મુખ્ય હાઇલાઇટ્સ:
- વન અને પર્યાવરણ મંત્રીને ઉદ્દેશીને આપાતકાલીન કાયમી સુરક્ષા વ્યવસ્થા કરવા આપ આપ્યું આવેદનપત્ર.
- અરજણસુખ અને હનુમાન ખીજડીયામાં સિંહણ તથા દીપડાના હુમલા બાદ પાકની મોસમ ટાણે જ ખેડૂતોમાં ફફડાટ.
- ૨ ઓક્ટોબરે અરજણસુખમાં સિંહણના હુમલામાં વનકર્મી સહિત ૫ લોકો ઘાયલ થતાં પરિસ્થિતિ ગંભીર બની.
- માત્ર પાંજરા મૂકવાને બદલે હિંસક પ્રાણીઓની હિલચાલ પર સતત વોચ રાખી અસરગ્રસ્તોને યોગ્ય વળતર આપવા માંગ.
સિંહ-દીપડાના આતંકથી કુંકાવાવ-વડિયા પંથકમાં ભય, આવેદનપત્ર સુપ્રત
કુંકાવાવ-વડિયા વિધાનસભા વિસ્તારમાં છેલ્લા કેટલાક સમયથી જંગલ બહાર આવેલા માનવ વસાહતો નજીક સિંહ તેમજ દીપડાના હુમલાની ઘટનાઓ દિન-પ્રતિદિન વધી રહી છે. જેને પગલે આમ આદમી પાર્ટીના અમરેલી વિધાનસભાના ખેડૂત મોરચાના સંગઠન મંત્રી મનસુખભાઈ હરિભાઈ ગોંડલિયાએ ખેડૂતો અને સ્થાનિકોને સાથે રાખીને વડિયા મામલતદારને આવેદનપત્ર પાઠવ્યું હતું. ગાંધીનગર ખાતે વન અને પર્યાવરણ મંત્રીને ઉદ્દેશીને આપવામાં આવેલા આ આવેદનપત્ર મારફતે કુંકાવાવ-વડિયા પંથકમાં વન્યપ્રાણીઓના માનવી પરના હુમલા અટકાવવા માટે તાત્કાલિક ધોરણે કડક અને અસરકારક પગલાં ભરવાની ઉગ્ર માંગ કરવામાં આવી છે.
અરજણસુખમાં વનકર્મી સહિત ૫ લોકો ઈજાગ્રસ્ત, ખેતી કાર્ય થંભી ગયું
આવેદનપત્રમાં જણાવ્યા મુજબ, તાલુકાના અરજણસુખ અને હનુમાન ખીજડીયા ગામમાં સિંહણ અને દીપડાના હુમલાના કારણે ગ્રામજનોમાં ભારે દહેશત વ્યાપી ગઈ છે. ખાસ કરીને તારીખ ૨ ઓક્ટોબર ૨૦૨૬ ના રોજ અરજણસુખ ગામની સીમમાં સિંહણ દ્વારા કરાયેલા હુમલામાં વનકર્મી સહિત પાંચ વ્યક્તિઓ ઈજાગ્રસ્ત થયા હતા. અગાઉ પણ વન વિભાગને આ અંગે રજૂઆતો કરવા છતાં યોગ્ય પગલાં ન લેવાયાનો આક્ષેપ કરાયો છે. હાલ ચોમાસું પાકની લણણી અને ખેતીની મોસમ પૂરજોશમાં ચાલી રહી છે ત્યારે જ વન્યપ્રાણીઓનો આતંક વધતાં ખેડૂતો અને ખેતમજૂરો માટે ખેતરમાં જઈને કામ કરવું અત્યંત જોખમી અને મુશ્કેલ બની ગયું છે.
આપના આગેવાનોએ કાયમી સુરક્ષા અને યોગ્ય વળતરની કરી માંગ
આમ આદમી પાર્ટીના નેતાઓએ સ્પષ્ટ કર્યું કે વન વિભાગ દ્વારા માત્ર પાંજરા મૂકીને સંતોષ માનવાને બદલે હિંસક પ્રાણીઓની હિલચાલ પર સતત દેખરેખ રાખવા માટે કાયમી અને આધુનિક સુરક્ષા વ્યવસ્થા ઊભી કરવી જોઈએ. આ સાથે જ હુમલાનો ભોગ બનેલા અસરગ્રસ્તોને તાત્કાલિક યોગ્ય વળતર ચૂકવવાની માંગ કરાઈ છે. આ આવેદનપત્ર આપતી વખતે કિસાન મોરચાના મનસુખભાઈ ગોંડલીયા, લોકસભા સંગઠન મંત્રી સુખાભાઈ વાળા, દિલીપભાઈ શીંગાળા, ભીખુભાઇ વોરા, ભીખુભાઇ ચાક, સંજયભાઈ ઉકાણી, જગદીશભાઈ સાવલિયા અને કમલેશભાઈ પાઘડાળ સહિતના અગ્રણીઓ અને ગ્રામજનો ઉપસ્થિત રહ્યા હતા. હવે જોવાનું એ રહેશે કે વન વિભાગ આ મામલે શું નક્કર કાર્યવાહી કરે છે.
અહેવાલ: ફારૂક બિલખીયા અમરેલી
About the Author
