મુખ્ય હાઇલાઇટ્સ:
- જૂનો પ્રશ્ન, નવો આક્રોશ: ભૂતકાળમાં વળતર વિના લાઈનો પસાર થઈ જતી, પણ હવે જાગૃત થયેલો ખેડૂત પોતાના હક્ક માટે મેદાને આવ્યો છે.
- જમીન બિનઉપજાઉ બનવાનો ભય: હેવી લાઈનના થાંભલાને કારણે અડધાથી એક વીઘા જમીનમાં ખેતી કરવી અશક્ય બને છે અને જમીનના ભાવ તળિયે બેસી જાય છે.
- ગુજરાતભરમાં વિરોધનું વંટોળ: કચ્છ બાદ હવે મોરબીના જેતપર અને સુરેન્દ્રનગરના કોંઢ ગામમાં ખેડૂતો અને તંત્ર વચ્ચે તીખા મોરચા મંડાયા.
- ઉદ્યોગપતિઓ સામે આક્ષેપ: સરકારી પ્રોજેક્ટના નામે ખાનગી કંપનીઓને ફાયદો પહોંચાડવાની નીતિ સામે ખેડૂતોમાં ભારે નારાજગી.
ધરતીપુત્રોની વેદના: ‘ખેતરમાં ખોડાતો થાંભલો, જિંદગીભરનું સાલકણું’
ગુજરાતમાં ખેતરોમાંથી પસાર થતી હેવી વીજ લાઈનોનો પ્રશ્ન હવે માત્ર વળતર પૂરતો સીમિત નથી રહ્યો, પણ તે ખેડૂતોના અસ્તિત્વની લડાઈ બની ગયો છે. ભૂતકાળમાં જ્યારે દેવભૂમિ દ્વારકા જેવા વિસ્તારોમાંથી આવી લાઈનો પસાર થતી ત્યારે ખેડૂતો તેને સરકારી કામ સમજીને કોઈ પણ જાતના વળતર વિના સ્વીકારી લેતા હતા. કોઈ ભોળા ખેડૂતને એ ખ્યાલ નહોતો કે આ સરકારી પ્રોજેક્ટ્સની પાછળ ખાનગી કંપનીઓની મોટી હિસ્સેદારી છુપાયેલી છે. આજે સમય બદલાયો છે અને ખેડૂતો જાગૃત થયા છે, કારણ કે આ ગગનચૂંબી થાંભલાઓ તેમની પેઢીઓની કમાણી સમાન જમીનને નકામી બનાવી રહ્યા છે. જે ખેતરમાં આ લાઈનનો થાંભલો આવે છે, ત્યાં અડધાથી એક વીઘા જેટલી જમીનમાં વાવણી કે લણણી કરવી અશક્ય બની જાય છે, જેના કારણે જમીનની કિંમત શૂન્ય થઈ જાય છે.
કચ્છથી સુરેન્દ્રનગર સુધી આંદોલનની આગ: સરકાર અને ખેડૂતો આમને-સામને
વીજ કંપનીઓની મનસ્વી નીતિઓ સામે હવે ગુજરાતનો ખેડૂત આરપારના મૂડમાં છે. થોડા સમય પહેલા જ કચ્છના ખેડૂતોએ આ હેવી વીજ લાઈનો સામે ઉગ્ર આંદોલન છેડ્યું હતું. આ વિરોધની આગ હવે અન્ય જિલ્લાઓમાં પણ પ્રસરી ચૂકી છે. તાજેતરમાં મોરબીના જેતપર (મચ્છુ) અને સુરેન્દ્રનગરના ધ્રાંગધ્રા તાલુકાના કોંઢ ગામમાં વહીવટીતંત્ર અને ખેડૂતો આમને-સામને આવી ગયા છે. પોતાની હક્કની જમીન પર બળજબરીથી થાંભલા ખોડાતા જોઈને ખેડૂતોનો આક્રોશ ચરમસીમાએ પહોંચ્યો છે. ખેડૂતોનું કહેવું છે કે જેમની જમીન પર આ અસાધ્ય મુશ્કેલી આવી પડે છે, તે જ આ અસહ્ય પીડા સમજી શકે છે.
‘કોર્પોરેટ’ તરફી નીતિઓ સામે સવાલ: ખેડૂતોએ સરકારને ઘેરી
આ સમગ્ર વિવાદમાં ખેડૂતોનો સીધો આક્ષેપ સરકારની ઉદ્યોગપતિ તરફી નીતિઓ સામે છે. એક રોષે ભરાયેલા ખેડૂતે આકરા શબ્દોમાં સરકારની ઝાટકણી કાઢતા જણાવ્યું હતું કે, વડાપ્રધાન નરેન્દ્ર મોદીએ અંબાણી અને અદાણી જેવા મોટા ઉદ્યોગપતિઓને જે વિશેષ મહત્ત્વ આપ્યું છે, તે હવે ઓછું કરવું જોઈએ. જો સરકાર ખાનગી કંપનીઓને આ જ રીતે છાવરવાનું બંધ નહીં કરે, તો ખેડૂતોએ આજે નહીં તો કાલે પોતાની કિંમતી જમીનો આ કંપનીઓના હવાલે કરીને પાયમાલ થવાનો વારો આવશે. સત્તાવાળાઓ દ્વારા ખેડૂતોના અવાજને દબાવવાના પ્રયાસો સામે હવે ગ્રામીણ વિસ્તારોમાં ભારેલા અગ્નિ જેવી સ્થિતિ સર્જાઈ છે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
