મુખ્ય હાઇલાઇટ્સ:
- ભાવનગર જિલ્લાના મહુવા ટાઉન પોલીસ દ્વારા પેટ્રોલિંગ દરમિયાન મળેલી ચોક્કસ બાતમીના આધારે દરોડાની કાર્યવાહી.
- બહારપરા વિસ્તારમાં જીતુભાઈ મકવાણાના મકાનમાં બનાવેલા ગુપ્ત ખાનાં, ગેલેરી અને કારમાંથી વિદેશી દારૂનો જંગી જથ્થો જપ્ત.
- દારૂની બોટલો અને વિટારા બ્રેઝા કાર સહિત કુલ ૭,૯૫,૨૦૪ રૂપિયાની કિંમતનો મુદ્દામાલ પોલીસે કર્યો કબજે.
- પિતા જીતુભાઈ મકવાણાની અટકાયત; સંડોવાયેલો પુત્ર નિખીલ મકવાણા પોલીસ પકડથી દૂર હોવાથી વોન્ટેડ જાહેર કરાયો.
મહુવાના બહારપરા વિસ્તારમાં પોલીસની સપાટો બોલાવતો દરોડો
ભાવનગર જિલ્લાના મહુવા ટાઉન પોલીસ સ્ટેશન વિસ્તારમાં ગેરકાયદેસર પ્રવૃત્તિઓ અને દારૂના વેચાણ સામે પોલીસ દ્વારા સકંજો કસવામાં આવ્યો છે. મહુવા પોલીસને પેટ્રોલિંગ દરમિયાન મળેલી ગુપ્ત બાતમીના આધારે બહારપરા વિસ્તારમાં આવેલ જીતુભાઈ મકવાણાના રહેણાક મકાન પર અચાનક દરોડો પાડવામાં આવ્યો હતો. પોલીસની આ આકસ્મિક કાર્યવાહીથી બુટલેગરો અને અસામાજિક તત્વોમાં ભારે ફફડાટ વ્યાપી ગયો હતો.
ગુપ્ત ખાનાં અને કારમાંથી મળી આવ્યો ૬૪૦ બોટલ વિદેશી દારૂ
પોલીસ દ્વારા મકાનની તલાશી લેવામાં આવતા ત્યાં ચાલી રહેલા ગોરખધંધાનો પર્દાફાશ થયો હતો. મકાનમાં અંદર બનાવેલા ગુપ્ત ખાનાં, ગેલેરી તેમજ ઘરની બહાર ઊભેલી વિટારા બ્રેઝા કારમાંથી અલગ-અલગ બ્રાન્ડની કુલ ૬૪૦ બોટલ વિદેશી દારૂનો જથ્થો મળી આવ્યો હતો. પોલીસે રૂ. ૧,૯૩,૨૦૪ ની કિંમતનો વિદેશી દારૂ તેમજ વિટારા બ્રેઝા કાર સહિત કુલ રૂ. ૭,૯૫,૨૦૪ નો મુદ્દામાલ જપ્ત કરી લીધો છે.
પિતાની ધરપકડ, પુત્રની શોધખોળ હાથ ધરાઈ
પોલીસની પ્રાથમિક પૂછપરછ અને તપાસમાં એવું બહાર આવ્યું છે કે આ દારૂનો જથ્થો જીતુભાઈનો પુત્ર નિખીલ મકવાણા બહારથી લવતો હતો અને ત્યારબાદ પિતા-પુત્ર બંને મળીને મહુવા પંથકમાં દારૂનું છૂટક વેચાણ કરતા હતા. પોલીસે સ્થળ પરથી પિતા જીતુભાઈ મકવાણાની અટકાયત કરી લીધી છે, જ્યારે આ ગુનામાં સંડોવાયેલા અને વોન્ટેડ જાહેર કરાયેલા પુત્ર નિખીલ મકવાણાને ઝડપી પાડવા માટે આગળની કાયદેસરની ચક્રો ગતિમાન કર્યા છે.
અહેવાલ: ફારૂક બિલખિયા
About the Author
