મુખ્ય હાઇલાઇટ્સ:
- મુખ્યમંત્રીને રજૂઆત: અમરેલી જિલ્લા ભાજપ પ્રમુખ અતુલ કાનાણીએ મુખ્યમંત્રીને પત્ર લખી તાકીદે ખાસ રાહત પેકેજ જાહેર કરવા માંગ કરી.
- પાક અને મકાનોને નુકસાન: અતિભારે વરસાદથી ખેતરોનું ધોવાણ થયું, બાગાયતી પાક, મકાનો અને પશુધનને વ્યાપક નુકસાન પહોંચ્યું.
- વેપારીઓની હાલાકી: દુકાનોમાં પાણી ઘૂસતા માલ-સામાન બગડ્યો અને ઈંટોના ભઠ્ઠા નાશ પામ્યા.
- ખોરવાયેલો વાહનવ્યવહાર: ગ્રામ્ય રસ્તાઓ, નાળા અને પુલિયા ધોવાઈ જતાં વાહનવ્યવહાર ઠપ, યુદ્ધના ધોરણે સમારકામ શરૂ કરવાની માંગ.
- સર્વેની માંગણી: તમામ અસરગ્રસ્ત ખેડૂતો, વેપારીઓ અને નાગરિકોની નુકસાનીનો ત્વરિત સર્વે કરી વળતર આપવા રજૂઆત.
અમરેલી જિલ્લામાં તાજેતરમાં વરસેલા અતિભારે વરસાદે વ્યાપક તારાજી સર્જી છે, જેના કારણે સ્થાનિક ખેડૂતો, વેપારીઓ અને સામાન્ય નાગરિકો ભારે મુશ્કેલીમાં મુકાયા છે. આ વિકટ પરિસ્થિતિને ધ્યાને લઈને અમરેલી જિલ્લા ભારતીય જનતા પાર્ટીના પ્રમુખ અતુલભાઈ કાનાણી પ્રજાની વહારે આવ્યા છે. તેમણે મુખ્યમંત્રીને એક લેખિત રજૂઆત કરીને સમગ્ર જિલ્લામાં તાકીદે સર્વે કરાવીને અસરગ્રસ્તોને યોગ્ય વળતર અને ખાસ રાહત પેકેજ આપવાની જોરદાર માંગણી કરી છે.
ભારે વરસાદથી ખેતી અને વેપારને મોટું નુકસાન
જિલ્લા ભાજપ પ્રમુખ અતુલભાઈ કાનાણીએ રજૂઆતમાં જણાવ્યું છે કે, ગત તારીખ ૪ જુલાઈથી અત્યાર સુધી પડેલા મુશળધાર વરસાદના કારણે ખેતરોમાં મોટા પાયે ધોવાણ થયું છે, જેનાથી મોલ અને બાગાયતી પાકને ભારે નુકસાન પહોંચ્યું છે. આ ઉપરાંત અનેક પરિવારોના મકાનો અને પશુધનને પણ નુકસાન થયું છે. ગ્રામ્ય અને શહેરી વિસ્તારોમાં વેપારીઓની દુકાનોમાં પાણી ભરાઈ જવાથી માલ-સામાન બગડી ગયો છે, તેમજ સ્થાનિક ઈંટોના ભઠ્ઠાઓ સંપૂર્ણપણે નાશ પામ્યા છે, જેના કારણે લોકોની આજીવિકા પર મોટો ફટકો પડ્યો છે.
રસ્તા અને નાળાનું યુદ્ધના ધોરણે રિપેરિંગ કરવા માંગ
વ્યક્તિગત નુકસાનીની સાથે-સાથે જિલ્લાના આંતરમાળખાને પણ ભારે નુકસાન થયું છે. ગ્રામ્ય વિસ્તારોના મુખ્ય રસ્તાઓ, નાળા અને પુલિયા ધોવાઈ જવાને કારણે વાહનવ્યવહાર સંપૂર્ણપણે ખોરવાઈ ગયો છે. અતુલભાઈ કાનાણીએ પ્રજાની હાલાકી વહેલી તકે દૂર કરવાના ઉદ્દેશ્ય સાથે સરકારને વિનંતી કરી છે કે તૂટી ગયેલા રસ્તાઓનું યુદ્ધના ધોરણે રિપેરિંગ કામ શરૂ કરવામાં આવે, જેથી વાહનવ્યવહાર અને જનજીવન ફરી પૂર્વવત થઈ શકે. તેમણે સરકારના નીતિ-નિયમો મુજબ તમામ અસરગ્રસ્તોને વહેલી તકે આર્થિક સહાય ચૂકવવાની અપીલ કરી છે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
