મુખ્ય હાઇલાઇટ્સ:
- અમદાવાદ જિલ્લાના ધંધુકા ખાતે શ્રી ડી.એ. વિદ્યામંદિરમાં ભવ્ય શાળા કક્ષાનું વિજ્ઞાન પ્રદર્શન યોજાયું.
- ધોરણ ૬ થી ૧૨ ના ૧૦૦ થી વધુ વિદ્યાર્થીઓએ શિક્ષકોના માર્ગદર્શન હેઠળ ૫૨ જેટલી કૃતિઓ તૈયાર કરી.
- સ્માર્ટ સિટી, ચંદ્રયાન-૩, ઓટોમેટિક સિંચાઈ અને સ્માર્ટ બ્લાઈન્ડ સ્ટીક જેવા મોડેલો આકર્ષણનું કેન્દ્ર બન્યા.
- યુ.કે. સ્થિત ભૂતપૂર્વ તેજસ્વી વિદ્યાર્થીની વિધિ મેર દ્વારા બાળ વૈજ્ઞાનિકોને પ્રોત્સાહિત કરાયા.
શ્રી ડી.એ. વિદ્યામંદિરમાં યોજાયું ભવ્ય વિજ્ઞાન પ્રદર્શન
અમદાવાદ જિલ્લાના ધંધુકા તાલુકાના ધંધુકા સ્થિત પ્રતિષ્ઠિત ‘શ્રી ડી.એ. વિદ્યામંદિરમાં’ શાળા કક્ષાના ભવ્ય વિજ્ઞાન પ્રદર્શનનું આયોજન કરવામાં આવ્યું હતું. આ પ્રદર્શનમાં શાળાના વિદ્યાર્થીઓ અને શિક્ષકોમાં વિજ્ઞાન પ્રત્યેનો અનેરો ઉત્સાહ અને નવીનતમ વિચારસરણી જોવા મળી હતી. શાળાના ધોરણ ૬ થી ૧૨ ના ૧૦૦ થી વધુ ઉત્સાહી બાળ વૈજ્ઞાનિકોએ વિજ્ઞાન શિક્ષકોના સુચારુ માર્ગદર્શન હેઠળ કુલ ૫૨ જેટલી વિવિધ વિષયો પર આધારિત આકર્ષક કૃતિઓ અને પ્રયોગો તૈયાર કરીને રજૂ કર્યા હતા.
અવકાશ વિજ્ઞાનથી લઈને ખેતી અને આરોગ્ય વિષયક પ્રયોગો રહ્યા વિશેષ આકર્ષણ
આ વિજ્ઞાન પ્રદર્શનમાં બાળ વૈજ્ઞાનિકો દ્વારા રજૂ કરવામાં આવેલા પ્રયોગો મુલાકાતીઓ માટે ભારે આકર્ષણનું કેન્દ્ર બન્યા હતા. સ્માર્ટ સિટી અને પર્યાવરણ વિભાગમાં કચરામાંથી વીજળી ઉત્પન્ન કરવાનો પ્રોજેક્ટ તેમજ વરસાદી પાણીના સંગ્રહનું વર્કિંગ મોડેલ રજૂ કરાયું હતું. અવકાશ વિજ્ઞાન ક્ષેત્રે ભારતની સિદ્ધિઓને દર્શાવતા ચંદ્રયાન-૩ અને આદિત્ય એલ-૧ મિશનના મોડેલો લોકોએ ખૂબ બિરદાવ્યા હતા. આ ઉપરાંત ખેતીમાં વિજ્ઞાનના ઉપયોગ હેઠળ ઓટોમેટિક સિંચાઈ સિસ્ટમ અને હાઈડ્રોપોનિક્સ પદ્ધતિ તથા આરોગ્ય ક્ષેત્રે સ્માર્ટ બ્લાઈન્ડ સ્ટીક, ફાયર એલાર્મ અને માનવ શરીરના અંગોની કાર્યપ્રણાલી દર્શાવતા મોડેલોએ લોકોને મંત્રમુગ્ધ કર્યા હતા.
યુ.કે. સ્થિત પૂર્વ વિદ્યાર્થીની વિધિ મેર દ્વારા બાળ વૈજ્ઞાનિકોનું બહુમાન
શાળાના આ કલાત્મક અને વૈજ્ઞાનિક મહોત્સવમાં ભાગ લેનાર તમામ બાળ વૈજ્ઞાનિકોના ઉત્સાહમાં વધારો કરવા માટે વિશેષ પ્રોત્સાહન પૂરું પાડવામાં આવ્યું હતું. વિદ્યામંદિરની ભૂતપૂર્વ તેજસ્વી વિદ્યાર્થીની અને હાલ યુનાઈટેડ કિંગડમ (યુ.કે.) ખાતે સ્થાયી થયેલા વિધિ મેર દ્વારા તમામ ભાગ લેનાર વિદ્યાર્થીઓને ઈનામ અને પ્રમાણપત્ર આપીને સન્માનિત કરવામાં આવ્યા હતા. ભૂતપૂર્વ વિદ્યાર્થીનીની હાજરી અને પ્રોત્સાહને બાળ વૈજ્ઞાનિકોમાં ભવિષ્યમાં વિજ્ઞાન ક્ષેત્રે વધુ આગળ વધવાનો નવો ઉમંગ જગાવ્યો હતો.
ગાંધીનગર પ્રવાસી પત્રકાર રાજેશ પરીખ
About the Author
