મુખ્ય હાઇલાઇટ્સ:
- ડબલ ટ્રેકની પ્રબળ માંગ: ગાંધીગ્રામથી બોટાદ સુધીના સિંગલ ટ્રેકને ડબલ ટ્રેકમાં ફેરવવા માટે મુસાફરોનું આંદોલન તેજ બન્યું છે.
- મુસાફરોની હાલાકી: ક્રોસિંગના કારણે ટ્રેનો મોડી પડતી હોવાથી હજારો દૈનિક મુસાફરો અને વિદ્યાર્થીઓ પરેશાન.
- ઔદ્યોગિક વિકાસ પર અસર: બાવળા, ધોળકા અને ધંધૂકા વિસ્તારમાં વધતી જતી આર્થિક ગતિવિધિઓ માટે આધુનિક રેલવે સુવિધા અનિવાર્ય.
- સરકાર પાસે અપેક્ષા: સાબરમતી-સરખેજ રૂટની જેમ આ માર્ગને પણ પ્રાથમિકતા આપી ભવિષ્યના ટ્રાફિકને ધ્યાનમાં રાખી લાંબા ગાળાનું આયોજન કરવામાં આવે.
- વૈકલ્પિક સુવિધાની માંગ: નવી પેસેન્જર અને એક્સપ્રેસ ટ્રેનો શરૂ કરીને મુસાફરીને વધુ ઝડપી અને સુગમ બનાવવાની લોક માંગ.
સાબરમતી-સરખેજ ડબલ ટ્રેક બાદ ભાલ પંથકના રહીશો અને વેપારીઓમાં આશા: રેલવે સુવિધામાં સુધારા માટે તંત્ર સમક્ષ ઉગ્ર રજૂઆત
અમદાવાદ: પશ્ચિમ રેલવે દ્વારા સાબરમતી ડી-કેબિનથી સરખેજ સુધીના ૨૧ કિલોમીટર લાંબા રેલવે રૂટને ૩૧૩ કરોડના ખર્ચે ડબલ ટ્રેકમાં ફેરવવાની કામગીરી શરૂ કરવામાં આવતા જ, હવે અમદાવાદ-બોટાદ રેલવે માર્ગના મુસાફરોમાં પણ ડબલ ટ્રેકની માંગ પ્રબળ બની છે. ગાંધીગ્રામથી બોટાદ સુધીનો આ રૂટ અમદાવાદ અને સૌરાષ્ટ્રને જોડતી મહત્વની કડી છે, પરંતુ સમગ્ર માર્ગ સિંગલ ટ્રેક હોવાથી મુસાફરો અને વેપારીઓ વર્ષોથી હાલાકીનો સામનો કરી રહ્યા છે.
ટ્રેનોના ક્રોસિંગથી થતો વિલંબ મુસાફરો માટે માથાનો દુખાવો બાવળા, ધોળકા, ધંધૂકા, રાણપુર અને બોટાદને જોડતા આ માર્ગ પર દરરોજ હજારો દૈનિક મુસાફરો, વિદ્યાર્થીઓ અને વેપારીઓ મુસાફરી કરે છે. સિંગલ ટ્રેક હોવાને કારણે ટ્રેનોને ક્રોસિંગ માટે અનેક સ્ટેશનો પર લાંબો સમય ઊભું રહેવું પડે છે, જેના કારણે ટ્રેનો નિયમિતપણે મોડી ચાલે છે. સ્થાનિકોનું કહેવું છે કે, જ્યારે સરકાર અમદાવાદના અન્ય રૂટ પર આધુનિકીકરણ કરી રહી છે, ત્યારે ભાલ પંથકના આ મહત્વપૂર્ણ માર્ગને કેમ નજરઅંદાજ કરવામાં આવી રહ્યો છે?
ઔદ્યોગિક અને વ્યાપારિક વિકાસ માટે ડબલ ટ્રેક અનિવાર્ય બાવળા, ધોળકા અને ધંધૂકા વિસ્તારમાં સતત વધી રહેલી ઔદ્યોગિક અને કૃષિ પ્રવૃત્તિઓને જોતા હવે આ રૂટ પર ડબલ ટ્રેકની સુવિધા સમયની માંગ બની ગઈ છે. રેલવે નિષ્ણાતો પણ માને છે કે, ડબલ ટ્રેક બનવાથી માત્ર મુસાફરી ઝડપી જ નહીં બને, પરંતુ નવી પેસેન્જર અને એક્સપ્રેસ ટ્રેનો શરૂ કરવાની ક્ષમતામાં પણ વધારો થશે. આ સાથે માલવાહક ટ્રેનોની અવરજવર સરળ બનતા વેપાર-ઉદ્યોગને મોટું પ્રોત્સાહન મળશે.
તંત્ર સમક્ષ વહેલી મંજૂરીની માંગ હવે આ વિસ્તારના સ્થાનિક નાગરિકો, વેપારીઓ અને મુસાફરો દ્વારા સ્થાનિક સાંસદો અને ધારાસભ્યોને આ મુદ્દે સરકારમાં ઉચ્ચકક્ષાએ રજૂઆત કરવા માટે દબાણ કરવામાં આવી રહ્યું છે. મુસાફરોની માંગ છે કે, સાબરમતી-સરખેજ રૂટની જેમ જ ગાંધીગ્રામથી બોટાદ સુધીના સમગ્ર માર્ગને વહેલી તકે ડબલ ટ્રેકમાં રૂપાંતરિત કરવામાં આવે, જેથી ભાલ પંથક અને સૌરાષ્ટ્રના મુસાફરોને ઝડપી અને સલામત રેલવે સેવા મળી શકે.
અહેવાલ:ગાંધીનગર પ્રવાસી પત્રકાર રાજેશ પરીખ
About the Author
