મુખ્ય હાઇલાઇટ્સ:
- બોટાદ જિલ્લાના ગઢડા તાલુકાના જલાલપુર ગામમાં પશ્ચિમ ગુજરાત વીજ કંપની લિમિટેડની મોટી લાપરવાહી સામે આવી.
- ઘરે વીજ કનેક્શન કે મીટર જ નથી તેવા બે ગ્રાહકોને રૂ. ૮૧૮ ના લાઈટ બિલ થમાવી દેવાતાં વીજ ગ્રાહકોમાં આક્રોશ.
- સ્થળ તપાસ વગર જ બિલ બનાવી દેવાની કામગીરી સામે શંકાઓ; મીટર વાળા ગ્રાહકોના બિલિંગ પર પણ ઉઠ્યા સવાલો.
- મામલો ગરમાતાં બોટાદ જિલ્લા સુપ્રિટેન્ડિંગ એન્જિનિયરે ગંભીર નોંધ લઈ તાત્કાલિક તપાસના આદેશ આપ્યા.
ઘરે કનેક્શન કે મીટર જ નથી છતાં આવી ગયા વીજ બિલ
બોટાદ જિલ્લાના ગઢડા તાલુકાના જલાલપુર ગામમાં પશ્ચિમ ગુજરાત વીજ કંપની લિમિટેડ (પીજીવીસીએલ) ની ઘોર બેદરકારીનો કિસ્સો પ્રકાશમાં આવ્યો છે. ઢસા પીજીવીસીએલ કચેરી હેઠળ આવતા જલાલપુર ગામના બે રહીશોએ વીજ કનેક્શન મેળવવા માટે અરજી કરી હતી, પરંતુ હજુ સુધી તેમના ઘરે ન તો વીજ કનેક્શન આપવામાં આવ્યું છે કે ન તો મીટર ઇન્સ્ટોલ કરવામાં આવ્યું છે. આશ્ચર્યજનક રીતે મીટર વગર જ આ બંને ગ્રાહકોના નામે રૂ. ૮૧૮ ના લાઈટ બિલ જનરેટ થઈને તેમના ઘરે પહોંચી જતાં ભારે હોબાળો મચી ગયો છે.
તંત્રની અણઘડ નીતિ અને બિલિંગ ગેરરીતિ સામે રોષ
મીટર જ ન હોવા છતાં રીડિંગ કોના આધારે લેવામાં આવ્યું અને બિલ કઈ રીતે જનરેટ થયું? તેવા તીખા સવાલો સાથે સ્થાનિક ગ્રામજનો અને વીજ ગ્રાહકોમાં ભારે રોષની લાગણી ફેલાઈ છે. પીજીવીસીએલ દ્વારા સ્થળ પર કોઈપણ પ્રકારની સચોટ તપાસ કર્યા વગર જ કાગળ પર બિલ બનાવી દેવાની આ અણઘડ નીતિ ગ્રાહકો સાથે છેતરપિંડી સમાન ગણાવવામાં આવી રહી છે. સ્થાનિકોનું કહેવું છે કે જો મીટર વગરના ગ્રાહકોને આ રીતે ખોટા બિલ ફટકારવામાં આવતા હોય તો જે ગ્રાહકોના ઘરે મીટર લાગેલા છે તેમના બિલિંગમાં કેટલી ગેરરીતિઓ થતી હશે તે અંગે પણ ગંભીર શંકાઓ ઊભી થઈ રહી છે.
બોટાદ સુપ્રિટેન્ડિંગ એન્જિનિયરે આદેશ્યા તપાસના આદેશ
આ ગંભીર મામલો સામે આવતાં જ ઢસા પીજીવીસીએલ કચેરીમાં ભારે દોડધામ મચી ગઈ છે. આ ઘટનાની ગંભીર નોંધ લઈને બોટાદ જિલ્લા સુપ્રિટેન્ડિંગ એન્જિનિયરે તાત્કાલિક અસરથી સમગ્ર બનાવ અંગે તપાસના આદેશ આપ્યા છે. કઈ એજન્સી કે કયા કર્મચારીની બેદરકારીના કારણે કનેક્શન આપ્યા વગર જ બિલ ઈશ્યુ થઈ ગયા તેની ઊંડાણપૂર્વક તપાસ કરીને જવાબદારો સામે કડક કાનૂની અને ખાતાકીય કાર્યવાહી કરવાની ખાતરી આપવામાં આવી છે. બીજી તરફ પીડિત ગ્રાહકોએ આ ખોટા બિલો તાત્કાલિક રદ કરીને ભૂલ સુધારવાની માંગ કરી છે.
ગાંધીનગર પ્રવાસી પત્રકાર રાજેશ પરીખ
About the Author
