મુખ્ય હાઇલાઇટ્સ:
- વિદ્યાગુરુ ફાઉન્ડેશન અને મુંબઈના વિઝન ફાઉન્ડેશન ઓફ ઈન્ડિયા દ્વારા સાવરકુંડલા અને રાજુલાને ‘અંધાપા મુક્ત’ બનાવવાનું મહા-અભિયાન.
- પ્રખ્યાત નેત્ર ચિકિત્સક ડૉ. કુલીનભાઈ કોઠારીના માર્ગદર્શન હેઠળ નવજાત શિશુથી લઈ વૃદ્ધો સુધી સૌને મળશે ૧૦૦% નિઃશુલ્ક નેત્ર સારવાર.
- ગ્રામીણ વિસ્તારોમાં ‘વિઝન સેન્ટરો’ શરૂ કરી ઘરઆંગણે જ તપાસ, નિદાન, સારવાર અને મોતીયાના ઓપરેશન ફ્રી કરાશે.
- વિદ્યાગુરુ ફાઉન્ડેશનના પ્રમુખ હરેશભાઈ મહેતાએ તાલુકાનો એક પણ નાગરિક દ્રષ્ટિહીન ન રહે તે માટે સંપૂર્ણ સમર્પણનો વ્યક્ત કર્યો નિર્ધાર.
સાવરકુંડલા અને રાજુલા તાલુકાને અંધાપા મુક્ત બનાવવાનો દ્રઢ નિર્ધાર
અમરેલી જિલ્લાના સાવરકુંડલામાં આરોગ્ય ક્ષેત્રે ૧૦૦% નિઃશુલ્ક કામગીરી કરી રહેલા વિદ્યાગુરુ ફાઉન્ડેશન ટ્રસ્ટ અને મુંબઈ સ્થિત વિઝન ફાઉન્ડેશન ઓફ ઈન્ડિયાના સંયુક્ત ઉપક્રમે સાવરકુંડલા અને રાજુલા તાલુકામાંથી અંધાપાને જડમૂળથી દૂર કરવા માટે એક વિશેષ મહા-અભિયાનનો પ્રારંભ કરવામાં આવ્યો છે. ભારત દેશના સુપ્રસિદ્ધ નેત્ર ચિકિત્સક અને વિઝન ફાઉન્ડેશનના પ્રણેતા ડૉ. કુલીનભાઈ કોઠારીના માર્ગદર્શન હેઠળ આગામી વર્ષોમાં બંને તાલુકાઓને સંપૂર્ણપણે “અંધાપા મુક્ત” બનાવવાનો દ્રઢ સંકલ્પ કરવામાં આવ્યો છે.
અદ્યતન નેત્ર વિભાગ અને નિઃશુલ્ક સારવારની સુવિધા
આ મહા-પ્રકલ્પ અંતર્ગત વિદ્યાગુરુ ફાઉન્ડેશન સંચાલિત શ્રી લલ્લુભાઈ શેઠ આરોગ્ય મંદિર (ભરોસા બિલ્ડિંગ) ખાતે કાર્યરત નેત્ર વિભાગને વધુ વ્યાપક અને આધુનિક બનાવવામાં આવી રહ્યો છે. સૌરાષ્ટ્રમાં પ્રથમ સાવરકુંડલા અને ત્યારબાદ ભવિષ્યમાં રાજુલા સ્થિત શ્રી મહાત્મા ગાંધી આરોગ્ય મંદિર ખાતે મુખ્ય કેન્દ્રો શરૂ કરવામાં આવશે. આ અભિયાન હેઠળ તમામ વયજૂથના નાગરિકો માટે આંખોની સંપૂર્ણ મફત તપાસ, આધુનિક સારવાર અને મોતીયા સહિતના તમામ ઓપરેશનો વિના મૂલ્યે પૂરા પાડવામાં આવશે.
ગ્રામ્ય સ્તરે ‘વિઝન સેન્ટરો’ દ્વારા ઘરઆંગણે તપાસ અને શસ્ત્રક્રિયા
તાલુકાના ચારેય દિશાના ગ્રામ્ય વિસ્તારો જેવા કે જીરા, વંડા, બાઢડા અને હાથસણી રોડ ખાતે ખાસ ‘વિઝન સેન્ટરો’ (નોંધણી અને પ્રાથમિક નિદાન કેન્દ્રો) કાર્યરત કરાશે. જ્યાં લાયકાત ધરાવતા ઓપ્ટોમેટ્રિશિયન અને ટેકનિશિયનો દ્વારા સ્થાનિક સ્તરે જ નંબરની ચકાસણી તથા આંખની સામાન્ય તકલીફોનું નિદાન કરાશે. જ્યારે ગંભીર સમસ્યા કે મોતીયા ધરાવતા દર્દીઓને હોસ્પિટલ લાવી નિષ્ણાત ડૉક્ટરો દ્વારા આધુનિક ટેકનોલોજીથી સંપૂર્ણ મફત શસ્ત્રક્રિયા કરી આપવામાં આવશે.
માનવતાવાદી સેવા અને સંસ્થાના પ્રમુખનું નિવેદન
વિદ્યાગુરુ ફાઉન્ડેશનના ટ્રસ્ટી અને પ્રમુખ હરેશભાઈ મહેતાએ જણાવ્યું હતું કે, “ડૉ. કુલીનભાઈ કોઠારી અને વિઝન ફાઉન્ડેશનના આ ઉમદા વિઝન પ્રકલ્પને સાવરકુંડલાના આંગણે લાવી શકવું એ અમારા માટે ગૌરવની વાત છે. વિદ્યાગુરુ ફાઉન્ડેશન હંમેશાં ૧૦૦% નિઃશુલ્ક સેવા આપવા કટિબદ્ધ રહ્યું છે. આધુનિક ટેકનોલોજી અને માનવતાવાદી સેવાઓના સમન્વયથી તાલુકાનો એક પણ નાગરિક દ્રષ્ટિહીન ન રહે અને સૌને પ્રકાશમય જીવન મળે તે માટે બંને સંસ્થાઓ સંપૂર્ણ સમર્પણ ભાવથી કાર્ય કરશે.”
અહેવાલ :કિશોરભાઈ ખુમાણ
About the Author
