મુખ્ય હાઇલાઇટ્સ:
- પાલિકાની કામગીરી પર સવાલો: કચેરી પાસેના માર્ગ પર ગટરના ગંદા પાણી ઉભરાતા તંત્રની નિષ્ક્રિયતા છતી થઈ.
- વિદ્યાર્થીઓ અને વાલીઓની મુશ્કેલી: સ્કૂલ જવાના મુખ્ય માર્ગ પર ગંદકીને કારણે હજારો લોકોને હાલાકી.
- અકસ્માતનો ભય: ગંદા પાણી અને કાદવના કારણે વાહનો સ્લિપ થવાની ઘટનાઓમાં વધારો.
- રોગચાળાની દહેશત: અસહ્ય દુર્ગંધ અને મચ્છરોના ઉપદ્રવથી સ્થાનિકોમાં રોગચાળો ફેલાવાની ભીતિ.
- કાયમી ઉકેલની માંગ: પ્રી-મોન્સૂન કામગીરીના પોકળ દાવાઓ વચ્ચે સ્થાનિકો દ્વારા તાત્કાલિક કાર્યવાહીની માગણી.
ચોમાસા પહેલા જ પ્રી-મોન્સૂન કામગીરીના દાવાઓ પોકળ સાબિત: માસૂમ વિદ્યાર્થીઓ અને સ્થાનિકો માટે આ માર્ગ બન્યો જોખમી
ધોળકા: શહેરના હૃદય સમાન ગણાતા અને નગરપાલિકા કચેરીથી ખાનગી સ્કૂલ તરફ જતા મુખ્ય માર્ગ પર હાલ ગટરના ગંદા પાણી ઉભરાઈ રહ્યા છે. હજુ તો ચોમાસાએ વિધિવત આગમન પણ નથી કર્યું, ત્યાં જ પાલિકા તંત્રની અણધડ વહીવટની પોલ ખૂલી ગઈ છે. કરોડો રૂપિયાના ખર્ચે બિછાવેલી ભૂગર્ભ ગટર લાઈનો બેક મારતા માર્ગ પર ગંદા પાણીના ફુવારા ઉડતા જોવા મળે છે, જે પાલિકાની મેન્ટેનન્સ કામગીરી પર અનેક સવાલો ઉભા કરે છે.
શિક્ષણ સંકુલ તરફ જતા માર્ગે નરકાગારની સ્થિતિ આ માર્ગ શૈક્ષણિક સંકુલ તરફ જતો હોવાથી સવાર-સાંજ હજારો માસૂમ વિદ્યાર્થીઓ, વાલીઓ અને શિક્ષકોને આ દુર્ગંધયુક્ત પાણીમાંથી પસાર થવું પડે છે. સ્થાનિક રહીશો અને વેપારીઓ અસહ્ય દુર્ગંધ અને મચ્છરોના ઉપદ્રવથી તોબા પોકારી ઉઠયા છે. રોડ પર ફરી વળેલા આ ગંદા પાણીના કારણે વાહનો સ્લિપ થવાના અને અકસ્માત થવાના બનાવોમાં પણ વધારો થયો છે, જેને કારણે લોકોમાં તંત્ર પ્રત્યે ભારે રોષ જોવા મળી રહ્યો છે.
તંત્રની આંખ આડા કાન કરવાની નીતિ સામે સવાલો સ્થાનિક લોકોનો આક્ષેપ છે કે, પાલિકાના સત્તાધીશો અને જવાબદાર અધિકારીઓ દરરોજ આ જ માર્ગ પરથી અવરજવર કરે છે, તેમ છતાં તેમને આ નરકાગાર જેવી સ્થિતિ કેમ દેખાતી નથી? ચોમાસા પૂર્વે કરવામાં આવતી કામગીરીના દાવાઓ માત્ર કાગળ પર જ સીમિત રહ્યા હોવાનું આ દ્રશ્યો સાબિત કરે છે. જો સામાન્ય દિવસોમાં આવી સ્થિતિ હોય, તો ધોધમાર વરસાદ દરમિયાન આ વિસ્તારની શું દશા થશે તે વિચારીને જ રહીશો ફફડી રહ્યા છે. સ્થાનિકોએ વહેલી તકે આ ગટર લાઈનની સફાઈ કરી કાયમી નિકાલ લાવવાની ઉગ્ર માંગ કરી છે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
