મુખ્ય હાઇલાઇટ્સ:
- અમદાવાદ જિલ્લાના માંડલ અને દેત્રોજ તાલુકામાં નર્મદા નિગમની કેનાલોની દયનીય સ્થિતિથી સિંચાઈના પાણીમાં અવરોધ.
- જાલીસણા-સીતાપુર વચ્ચે બ્રાંચ કેનાલમાં ગંદકીના ઢગ અને કાંત્રોડીમાં માઈનોર કેનાલમાં ગાંડા બાવળોનું સામ્રાજ્ય.
- શિયાળુ પાકની વાવણી નજીક હોવાથી ખેડૂતોમાં ચિંતા; ગ્રાન્ટ વપરાશ અંગે તંત્ર સામે ઉઠતા ગંભીર સવાલો.
- તાલુકા પંચાયતના પૂર્વ સભ્ય ભલાજી ઠાકોર અને સ્થાનિક ખેડૂતો દ્વારા કેનાલોની તાકીદે સફાઈ હાથ ધરવા માંગ.
માંડલ અને દેત્રોજ તાલુકામાં નર્મદા કેનાલોમાં સફાઈનો ઘોર અભાવ
અમદાવાદ જિલ્લાના માંડલ અને દેત્રોજ તાલુકામાં સરદાર સરોવર નર્મદા નિગમની કેનાલોની હાલત જાળવણીના અભાવે અત્યંત દયનીય બની ગઈ છે. માંડલ તાલુકાના જાલીસણા અને સીતાપુર ગામ વચ્ચેથી પસાર થતી મુખ્ય બ્રાંચ કેનાલમાં લાંબા સમયથી સમયસર સફાઈ ન થવાના કારણે ગંદકીના મોટો ઢગ જમા થઈ ગયા છે. જેના પરિણામે પાણીના પ્રવાહમાં મોટો અવરોધ ઊભો થયો છે અને ખેડૂતોને ખેતી માટે પૂરતા પ્રમાણમાં સિંચાઈનું પાણી મેળવવામાં ભારે મુશ્કેલીઓનો સામનો કરવો પડી રહ્યો છે.
કેનાલોની સ્થાપના બાદ સફાઈ નહીં થતાં ગાંડા બાવળોનું સામ્રાજ્ય ફેલાયું
બીજી તરફ દેત્રોજ તાલુકાના કાંત્રોડી ગામની સીમમાંથી પસાર થતી માઈનોર કેનાલનું નિર્માણ થયું ત્યારથી આજદિન સુધી યોગ્ય રીતે કોઈ જ કામગીરી કરવામાં આવી નથી. આ કેનાલમાં મોટા પ્રમાણમાં ગાંડા બાવળો અને ઝાડી-ઝાંખરાં ઊગી નીકળતાં કેનાલ પૂરાઈ જવાના આરે પહોંચી છે. શિયાળુ પાકની સીઝન ખૂબ જ નજીક આવી રહી હોવાથી ખેડૂતોમાં ભારે ચિંતા વ્યાપી છે. ખેડૂતોનો સૌથી મોટો સવાલ એ છે કે નર્મદા નિગમના ઈજનેરોને વારંવાર રજૂઆતો કરવા છતાં કોઈ યોગ્ય કામગીરી કેમ કરવામાં આવતી નથી?
કાગળ પર જ સફાઈ થતી હોવાના આરોપ; વહેલી તકે જંગલ કટિંગની માગ
સરકાર દ્વારા કેનાલોની સફાઈ અને જાળવણી માટે લાખો-કરોડો રૂપિયાની ગ્રાન્ટ ફાળવવામાં આવે છે, છતાં વાસ્તવિક ધોરણે કેનાલો સાફ કેમ થતી નથી તેને લઈને ખેડૂતોમાં શંકા-કુશંકાઓ સેવાઈ રહી છે. સમયસર દરખાસ્તો કરીને કામ કરાવવાને બદલે તંત્ર માત્ર કાગળ પર જ કામગીરી દર્શાવી રહ્યું હોવાના ગંભીર આરોપો ઉઠ્યા છે. આ અંગે તાલુકા પંચાયતના પૂર્વ સભ્ય ભલાજી ઠાકોર તેમજ સ્થાનિક ખેડૂતોએ ઉગ્ર માગણી કરી છે કે જવાબદાર ઈજનેરો અને તંત્ર દ્વારા વહેલી તકે બંને કેનાલોની સફાઈ, ગંદકી દૂર કરવા અને જંગલ કટિંગનું કામ હાથ ધરીને છેવાડાના ખેડૂતો સુધી સિંચાઈનું પાણી પહોંચાડવામાં આવે.
ગાંધીનગર પ્રવાસી પત્રકાર રાજેશ પરીખ
About the Author
