મુખ્ય હાઇલાઇટ્સ:
- ૨૬/૧૧ જેવા આતંકવાદી હુમલા અટકાવવા અને તટીય સુરક્ષા સજ્જ કરવા ઇન્ડિયન કોસ્ટ ગાર્ડ અને મરીન પોલીસનું સંયુક્ત અભિયાન.
- જાફરાબાદ, શિયાળબેટ, ચાંચ બંદર, નવાબંદર અને સૈયદ રાજપરા સહિતના સંવેદનશીલ બંદરો પર હાથ ધરાઈ દ્વિ-દિવસીય કવાયત.
- ‘રેડ ટીમ’ અને ‘બ્લુ ટીમ’ બનાવી દરિયાઈ ઘૂસણખોરી નિષ્ફળ બનાવવાનો અને આંતરિક સંકલન ચકાસવાનો કરાયો સફળ પ્રયોગ.
- સાગરખેડૂઓને દરિયાઈ સુરક્ષાની ‘આંખ અને કાન’ ગણાવી શંકાસ્પદ હિલચાલ સમયે ટોલ-ફ્રી નંબર ૧૦૯૩ પર સંપર્ક કરવા અપીલ.
૧૬૦૦ કિલોમીટર લાંબા દરિયાકાંઠાની સુરક્ષા અર્થે ‘સાગર કવચ’ મોક ડ્રીલ યોજાઈ
ગુજરાતના ૧૬૦૦ કિલોમીટર લાંબા વિશાળ અને વ્યૂહાત્મક દરિયાકાંઠાની રાષ્ટ્રીય સુરક્ષા વ્યવસ્થાને વધુ સુદ્રઢ, ચપળ અને સુસજ્જ બનાવવાના ભાગરૂપે અમરેલી જિલ્લાના જાફરાબાદ બંદર તેમજ આસપાસના તટીય વિસ્તારોમાં બે દિવસીય ‘સાગર સુરક્ષા કવચ’ દરિયાઈ મોક ડ્રીલનું સફળ આયોજન કરવામાં આવ્યું હતું. ૨૬/૧૧ના મુંબઈ આતંકવાદી હુમલા બાદ દેશની તટીય સુરક્ષા વ્યવસ્થાને અખંડ રાખવાના હેતુથી ઇન્ડિયન કોસ્ટ ગાર્ડ અને રાજ્યની વિવિધ સુરક્ષા એજન્સીઓ દ્વારા વર્ષમાં બે વાર આ પ્રકારની ત્રિસ્તરીય મોક ડ્રીલ યોજવામાં આવે છે. મદદનીશ મત્સ્યોદ્યોગ કચેરીના નિયંત્રણ હેઠળ આવતા જાફરાબાદ, શિયાળબેટ, ચાંચ બંદર, નવાબંદર, સૈયદ રાજપરા અને સીમર બંદર સહિતના તમામ સંવેદનશીલ કાંઠાળ વિસ્તારોમાં આ સઘન સુરક્ષા અભિયાન સફળતાપૂર્વક ચલાવવામાં આવ્યું હતું.
૧૭થી વધુ એજન્સીઓનું સંકલન: રેડ અને બ્લુ ટીમો વચ્ચે સર્ચ ઓપરેશન યોજાયું
દરિયાઈ માર્ગે થતી દેશવિરોધી પ્રવૃત્તિઓ, ઘૂસણખોરી અને તસ્કરીને નિષ્ફળ બનાવવાના મુખ્ય ઉદ્દેશ્ય સાથે યોજાયેલી આ કવાયતમાં ઇન્ડિયન કોસ્ટ ગાર્ડ, ભારતીય નૌસેના, જાફરાબાદ મરીન પોલીસ, સ્થાનિક પોલીસ, કસ્ટમ્સ, ઇન્ટેલિજન્સ બ્યુરો તેમજ ગુજરાત મેરિટાઇમ બોર્ડ સહિત ૧૭થી વધુ વિવિધ સુરક્ષા એજન્સીઓએ ભાગ લીધો હતો. મોક ડ્રીલ દરમિયાન સુરક્ષા દળોને બે ભાગમાં વહેંચવામાં આવ્યા હતા. જેમાં ‘રેડ ટીમ’ નકલી આતંકવાદી બનીને દરિયાઈ માર્ગે ઘૂસણખોરી કરવાનો પ્રયાસ કરતી હતી, જ્યારે ‘બ્લુ ટીમ’ (મરીન પોલીસ અને સુરક્ષા એજન્સીઓ) તેમને ટ્રેક કરીને તટસ્થ (તપાસીને પકડી પાડવાની) કામગીરી કરતી હતી. આ દરમિયાન જાફરાબાદ મરીન પોલીસ દ્વારા સ્થાનિક જેટી, બંદરો અને સરકેશ્વર બીચ જેવા વિસ્તારોમાં બોટ ચેકિંગ અને દરિયાઈ પેટ્રોલિંગ હાથ ધરવામાં આવ્યું હતું.
સાગરખેડૂઓ માટે જાગૃતિ અભિયાન: શંકાસ્પદ હિલચાલ પર ૧૦૯૩ પર જાણ કરવા અનુરોધ
દરિયાઈ સુરક્ષાચક્રમાં સ્થાનિક માછીમારો દેશની પ્રથમ આડશ એટલે કે ‘આંખ અને કાન’ સમાન હોવાથી, આ કવાયત અંતર્ગત બોટ એસોસિએશનના પ્રમુખો, બોટ માલિકો અને સાગરખેડૂઓ માટે ખાસ જાગૃતિ કાર્યક્રમોનું આયોજન કરવામાં આવ્યું હતું. અધિકારીઓ દ્વારા માછીમારોને સૂચના આપવામાં આવી હતી કે દરિયામાં કોઈ પણ પ્રકારનું સંકટ ઊભું થાય કે કોઈ અજાણી કે શંકાસ્પદ બોટ અથવા વ્યક્તિની હિલચાલ નજરે પડે તો તુરંત જ કોસ્ટ ગાર્ડના ટોલ-ફ્રી નંબર ૧૦૯૩ પર અથવા સ્થાનિક મરીન પોલીસનો સંપર્ક કરવો. આ આખી મોક ડ્રીલ દરમિયાન માછીમારોની બોટો કે જાળને કોઈ આર્થિક કે ભૌતિક નુકસાન ન થાય તેની વિશેષ કાળજી રાખવામાં આવી હતી અને સાગરખેડૂઓને દેશની સુરક્ષામાં સહભાગી બનવા અપીલ કરાઈ હતી.
રિપોર્ટર જીજ્ઞેશ બારૈયા
About the Author
