મુખ્ય હાઇલાઇટ્સ:
- અમરેલીના ચિતલ રોડ સ્થિત નૂતન સ્કૂલ પાસે નિર્મિત ‘કેસરી વિજય ચોક’ ખાતે ભવ્ય વિજયસ્થંભ પર શાસ્ત્રોક્ત વિધિથી ધ્વજારોહણ સંપન્ન.
- સનાતન સંસ્કૃતિ, શૌર્ય અને સમર્પણના પ્રતીક સમાન ભગવા ધ્વજારોહણમાં ઉર્જા મંત્રી કૌશિકભાઈ વેકરિયા અને સાંસદ ભરતભાઈ સુતરિયા રહ્યા ઉપસ્થિત.
- વિશ્વ હિન્દુ પરિષદ અને આંતરરાષ્ટ્રીય હિન્દુ પરિષદ સહિતના વિવિધ સંગઠનોના હોદ્દેદારો અને વિશાળ જનમેદની બની ઐતિહાસિક ક્ષણની સાક્ષી.
- નાત-જાતના વાડા ભૂલી અખંડ હિન્દુ સમાજના નિર્માણનો પ્રબળ સંદેશ અપાયો, પ્રત્યેક વોર્ડમાં વિજયસ્થંભ સ્થાપવા પ્રબળ લોકમાગ.
ચિતલ રોડ પર સનાતન સંસ્કૃતિના પ્રતીક સમાન ‘કેસરી વિજય ચોક’નું લોકાર્પણ
સનાતન હિન્દુ સંસ્કૃતિના ગૌરવ, શૌર્ય, ત્યાગ, બલિદાન અને અખંડ એકતાના પ્રતીક સમા ભગવા ધ્વજનું અમરેલીના ચિતલ રોડ સ્થિત નૂતન સ્કૂલના ખૂણે નિર્માણ પામેલા ‘કેસરી વિજય ચોક’ ખાતે ભવ્ય વિજયસ્થંભ પર પૂર્ણ ગરિમા અને દબદબાભેર ધ્વજારોહણ કરવામાં આવ્યું હતું. હિન્દુ સંમેલન સમિતિ દ્વારા આયોજિત આ કાર્યક્રમમાં વિશાળ જનમેદની સાથે રાજસત્તા અને ધર્મસત્તાના શીર્ષસ્થ મહાનુભાવો ઉપસ્થિત રહ્યા હતા. શાસ્ત્રોક્ત વિધિ અને વૈદિક મત્રોચ્ચાર સાથે કેસરી ધ્વજ લહેરાવવામાં આવતાં સમગ્ર વાતાવરણ ભક્તિમય બની ગયું હતું.
રાજકીય અને સામાજિક નેતૃત્વની ગરિમાપૂર્ણ ઉપસ્થિતિ
આ ગૌરવવંતા કાર્યક્રમમાં ગુજરાત સરકારના ઉર્જા અને પેટ્રોકેમિકલ્સ મંત્રી કૌશિકભાઈ વેકરિયા તેમજ સાંસદ ભરતભાઈ સુતરિયા વિશેષ ઉપસ્થિત રહ્યા હતા. આ ઉપરાંત સ્થાનિક શાસન વ્યવસ્થા તરફથી અમરેલી નગરપાલિકા પ્રમુખ વૈશાલીબેન માંગરોળિયા, ઉપપ્રમુખ વિરલભાઈ પોપટ, કારોબારી ચેરમેન મૌલિકભાઈ ઉપાધ્યાય, શાસક પક્ષના દંડક દિલાભાઈ વાળા સહિત તમામ વોર્ડના નગરસેવકો અને નગરસેવિકાઓ મોટી સંખ્યામાં જોડાયા હતા.
ધર્મસત્તા અને હિન્દુ સંગઠનો દ્વારા એકતાનો શંખનાદ
કાર્યક્રમમાં ધર્મસત્તાનું પ્રતિનિધિત્વ કરતા વિશ્વ હિન્દુ પરિષદના જિલ્લા અધ્યક્ષ વિજયભાઈ દેસાઈ, ઉપાધ્યક્ષ રવિરાજભાઈ શેખવા, સંગઠન મંત્રી રશ્મિનભાઈ ત્રિવેદી, પી. કે. ત્રિવેદી, નગર મંત્રી પંકજભાઈ કાનાણી તેમજ દુર્ગાવાહિની અને માતૃશક્તિ સંગઠનની બહેનો ઉત્સાહભેર જોડાયા હતા. તેમજ આંતરરાષ્ટ્રીય હિન્દુ પરિષદના પ્રદેશ કાર્યકારી અધ્યક્ષ ડૉ. જી. જે. ગજેરા, પ્રાંત મંત્રી મજબૂતભાઈ બસિયા, મજદૂર સંઘના અધ્યક્ષ સુરેશભાઈ સોલંકી, બજરંગ દળના અગ્રણીઓ સહિત અમરેલીના અગ્રણી વેપારીઓ અને સર્વ હિન્દુ સમાજના શ્રેષ્ઠીઓ આ ઐતિહાસિક ક્ષણના સાક્ષી બન્યા હતા.
સામાજિક સમરસતાનો સંકલ્પ અને દરેક વોર્ડમાં વિજયસ્થંભ સ્થાપવાની માંગ
આ અવસરે ઉપસ્થિત વક્તાઓએ જણાવ્યું હતું કે કેસરી ધ્વજ એ માત્ર ધ્વજ નથી, પરંતુ સમર્પણ, પવિત્રતા અને સનાતનની અજેય પરંપરાનું પ્રતીક છે. અહીંથી પસાર થતો પ્રત્યેક નાગરિક આ ધ્વજને નિહાળી જાતિ-પાતિ કે નાત-જાતના વાડા ભૂલી માત્ર એક અને અખંડ હિન્દુ બની દેશ અને ધર્મના હિતમાં ઊભો રહે તે જ આ સ્થાપનાનો મુખ્ય હેતુ છે. કાર્યક્રમના અંતે ચિતલ રોડ હિન્દુ સંમેલન સમિતિ દ્વારા મંત્રીશ્રી, સાંસદશ્રી અને શાસકો સમક્ષ ભારપૂર્વક માંગણી કરાઈ હતી કે, સમગ્ર શહેરમાં સનાતન ચેતના પ્રજ્વલિત રહે તે માટે અમરેલીના પ્રત્યેક વોર્ડ વિસ્તારમાં આવા પવિત્ર કેસરી વિજયસ્થંભ ઊભા કરવામાં આવે.
અહેવાલ ભાવેશ વાઘેલા અમરેલી
About the Author
