મુખ્ય હાઇલાઇટ્સ:
- સમગ્ર ગુજરાતના દરિયાકાંઠા પર તકેદારી વધારવા મરીન ટાસ્ક ફોર્સ દ્વારા વિશેષ કોસ્ટલ પેટ્રોલિંગ ડ્રાઇવ યોજાઈ.
- પીપાવાવ સેક્ટરના કમાન્ડો દ્વારા વઢેરાથી સરકેશ્વર સુધીના દરિયાઈ વિસ્તારમાં હાથ ધરાયું સઘન ચેકિંગ.
- શંકાસ્પદ બોટ, માદક પદાર્થોની હેરાફેરી અને ગેરકાયદેસર પ્રવૃત્તિઓ અંગે સ્થાનિકોને સતર્ક રહેવા અપાઈ સૂચના.
- દરિયામાંથી તણાઈને આવતા અજાણ્યા પદાર્થો કે યુદ્ધસામગ્રીને સ્પર્શ ન કરવા અને પોલીસને તાત્કાલિક જાણ કરવા અપીલ.
ઉચ્ચ પોલીસ અધિકારીઓના માર્ગદર્શન હેઠળ વઢેરાથી સરકેશ્વર સુધી સઘન પેટ્રોલિંગ
ગુજરાતના સમગ્ર દરિયાકાંઠા વિસ્તારમાં સુરક્ષા વ્યવસ્થા વધુ મજબૂત કરવા અને તકેદારીના ભાગરૂપે મરીન ટાસ્ક ફોર્સ દ્વારા એક વિશેષ કોસ્ટલ પેટ્રોલિંગ ડ્રાઇવનું આયોજન કરવામાં આવ્યું છે. મરીન ટાસ્ક ફોર્સના એડીજીપી અમિત વિશ્વકર્મા, ડીઆઈજીપી એ. એમ. મુનિયા તથા એસપી એસ. જે. પરમારના યોગ્ય માર્ગદર્શન હેઠળ અને ડીવાયએસપી જી. વી. વસાવાના નેતૃત્વમાં પીપાવાવ સેક્ટરના કમાન્ડો દ્વારા વઢેરાથી લઈને સરકેશ્વર સુધીના સમગ્ર દરિયાકાંઠાના વિસ્તારમાં સઘન કોસ્ટલ પેટ્રોલિંગ હાથ ધરવામાં આવ્યું હતું.
માછીમારો અને સ્થાનિકો સાથે સંવાદ, શંકાસ્પદ પ્રવૃત્તિઓ સામે વિશિષ્ટ ઝુંબેશ
સઘન પેટ્રોલિંગ દરમિયાન મરીન કમાન્ડોની ટીમ દ્વારા દરિયાકાંઠાના વિવિધ સંવેદનશીલ સ્થળોએ પહોંચીને ઝીણવટભર્યું ચેકિંગ હાથ ધરવામાં આવ્યું હતું. આ તકે ટીમે સ્થાનિક માછીમારો અને દરિયાકાંઠે વસતા નાગરિકો સાથે સીધો સંપર્ક સાધ્યો હતો. કોસ્ટલ સેફ્ટી અંગે માર્ગદર્શન આપતાં દરિયાઈ માર્ગે થતી શંકાસ્પદ વ્યક્તિઓની અવરજવર, બિનવારસી કે શંકાસ્પદ બોટ તેમજ માદક પદાર્થોની ગેરકાયદેસર હેરાફેરી જેવી તમામ દેશવિરોધી પ્રવૃત્તિઓ પર ખાસ નજર રાખવા અને આવી કોઈ માહિતી મળે તો તાત્કાલિક પોલીસ તંત્રને જાણ કરવા કડક સૂચનાઓ આપવામાં આવી હતી.
અજાણ્યા પદાર્થો કે યુદ્ધસામગ્રીથી દૂર રહેવા અને પોલીસને જાણ કરવા અપીલ
આ જાગૃતિ અભિયાન દરમિયાન મરીન ટાસ્ક ફોર્સ દ્વારા સ્થાનિકોને વિશેષ સાવચેતી રાખવા જણાવવામાં આવ્યું હતું. દરિયામાં સર્જાતી દુર્ઘટનાઓ કે વાવાઝોડાના કારણે તણાઈને કિનારે આવી શકતા ક્ષતિગ્રસ્ત જહાજો, બોટો તેમજ મિસાઈલ કે અન્ય કોઈપણ પ્રકારની આર્મ્સ-યુદ્ધસામગ્રી જેવા અજાણ્યા પદાર્થો કે વસ્તુઓથી હંમેશાં સુરક્ષિત અંતર જાળવવા જણાવવામાં આવ્યું હતું. આવી કોઈ પણ શંકાસ્પદ વસ્તુ નજરે પડે તો તેને સહેજ પણ સ્પર્શ કર્યા વિના તાત્કાલિક સ્થાનિક પોલીસ અથવા મરીન ટાસ્ક ફોર્સને જાણ કરવા નાગરિકોને સતર્ક કરવામાં આવ્યા હતા.
રિપોર્ટર: જીજ્ઞેશ બારૈયા, જાફરાબાદ
About the Author
