરી પીઆઈ વી.એમ. કોલાદરાના માર્ગદર્શન હેઠળ ભરતભાઈ મુહાભાઈ વાળા, હેડ કોન્સ્ટેબલ સુરજભાઈ બાંભણિયા, પ્રકાશભાઈ બાબરીયા, અમિતભાઈ મકવાણા અને શંભુભાઈ વાઘેલા દ્વારા કરવામાં આવી હતી.
અહેવાલ ભાવેશ વાઘેલા અમરેલી
About the Author
