મુખ્ય હાઇલાઇટ્સ:
- વડીયા તાલુકાના અરજણસુખ અને તોરી ગામ વિસ્તારમાં સિંહણના અચાનક હુમલાથી ભયનો માહોલ.
- હુમલામાં ભોગ બનેલા વનકર્મી અને અન્ય ૪ નાગરિકો અમરેલી શાંતાબા સિવિલ હોસ્પિટલમાં દાખલ.
- કાયદો અને ઊર્જા રાજ્યમંત્રી કૌશિકભાઈ વેકરીયાએ હોસ્પિટલ પહોંચી ઇજાગ્રસ્તોના ખબર-અંતર પૂછ્યા.
- તબીબોને શ્રેષ્ઠ સારવાર આપવા અને વન વિભાગને ગ્રામ્ય વિસ્તારોમાં સઘન પેટ્રોલિંગ હાથ ધરવા સૂચના.
વડીયા પંથકમાં સિંહણના હુમલામાં વનકર્મી સહિત ૫ લોકો ઇજાગ્રસ્ત
અમરેલી જિલ્લાના વડીયા તાલુકામાં આવેલા અરજણસુખ અને તોરી ગામ વિસ્તારમાં તાજેતરમાં સિંહણ દ્વારા અચાનક કરવામાં આવેલા અલગ અલગ હુમલાની અત્યંત સંવેદનશીલ દુર્ઘટના સામે આવી છે. આ દુર્ઘટનામાં ફરજ પરના વનકર્મી સહિત કુલ પાંચ નાગરિકો ઈજાગ્રસ્ત થયા છે. ઘટનાને પગલે તમામ ઈજાગ્રસ્તોને તાત્કાલિક અસરથી વધુ સારવાર અર્થે અમરેલી સ્થિત શાંતાબા સિવિલ હોસ્પિટલ ખાતે ખસેડવામાં આવ્યા છે, જ્યાં હાલ તમામ દર્દીઓ તબીબોની દેખરેખ હેઠળ સારવાર મેળવી રહ્યા છે.
રાજ્યમંત્રી કૌશિકભાઈ વેકરીયાએ સિવિલ હોસ્પિટલની લીધી રૂબરૂ મુલાકાત
ઇજાગ્રસ્તોની આરોગ્ય વિષયક સ્થિતિની ત્વરિત સમીક્ષા કરવા અને તેમના પરિવારજનોને આશ્વાસન આપવા માટે રાજ્યના કાયદો અને ઊર્જા રાજ્યમંત્રી કૌશિકભાઈ વેકરીયાએ અમરેલી શાંતાબા સિવિલ હોસ્પિટલ ખાતે રૂબરૂ મુલાકાત લીધી હતી. રાજ્યમંત્રીએ પ્રત્યેક ઇજાગ્રસ્ત નાગરિક પાસે પહોંચીને અત્યંત સંવેદનાપૂર્વક તેમના સ્વાસ્થ્યની પૃચ્છા કરી હતી અને પરિવારજનોને મુશ્કેલીની આ ઘડીમાં ધીરજ રાખવા જણાવ્યું હતું. આ સાથે તેમણે સિવિલ હોસ્પિટલના તબીબી સ્ટાફ સાથે બેઠક કરી દર્દીઓની સારવાર અંગેની વિગતવાર માહિતી મેળવી હતી અને તમામ ઇજાગ્રસ્તોને સમયસર અને ઉચ્ચ ગુણવત્તાયુક્ત સારવાર આપવા કડક આદેશ કર્યા હતા.
સરકાર અસરગ્રસ્તોની પડખે, વન વિભાગને સઘન પેટ્રોલિંગના આદેશ
આ પ્રસંગે રાજ્યમંત્રીશ્રીએ સ્પષ્ટ કર્યું હતું કે, આપત્તિની આ કપરી ઘડીમાં રાજ્ય સરકાર અસરગ્રસ્તોની પડખે અડીખમ ઊભી છે અને નાગરિકોની સારવારમાં કોઈ પણ પ્રકારની ઉણપ રાખવામાં આવશે નહીં. આ સાથે જ તેમણે વન વિભાગના ઉચ્ચ અધિકારીઓને સ્થાનિક ગ્રામ્ય વિસ્તારોમાં ત્વરિત સઘન પેટ્રોલિંગ હાથ ધરવા, માનવ-વન્યજીવ સંઘર્ષ અટકાવવા અને લોકસુરક્ષા સુનિશ્ચિત કરવા માટેના જરૂરી તમામ પગલાં તાત્કાલિક ધોરણે લેવા આદેશ આપ્યા હતા.
રિપોર્ટર જીજ્ઞેશ બારૈયા
About the Author
