મુખ્ય હાઇલાઇટ્સ:
- જામનગર પોલીસ દ્વારા વિભિન્ન પ્રોહિબિશન કેસોમાં જપ્ત કરાયેલ રૂ. ૨,૦૩,૭૪,૦૦૦ ની કિંમતનો દારૂનો જથ્થો નાશ કરાયો.
- કાયદેસરની પ્રક્રિયા હેઠળ કુલ ૫૪,૯૯૧ વિદેશી દારૂની બોટલો પર બુલડોઝર-રોલર ફેરવી નિકાલ કરાયો.
- કોર્ટના આદેશ અને એસડીએમની પૂર્વ મંજૂરી મેળવ્યા બાદ ચુસ્ત પોલીસ બંદોબસ્ત વચ્ચે હાથ ધરાઈ કાર્યવાહી.
- પંચ-એ, પંચ-બી, સિક્કા, કાલાવડ ટાઉન અને કાલાવડ ગ્રામ્ય પોલીસ સ્ટેશનના મુદ્દામાલનો કરાયો નાશ.
જામનગરમાં રૂ. ૨.૦૩ કરોડના વિદેશી દારૂ પર રોલર ફરી વળ્યું
જામનગર જિલ્લા પોલીસ તંત્ર દ્વારા પ્રોહિબિશનના ગુનાઓ સામે સખત કાર્યવાહી હાથ ધર્યા બાદ જપ્ત કરવામાં આવેલા ગેરકાયદે વિદેશી દારૂના જથ્થાનો નિકાલ કરવાની મોટી ઝુંબેશ હાથ ધરવામાં આવી હતી. જિલ્લામાં કાયદો અને વ્યવસ્થાની જાળવણીના ભાગરૂપે જામનગર પોલીસ દ્વારા કુલ રૂ. ૨,૦૩,૭૪,૦૦૦ ની કિંમતની ૫૪,૯૯૧ જેટલી વિદેશી દારૂની બોટલો પર રોલર ફેરવીને તેનો ભવ્ય પાયે નાશ કરવામાં આવ્યો હતો. આ કાર્યવાહીને પગલે અસામાજિક તત્વો અને બૂટલેગરોમાં ભારે ફફડાટ વ્યાપી ગયો છે.
છેલ્લા ૪ થી ૫ મહિનામાં ૫ પોલીસ સ્ટેશન વિસ્તારમાંથી જપ્ત કરાયો હતો જથ્થો
મળતી વિગતો અનુસાર, છેલ્લા ૪ થી ૫ મહિના દરમિયાન જામનગર શહેર અને ગ્રામ્ય વિસ્તારના વિવિધ પોલીસ સ્ટેશનો હેઠળ પ્રોહિબિશનના અનેક કેસો દાખલ કરવામાં આવ્યા હતા. આ દરોડા દરમિયાન જપ્ત કરવામાં આવેલો દારૂનો જથ્થો મુદામાલ તરીકે રાખવામાં આવ્યો હતો. આ કામગીરીમાં પંચ-એ, પંચ-બી, સિક્કા, કાલાવડ ટાઉન અને કાલાવડ ગ્રામ્ય એમ કુલ પાંચ પોલીસ સ્ટેશનના સીમાડામાંથી જપ્ત કરાયેલા દારૂના જથ્થાનો સમાવેશ થાય છે. તમામ કેસોમાં જપ્ત કરાયેલ મુદ્દામાલના નિકાલ માટેની કાયદેસરની તમામ પ્રક્રિયાઓ પૂર્ણ કરવામાં આવી હતી.
કોર્ટ અને એસડીએમના આદેશથી કાયદેસરની પ્રક્રિયા સંપન્ન
નામદાર કોર્ટના હુકમ અને એસડીએમની મંજૂરી મળ્યા બાદ નિયમોનુસાર દારૂના આ મોટા જથ્થાનો નાશ કરવાની સત્તાવાર કાર્યવાહી હાથ ધરવામાં આવી હતી. સ્થળ પર તમામ બોટલો ગોઠવીને તેના પર રોલર ફેરવીને દારૂનો સંપૂર્ણ નાશ કરાયો હતો. આ અંગે જામનગર ગ્રામ્યના ડીવાયએસપી પીયુષ વાંદાએ વિગતો આપતાં જણાવ્યું હતું કે પ્રોહિબિશનના કેસોમાં જપ્ત કરાયેલા મુદ્દામાલના નિકાલની કાયદાકીય પ્રક્રિયા સફળતાપૂર્વક પૂર્ણ કરી દેવામાં આવી છે અને આગામી દિવસોમાં પણ દારૂબંધીના કડક અમલ માટે પોલીસનું આ સઘન અભિયાન જારી રહેશે.
અહેવાલ: ફારૂક બિલખિયા
About the Author
