મુખ્ય હાઇલાઇટ્સ:
- હોટલમાં રોકાઈ કાઉન્ટર પરથી ચોરી અને ઓનલાઇન નાણાં ટ્રાન્સફરના નામે છેતરપિંડી કરતા શખ્સને અમરેલી એલસીબીએ ઝડપ્યો.
- સુરતના રહીશ અને મૂળ જામનગરના જીકેશ રાજેશભાઈ પાનસુરીયા નામના ૩૦ વર્ષીય આરોપીની ધરપકડ.
- આરોપી પાસેથી રૂ. ૧૫,૫૦૦ ની રોકડ રકમ કબ્જે કરી અમરેલી અને ઉના પોલીસ સ્ટેશનના ગુના ડીટેક્ટ કરાયા.
- પુછપરછ દરમિયાન વડોદરા, રાજકોટ, જામનગર, પોરબંદર, જૂનાગઢ સહિતના શહેરોમાં આચરેલી ૧૦ થી વધુ છેતરપિંડીની કબૂલાત.
અમરેલી એલસીબીને મળી મોટી સફળતા
ભાવનગર રેન્જ આઈજીપી આર.વી. અસારી અને અમરેલી પોલીસ અધિક્ષક સંજય ખરાત દ્વારા વણઉકેલાયેલા ગુનાઓ ડીટેક્ટ કરવા અપાયેલી સૂચના અન્વયે અમરેલી એલસીબી પોલીસ ઇન્સ્પેક્ટર સી.પી. વાઘેલાની રાહબરી હેઠળ ટીમે તપાસ હાથ ધરી હતી. અમરેલી શહેરની હોટલમાંથી ચોરી કરનાર અજાણ્યા શખ્સ અંગે ટેકનિકલ સોર્સ અને બાતમીદારોના આધારે માહિતી મેળવી એલસીબી ટીમે એક ઈસમની અટકાયત કરી હતી. પકડાયેલા આરોપીની સઘન પૂછપરછ હાથ ધરતાં અમરેલી સિટી અને ગીર સોમનાથ જિલ્લાના ઉના પોલીસ સ્ટેશનના વણઉકેલાયેલા ગુનાઓનો ભેદ ઉકેલાયો છે.
ઓનલાઇન નાણાં ટ્રાન્સફરના બહાને આચરતો હતો છેતરપિંડી
પકડાયેલ આરોપીની ઓળખ જીકેશભાઈ રાજેશભાઈ પાનસુરીયા (ઉંમર વર્ષ ૩૦, રહે. અંબા લક્ઝરીયસ, પાસોદરા પાટીયા, સુરત; મૂળ રહે. કૃષ્ણનગર, જામનગર) તરીકે થઈ છે. આરોપી અલગ અલગ શહેરોની હોટલોમાં રોકાતો હતો અને હોટલ માલિક, મેનેજર કે કર્મચારીઓને વિશ્વાસમાં લઈ “ઓનલાઇન ટ્રાન્સફર કરી આપું છું” તેમ કહી રોકડા રૂપિયા મેળવી ફરાર થઈ જતો હતો. આ ઉપરાંત તક મળતાં જ હોટલના કાઉન્ટરના ડ્રોવર કે આજુબાજુના પાનના ગલ્લામાંથી ચોરી કરવાની મોડસ ઓપરેન્ડી પણ ધરાવતો હતો. પોલીસે આરોપી પાસેથી રૂ. ૧૫,૫૦૦ ની રોકડ રકમ કબ્જે કરી છે.
રાજ્યના વિવિધ શહેરોમાં આચરેલા ૧૦ ગુનાઓની કરી કબૂલાત
એલસીબીની કડક પૂછપરછ દરમિયાન આરોપીએ રાજ્યના અનેક શહેરોમાં આચરેલી છેતરપિંડીની કબૂલાત આપી છે:
- અમરેલી: હોટલ વેલકમ ઇનના કાઉન્ટરમાંથી ચાવી વડે ડ્રોવર ખોલી રૂ. ૨૧,૦૦૦ ની ચોરી કરી હતી.
- ઉના/રાજકોટ: રાજકોટની ગેસ્ટ હાઉસમાંથી કામદારનો ફોન ચોરી, તે ફોનના માધ્યમથી ઉનામાં મની ટ્રાન્સફર દુકાનદારેથી અને રીક્ષાચાલક મારફતે રૂ. ૬૫,૦૦૦ ઓનલાઇન મેળવી લીધા હતા.
- પોરબંદર, વેરાવળ, રાજકોટ, જામનગર, જૂનાગઢ, અંકલેશ્વર: વિવિધ હોટલોમાં રોકાઈ મેનેજરો અને માલિકોને વિશ્વાસમાં લઈ રૂ. ૩,૫૦૦ થી લઈને રૂ. ૧૬,૦૦૦ સુધીની રોકડ મેળવી ઓનલાઇન ટ્રાન્સફરના નામે ઠગાઈ આચરી હતી.
- અમદાવાદ અને વડોદરા: હોટલની બાજુમાં આવેલી અન્ય હોટલ અને પાનના ગલ્લામાંથી અનુક્રમે રૂ. ૬,૦૦૦ અને રૂ. ૮,૦૦૦ ની ચોરી કરી હતી.
આ સફળ કામગીરી એલસીબી પીઆઈ સી.પી. વાઘેલા, પીએસઆઈ એમ.ડી. ગોહિલ, પીએસઆઈ જે.ડી. વાઘેલા તેમજ એએસઆઈ કનાભાઈ, રાહુલભાઈ, ગિરીરાજસિંહ અને હેડ કોન્સ્ટેબલ સલીમભાઈ, કિશનભાઈ, મહેશભાઈ, રાહુલભાઈ અને તુષારભાઈ દ્વારા કરવામાં આવી છે.
અહેવાલ: ભાવેશ વાઘેલા અમરેલી
About the Author
