મુખ્ય હાઇલાઇટ્સ:
- પાલિકાની નિષ્ફળતા: ધોળકા નગરપાલિકા પ્રજા પાસેથી ‘એ’ ગ્રેડનો ઊંચો વેરો વસૂલવા છતાં કલીકુંડ વિસ્તારમાં પ્રાથમિક સુવિધાઓ આપવામાં સદંતર નિષ્ફળ નીવડી.
- શાળા પાસે ગંદકી: મફલીપુર પ્રાથમિક શાળા પાસે છેલ્લા ઘણા દિવસોથી ગટરના દૂષિત પાણી ઉભરાઈને રસ્તા પર ફરી વળતાં વિદ્યાર્થીઓ અને રાહદારીઓ પરેશાન.
- અધિકારીઓની ઉદાસીનતા: ગટર ઉભરાવાના સ્થળની બિલકુલ નજીક જ પાલિકાની જોનલ ઓફિસ હોવા છતાં અધિકારીઓ રોજ ત્યાંથી આંખ આડા કાન કરીને પસાર થાય છે.
- રોગચાળાનો ડર: ચોમાસા વિના જ રસ્તા પર ગંદા પાણીના ખાબોચિયા ભરાઈ રહેતાં મચ્છરોનો ત્રાસ અને દુર્ગંધ વધ્યા, જેનાથી શાળાના બાળકોના આરોગ્ય પર મોટું જોખમ.
- કાયમી નિકાલની માંગ: તંત્રની લાલિયાવાડીથી કંટાળેલા સ્થાનિક રહીશો અને વાલીઓએ આ નરકાગારમાંથી મુક્તિ અપાવવા માટે કાયમી ઉકેલની ઉગ્ર માંગ કરી છે.
અમદાવાદ જિલ્લાના ધોળકા શહેરમાં વહીવટી તંત્રની ઘોર બેદરકારી અને આડોડાઈ સામે આવી છે. ધોળકા નગરપાલિકા દ્વારા શહેરના પ્રજાજનો પાસેથી નિયમિતપણે ‘એ’ ગ્રેડના ઊંચા ટેક્સ અને વેરા વસૂલવામાં આવે છે, પરંતુ નાગરિકોને પ્રાથમિક સુવિધાઓ આપવાના નામે તંત્રનું પાટીયું સાવ કોરુંધાકોર એટલે કે મીંડું સાબિત થયું છે. શહેરના કલીકુંડ વિસ્તારમાં આવેલી મફલીપુર પ્રાથમિક શાળા પાસે છેલ્લા ઘણા દિવસોથી ગટરના અત્યંત ગંદા અને દૂષિત પાણી મુખ્ય રસ્તા પર વહી રહ્યા છે, જેને કારણે શાળાએ જતા નાના-નાના ભૂલકાઓ, શિક્ષકો તેમજ સ્થાનિક આમ જનતાની હાલત અત્યંત કફોડી બની ગઈ છે.
નગરપાલિકાની નિષ્ફળતાનો સૌથી મોટો પુરાવો એ છે કે, ચોમાસાની ઋતુ ન હોવા છતાં આ વિસ્તારમાં બારેમાસ ગંદા પાણીના ખાબોચિયા ભરાયેલા રહે છે, જેના કારણે સ્થાનિક રહીશોમાં પાલિકા તંત્ર સામે ભારે આક્રોશ અને રોષ ફાટી નીકળ્યો છે. આશ્ચર્ય અને આઘાતની વાત તો એ છે કે, જ્યાં આ ગંદકીનું સામ્રાજ્ય છવાયેલું છે અને ગટરના પાણી ઉભરાઈ રહ્યા છે, તેની બિલકુલ નજીકમાં જ નગરપાલિકાની સત્તાવાર જોનલ ઓફિસ આવેલી છે. પાલિકાના જવાબદાર અધિકારીઓ અને કર્મચારીઓ રોજ પોતાના વાહનો લઈને આ ગંદકીની વચ્ચેથી જ પસાર થાય છે, છતાં પણ તેઓ આ ગંભીર જનસમસ્યા પ્રત્યે સદંતર આંખ આડા કાન કરી રહ્યા હોય તેમ લાગી રહ્યું છે.
પ્રાથમિક શાળાની બિલકુલ નજીક જ ગટરના ગંદા પાણી સતત ભરાઈ રહેવાના કારણે સમગ્ર વિસ્તારમાં મચ્છરોનો ઉપદ્રવ અતિશય વધી ગયો છે અને ચોતરફ માથું ફાડી નાખે તેવી અસહ્ય દુર્ગંધ વ્યાપી ગઈ છે. શાળામાં અભ્યાસ કરવા આવતા નિર્દોષ બાળકોને આ ગંદા પાણીની બાજુમાંથી અને દુર્ગંધની વચ્ચે બેસીને ભણવું પડી રહ્યું છે, જેના કારણે બાળકોના સ્વાસ્થ્ય સામે મોટું જોખમ ઊભું થયું છે અને વિસ્તારમાં ભયંકર રોગચાળો ફાટી નીકળવાની પૂરેપૂરી દહેશત સેવાઈ રહી છે. સ્થાનિક વાલીઓ અને નાગરિકોએ તંત્ર સમક્ષ આક્રોશ સાથે ચેતવણી આપી છે કે, વહીવટી તંત્ર ઊંઘમાંથી જાગીને વહેલી તકે આ ગટરની લાઈન દુરસ્ત કરે અને આ માર્ગ પરથી ગંદા પાણીની સમસ્યાનો કાયમી નિકાલ લાવે.
ગાંધીનગર, પ્રવાસી પત્રકાર રાજેશ પરીખ:
About the Author
