મુખ્ય હાઇલાઇટ્સ:
- અમદાવાદ જિલ્લા પંચાયતમાં મહિલા ઉપપ્રમુખ અને બાંધકામ ચેરમેન વચ્ચે ચેમ્બર મેળવવા બાબતે મોટો વિવાદ.
- બન્ને મહિલા હોદ્દેદારોના પતિઓ વચ્ચે બંધ બારણે ઉગ્ર બોલાચાલી થતાં જિલ્લા પંચાયતનું રાજકારણ ગરમાયું.
- જિલ્લા પંચાયત પ્રમુખે વચ્ચે પડી મામલો શાંત પાડ્યો અને ઉપપ્રમુખ માટે નવી ચેમ્બર બનાવવાની સૂચના આપી.
- મહિલા અને બાળ વિકાસ વિભાગના ચેરમેને પણ ટોયલેટ નજીક આવેલી પોતાની ચેમ્બર બદલવા કરી માંગણી.
હાઈફાઈ ચેમ્બર મેળવવા હોદ્દેદારો વચ્ચે ખેંચતાણ
અમદાવાદ જિલ્લા પંચાયતની કુલ ૩૪ બેઠકોમાંથી ૩૨ બેઠકો પર ભાજપ અને ૨ બેઠકો પર કોંગ્રેસનો કબ્જો છે. ભાજપના સદસ્યોમાંથી ચેરમેનોની નિમણૂંક થયા બાદ હવે જનતાની સેવા કરવાના બદલે હોદ્દેદારો વચ્ચે હાઈફાઈ ચેમ્બરો મેળવવાનો મોહ ખુલ્લો પડી રહ્યો છે. બાંધકામ સમિતિના ચેરમેનની ચેમ્બર ખાલી હોવાથી પ્રથમ નિમાયેલા મહિલા ઉપપ્રમુખે પૂર્વ મંજૂરી મેળવીને તે ચેમ્બર પોતાના કબજામાં લીધી હતી. જોકે, બાદમાં બાંધકામ વિભાગમાં નવી મહિલા ચેરમેનની વરણી થતાં જ તેમણે ઉપપ્રમુખનું બોર્ડ હટાવી પોતાનું બોર્ડ લગાવી દીધું હતું.
બોર્ડ હટાવતાં વિવાદ વકર્યો, પતિ દેવો વચ્ચે થઈ ઉગ્ર બોલાચાલી
પોતાનું બોર્ડ હટાવી દેવામાં આવતાં મહિલા ઉપપ્રમુખે ભારે વાંધો ઉઠાવ્યો હતો અને વિરોધ દર્શાવીને જિલ્લા પંચાયત આવવાનું બંધ કરી દીધું હતું. આ દરમિયાન સોમવારે બંને મહિલા હોદ્દેદારોના પતિ દેવો વચ્ચે બંધ બારણે ભારે ઉગ્ર બોલાચાલી થઈ હતી. આ બનાવની ચર્ચા આખા અમદાવાદ જિલ્લાના સરકારી અને રાજકીય વર્તુળોમાં વાયુવેગે પ્રસરી ગઈ હતી.
જિલ્લા પંચાયત પ્રમુખે મધ્યસ્થી કરી સમાધાન કરાવ્યું
વિવાદ વધુ વકરે તે પહેલાં જ અમદાવાદ જિલ્લા પંચાયતના પ્રમુખે તાત્કાલિક મધ્યસ્થી કરીને બંને પક્ષો વચ્ચે સમાધાન કરાવ્યું હતું. મામલો શાંત પાડવા સાથે પ્રમુખે મહિલા ઉપપ્રમુખ માટે તાત્કાલિક નવી ચેમ્બર તૈયાર કરવાનો વહીવટી આદેશ પણ આપી દીધો હતો. જેથી ઉપપ્રમુખને અલગથી ચેમ્બર ફાળવવામાં આવશે.
અન્ય સમિતિના ચેરમેને પણ ચેમ્બર બદલવા કરી રજૂઆત
બીજી તરફ મહિલા અને બાળ વિકાસ વિભાગના ચેરમેનની ચેમ્બર શૌચાલયની બાજુમાં આવેલી છે, જેનો તમામ કર્મચારીઓ ઉપયોગ કરે છે. અગાઉની ટર્મના ચેરમેન ત્યાં જ બેસતા હતા પરંતુ આ ટર્મના નવા મહિલા ચેરમેને વાંધો ઉઠાવી ચેમ્બર બદલવા રજૂઆત કરી છે. ઉલ્લેખનીય છે કે સામાજિક ન્યાય, કારોબારી, આરોગ્ય અને શિક્ષણ વિભાગની ચેમ્બરો નવી જ છે. જોકે, દરેક ટર્મમાં ચેરમેનોની આવી માંગણીઓને કારણે ચેમ્બરોના રિનોવેશન અને નવી ચેમ્બરો પાછળ પ્રજાના લાખો રૂપિયાનો ધુમાડો થવાની પરંપરા ચાલુ રહી છે.
ગાંધીનગર (પ્રવાસી પત્રકાર: રાજેશ પરીખ)
About the Author
