મુખ્ય હાઇલાઇટ્સ:
- માંડલ ખાતે એક દાયકા બાદ અમદાવાદ જિલ્લા કક્ષાના રાષ્ટ્રીય પર્વની ઉજવણીનું સૌભાગ્ય સાંપડ્યું.
- ૧૫મી ઓગસ્ટે દસાડા રોડ પર આવેલા કોટન જીનના કેમ્પસમાં યોજાશે જિલ્લાકક્ષાનો ધ્વજવંદન કાર્યક્રમ.
- કલેક્ટર ભવ્ય વર્માએ સરકારી કચેરીઓની કામગીરી અને ઉજવણીના સ્થળનું ઝીણવટભર્યું નિરીક્ષણ કર્યું.
- મુખ્ય મંચ, પરેડ ગ્રાઉન્ડ અને નાગરિકો માટે બેસવાની વ્યવસ્થા અંગે તંત્રને અપાયા જરૂરી માર્ગદર્શન અને આદેશો.
માંડલ ખાતે ૧૦ વર્ષ બાદ યોજાશે જિલ્લા કક્ષાનો સ્વાતંત્ર્ય પર્વ
અમદાવાદ જિલ્લા કક્ષાના ૭૮મા સ્વતંત્રતા પર્વની ઉજવણી આ વર્ષે તાલુકા મથક માંડલ ખાતે કરવાનો નિર્ણય લેવાયો છે. માંડલને આશરે એક દાયકા બાદ ફરી એકવાર રાષ્ટ્રીય પર્વની જિલ્લા કક્ષાની ઉજવણી યજમાન બનવાનું ગૌરવ પ્રાપ્ત થયું છે. આગામી ૧૫મી ઓગસ્ટે સ્વતંત્રતા દિવસની ભવ્ય ઉજવણી માંડલના દસાડા રોડ પર સ્થિત કોટન જીનના વિશાળ કેમ્પસમાં કરવામાં આવશે. આ રાષ્ટ્રીય ઉત્સવના સુચારુ આયોજન અને પૂર્વ તૈયારીઓના ભાગરૂપે અમદાવાદ જિલ્લા કલેક્ટર ભવ્ય વર્માએ રૂબરૂ મુલાકાત લઈને તૈયારીઓની સમીક્ષા કરી હતી.
મામલતદાર કચેરીની વિવિધ શાખાઓનું હાથ ધરાયું નિરીક્ષણ
મુલાકાત દરમિયાન જિલ્લા કલેક્ટર સૌપ્રથમ માંડલ મામલતદાર કચેરી ખાતે પહોંચ્યા હતા, જ્યાં મામલતદાર વી. જી. રાવલ તેમજ અન્ય વરિષ્ઠ અધિકારીઓ દ્વારા તેમનું સ્વાગત કરવામાં આવ્યું હતું. કલેક્ટરે મામલતદાર કચેરીના મહેસૂલ વિભાગ, જનસેવા કેન્દ્ર, ઈ-ધરા અને સબ રજિસ્ટ્રાર કચેરી સહિતની વિવિધ શાખાઓની રૂબરૂ મુલાકાત લઈ ત્યાં ચાલતી વહીવટી કામગીરીનું નિરીક્ષણ કર્યું હતું અને જરૂરી સૂચનાઓ આપી હતી.
કોટન જીન કેમ્પસમાં પરેડ ગ્રાઉન્ડ અને બેઠક વ્યવસ્થા અંગે માર્ગદર્શન
ત્યારબાદ કલેક્ટર તેમના કાફલા સાથે ઉજવણીના મુખ્ય સ્થળ એવા કોટન જીન કેમ્પસ ખાતે પહોંચ્યા હતા. માર્ગ અને મકાન વિભાગના ઈજનેરો દ્વારા કલેક્ટરને આયોજનની રૂપરેખા અને બ્લૂ પ્રિન્ટ રજૂ કરવામાં આવી હતી. કલેક્ટરે ધ્વજવંદન માટેની મુખ્ય જગ્યા, પરેડ માટેનું ગ્રાઉન્ડ, મુખ્ય મંચ, વીઆઈપી બેઠક વ્યવસ્થા અને આમ જનતા માટેની સુવિધાઓ અંગે ઝીણવટભરી વિગતો મેળવી હતી. આ પ્રસંગે મામલતદાર, તાલુકા વિકાસ અધિકારી, માર્ગ-મકાન સ્ટેટ અને પંચાયતના ઈજનેરો, પોલીસ કાફલો તેમજ આરોગ્ય વિભાગના અધિકારીઓ ઉપસ્થિત રહ્યા હતા.
ગાંધીનગર પ્રવાસી પત્રકાર રાજેશ પરીખ
About the Author
