મુખ્ય હાઇલાઇટ્સ:
- રાજમહેલ પરિસર ખાતે નગરપાલિકા પ્રમુખ વૈશાલીબહેન માંગરોળીયા અને કલેક્ટર વિકલ્પ ભારદ્વાજના અધ્યક્ષસ્થાને યોજાયો કાર્યક્રમ.
- ‘સ્વચ્છ અમરેલી, હરિત અમરેલી’ના સંકલ્પ સાથે પદાધિકારીઓ, અધિકારીઓ અને નાગરિકોએ ઉત્સાહભેર કર્યું શ્રમદાન.
- ઈવીએમ વેરહાઉસના પ્રાંગણમાં સામાજિક વનીકરણ વિભાગના સહયોગથી વડના વૃક્ષનું કરાયું વાવેતર.
- ‘ક્લિન-અપ અમરેલી’ સંસ્થાના સ્વયંસેવકો અને સફાઈ કર્મચારીઓની ટીમે કચરાનો યોગ્ય નિકાલ કર્યો.
રાજમહેલ પરિસર ખાતે સઘન સફાઈ અને જનભાગીદારીથી શ્રમદાન
રાજ્ય સરકાર દ્વારા દર મહિનાના પ્રથમ રવિવારે ‘સઘન સફાઈ અભિયાન’, ‘કેચ ધ રેઈન’ અંતર્ગત જળસંચય તથા વૃક્ષારોપણ અને સુકાઈ ગયેલા રોપાઓની ફેરબદલી સહિતની ત્રિવિધ પર્યાવરણલક્ષી કામગીરી હાથ ધરવામાં આવે છે. આ અભિયાન અંતર્ગત અમરેલી શહેરમાં ઓક્ટોબર માસના પ્રથમ રવિવારે રાજમહેલ પરિસર ખાતે વિશેષ કાર્યક્રમનું આયોજન કરવામાં આવ્યું હતું. નગરપાલિકા પ્રમુખ વૈશાલીબહેન માંગરોળીયા અને જિલ્લા કલેક્ટર વિકલ્પ ભારદ્વાજની અધ્યક્ષતામાં યોજાયેલા આ કાર્યક્રમમાં રાજમહેલ પરિસર તથા જિલ્લા આપત્તિ વ્યવસ્થાપન કચેરીની આસપાસના વિસ્તારમાં સઘન સફાઈ અભિયાન હાથ ધરાયું હતું, જેમાં પદાધિકારીઓ, વહીવટીતંત્રના અધિકારીઓ અને નાગરિકોએ ‘સ્વચ્છ અમરેલી, હરિત અમરેલી’ના સંકલ્પ સાથે ઉત્સાહભેર શ્રમદાન કર્યું હતું.
ઈવીએમ વેરહાઉસ પ્રાંગણમાં વૃક્ષારોપણ અને સ્વયંસેવકોનું યોગદાન
સફાઈ ઝુંબેશ બાદ ચૂંટણીપંચના ઈવીએમ વેરહાઉસના પ્રાંગણમાં અમરેલી નગરપાલિકાના ઉપપ્રમુખ વિરલભાઈ પોપટ સહિતના મહાનુભાવોના હસ્તે સામાજિક વનીકરણ વિભાગના સહયોગથી વડના વૃક્ષનું વાવેતર કરવામાં આવ્યું હતું. આ ઝુંબેશમાં અમરેલીમાં સક્રિય ‘ક્લિન-અપ અમરેલી’ સંસ્થાના સ્વયંસેવકો પણ જોડાયા હતા. સફાઈ કામગીરી દરમિયાન એકત્ર થયેલા કચરાના યોગ્ય નિકાલ માટે નગરપાલિકાના સફાઈ કર્મચારીઓની ટીમ દ્વારા ત્વરિત વ્યવસ્થા કરવામાં આવી હતી.
કાર્યક્રમમાં પદાધિકારીઓ અને અધિકારીઓની ઉપસ્થિતિ
પર્યાવરણ જતન અને સ્વચ્છતાના આ ત્રિવિધ અભિયાન અંતર્ગત જિલ્લામાં દર મહિને આ પ્રવૃત્તિઓ સતત ચાલુ રાખવામાં આવશે. આ પ્રસંગે નગરપાલિકાના સભ્યો અલકાબહેન ગોંડલીયા, કોમલબહેન રામાણી, સંગીતાબહેન ચાવડા, નીતિનભાઈ આસર, જિલ્લા આંકડા અધિકારી ડી.એ. ગોહિલ, અગ્રણી હરેશભાઈ ચાવડા, ‘ક્લિન-અપ અમરેલી’ના સ્વયંસેવક અક્ષતાબહેન કાળે, ઇબ્રાહીમભાઈ ત્રવાડી તેમજ અમરેલી ફાયર બ્રિગેડના કર્મયોગીઓ સહિતના સ્વયંસેવકો અને નાગરિકો મોટી સંખ્યામાં હાજર રહ્યા હતા.
અહેવાલ જીજ્ઞેશ બારૈયા
About the Author
