મુખ્ય હાઇલાઇટ્સ:
- જનહિતના પ્રશ્નોને વાચા આપતા કલમવીર અને સામાજિક અગ્રણી રફીકભાઈ ચૌહાણની પ્રદેશ કક્ષાના સંગઠનમાં નિમણૂક.
- અખિલ ગુજરાત સિપાહી સમાજના પ્રમુખ અલ્હાજ અ. રશીદભાઈ કાઝી દ્વારા સત્તાવાર પત્ર એનાયત કરાયો.
- શિક્ષણ, વેપાર-રોજગાર અને યુવા સંગઠનને મજબૂત કરવા રફીકભાઈ ચૌહાણે દર્શાવી દ્રઢ કટિબદ્ધતા.
- પત્રકાર આલમ, સામાજિક સંગઠનો અને શુભેચ્છકો દ્વારા રાજ્યકક્ષાના વરેલા યુવા નેતા પર અભિનંદનનો વર્ષાવ.
રાજ્ય કક્ષાના મોભાદાર સંગઠનમાં અમરેલીના રફીકભાઈ ચૌહાણની મહત્વપૂર્ણ વરણી
પ્રજાકીય અને જનહિતના પ્રશ્નોને હંમેશાં પોતાની નિષ્પક્ષ કલમથી વાચા આપતા અમરેલીના પ્રતિષ્ઠિત કલમવીર તેમજ જાણીતા સમાજસેવક રફીકભાઈ હબીબભાઈ ચૌહાણની રાજ્ય કક્ષાના અગ્રણી સંગઠન ‘અખિલ ગુજરાત સિપાહી સમાજ (ગુજરાત પ્રદેશ)’ માં ‘ગુજરાત પ્રદેશ યુવા પ્રમુખ’ તરીકે બિનહરીફ નિમણૂક કરવામાં આવી છે. સંસ્થાના પ્રમુખ અલ્હાજ અ. રશીદભાઈ કાઝી દ્વારા સંગઠનના ધારાધોરણ મુજબ સત્તાવાર પત્ર એનાયત કરીને રફીકભાઈને પ્રદેશ યુવા પ્રમુખ તેમજ કારોબારી સમિતિના સદસ્ય તરીકેની આ મહત્વની અને જવાબદારીપૂર્વકની ધુરા સોંપવામાં આવી છે.
પત્રકારત્વ અને વિવિધ સામાજિક સંસ્થાઓમાં રહ્યું છે પ્રશંસનીય યોગદાન
રફીકભાઈ ચૌહાણ પત્રકારત્વ ક્ષેત્રે સુદીર્ઘ સમયથી કાર્યરત રહેવાની સાથે સાથે અમરેલી પંથકમાં વિવિધ સેવાકીય પ્રવૃત્તિઓનું સફળ સુકાન સંભાળી રહ્યા છે. તેઓ ‘અભિયાન સેવા ટ્રસ્ટ’ના પ્રમુખ તરીકે તેમજ જિલ્લા મુસ્લિમ ચેમ્બર ઓફ કોમર્સ, જમાઅતે ઇસ્લામી હિન્દ અને ગુજરાત રિફાહ ચેમ્બર ઓફ કોમર્સ જેવી સંસ્થાઓમાં સમર્પિત ભાવે સેવાઓ આપી રહ્યા છે. અભિયાન સેવા ટ્રસ્ટના માધ્યમથી તેમણે નિઃશુલ્ક એમ્બ્યુલન્સ સેવા, આખરી સફર વાહન, સર્વરોગ નિદાન કેમ્પો, રક્તદાન શિબિરો અને જરૂરિયાતમંદો માટે સરકારી યોજનાઓના કેમ્પો યોજીને સમાજના છેવાડાના વર્ગ સુધી રાત-દિવસ સેવા પહોંચાડવાનું નોંધપાત્ર કાર્ય કર્યું છે.
શિક્ષણ, રોજગાર અને સામાજિક સુધારણા રહેશે મુખ્ય અગ્રતા
આ મહત્વપૂર્ણ નિમણૂક બદલ રફીકભાઈ ચૌહાણે સમાજના શીર્ષસ્થ નેતૃત્વનો આભાર વ્યક્ત કરતાં જણાવ્યું હતું કે, બહોળી વસ્તી ધરાવતા સિપાહી સમાજે મારા પર મૂકેલા વિશ્વાસને સાર્થક કરવા હું સદાય કટિબદ્ધ રહીશ. આવનારા દિવસોમાં રાજ્યના તમામ જિલ્લાઓમાં યુવા સંગઠનને એકસૂત્રે બાંધીને શૈક્ષણિક પ્રગતિ, વ્યાપાર-રોજગારના નવા અવસરો અને સામાજિક સુધારણાના કાર્યોને પ્રાથમિકતા આપવામાં આવશે. રફીકભાઈ ચૌહાણની આ રાજ્યકક્ષાના હોદ્દા પર વરણી થતાં જ પત્રકાર આલમ તેમજ સામાજિક અને રાજકીય ક્ષેત્રમાં હર્ષની લાગણી ફેલાઈ છે અને ચોમેરથી તેમના પર અભિનંદનની વર્ષા થઈ રહી છે.
અહેવાલ ભાવેશ વાઘેલા અમરેલી
About the Author
