મુખ્ય હાઇલાઇટ્સ:
- અમરેલી થી હરિપુરા જતી એસ.ટી. બસ સેવા તંત્ર દ્વારા બંધ કરાતાં ગ્રામજનો અને વિદ્યાર્થીઓ પરેશાન હતા.
- અમરેલી તાલુકા પંચાયતના સદસ્ય અને તાલુકા કોંગ્રેસ પ્રમુખ વિપુલ પોંકિયા સમક્ષ ગ્રામજનોએ કરી હતી રજૂઆત.
- અમરેલી ડેપો મેનેજર સાથે સ્થળ પર ચર્ચા કરી જરખીયા સુધી મર્યાદિત બસ રૂટને સુરગપુરા અને હરિપુરા સુધી લંબાવવામાં આવ્યો.
- આસપાસના ૧૦ થી વધુ ગામોના મુસાફરો, નોકરિયાતો અને વિદ્યાર્થીઓ માટે વાહનવ્યવહારની સુવિધા પુનઃ પૂર્વવત થઈ.
હરિપુરા રૂટની બસ સેવા બંધ થતાં દસથી વધુ ગામોના મુસાફરો પરેશાન
અમરેલીથી ઉપડીને નાના માચિયાળા, મોટા માચિયાળા, શેડુભાર, ખીજડીયા રાદડિયા, અડતાલા, જરખીયા, સુરેગપુરા અને હરિપુરા ગામોને સાંકળતી એસ.ટી. બસ સેવાને તંત્ર દ્વારા અમુક કારણોસર હરિપુરા સુધી બંધ કરી દેવામાં આવી હતી. આ બસ રૂટને માત્ર જરખીયા સુધી જ મર્યાદિત કરી દેવાતાં આસપાસના ગ્રામીણ વિસ્તારોના નાગરિકો, દૈનિક અપ-ડાઉન કરતા નોકરિયાતો તેમજ શાળા-કોલેજ જતા વિદ્યાર્થીઓને અમરેલી આવવા-જવામાં અત્યંત વિકટ પરિસ્થિતિનો સામનો કરવો પડતો હતો. ખાનગી વાહનોના મોંઘા ભાડા અને સમયસર વાહન ન મળવાના કારણે ગ્રામજનોમાં વહીવટી તંત્ર સામે ભારે અસંતોષ વ્યાપ્યો હતો.
તાલુકા પંચાયત સદસ્ય વિપુલ પોંકિયાએ રજૂઆત કરી મોરચો સંભાળ્યો
આ ગંભીર લોકપ્રશ્ન અંગે સ્થાનિક ગ્રામજનો અને વિદ્યાર્થીઓ દ્વારા અમરેલી તાલુકા પંચાયતના સદસ્ય અને અમરેલી તાલુકા કોંગ્રેસ પ્રમુખ વિપુલ પોંકિયાને વિગતવાર રજૂઆતો કરવામાં આવી હતી. ગ્રામજનોની રજૂઆત અને મુશ્કેલીઓની ગંભીરતાને ધ્યાને લઈને વિપુલ પોંકિયાએ તાત્કાલિક ધોરણે આ મામલે સક્રિયતા દાખવી હતી. તેમણે એસ.ટી. નિગમના અમરેલી ડેપો મેનેજર સાથે સીધો સંપર્ક સાધીને બંધ કરી દેવાયેલી બસ સેવાને પૂર્વવત કરવા માટે ધારદાર અને સફળ રજૂઆત કરી હતી.
ડેપો મેનેજરે રૂટ પુનઃ શરૂ કરવાનો આપ્યો આદેશ, પ્રજાજનોમાં આનંદ
તાલુકા પંચાયત સદસ્યની સચોટ રજૂઆત અને પ્રજાની વ્યાજબી માગણીને ધ્યાને રાખીને અમરેલી ડેપો મેનેજર દ્વારા તાત્કાલિક હકારાત્મક નિર્ણય લેવામાં આવ્યો હતો. જરખીયા સુધી મર્યાદિત કરી દેવાયેલી અમરેલી-હરિપુરા બસ સેવાને હવે પુનઃ સુરગપુરા અને હરિપુરા સુધી લંબાવીને વિધિવત રીતે શરૂ કરી દેવામાં આવી છે. લાંબા સમયથી બંધ પડેલી એસ.ટી. બસ સેવા પુનઃ શરૂ થતાં વિદ્યાર્થીઓ, મહિલાઓ અને રાહદારીઓમાં હર્ષની લાગણી ફેલાઈ છે અને લોકપ્રશ્નનો સુખદ ઉકેલ લાવવા બદલ ગ્રામજનોએ તાલુકા પંચાયત સદસ્યનો આભાર વ્યક્ત કર્યો હતો.
About the Author
