મુખ્ય હાઇલાઇટ્સ:
- મોટા આંકડીયા ગામેથી પ વર્ષના સગીર બાળકનું અપહરણ કરનાર આરોપી લલિત જમરેની ગણતરીના કલાકોમાં વીરપુર ખાતેથી અટકાયત.
- એલસીબી અને અમરેલી રૂરલ પોલીસની ૫ અલગ-અલગ ટીમોએ ૧૫ કલાક સુધી સતત ૧૭૦ થી વધુ સીસીટીવી કેમેરા ચકાસી સફળ ઓપરેશન પાર પાડ્યું.
- આરોપી પાસે મોબાઈલ ન હોવા છતાં નેત્રમ અને ત્રિનેત્ર શાખાની મદદથી બાઈક નંબરના આધારે જેતપુરથી વીરપુર સુધી પીછો કરાયો.
- અપહૃત બાળકને સુખરૂપ મુક્ત કરાવી તેના પરિવારજનો સાથે ભાવુક પુનઃમિલન કરાવતી અમરેલી પોલીસ.
વિશ્વાસઘાત કરી ખેતમજૂરના ૫ વર્ષના માસૂમ બાળકનું અપહરણ
ભાવનગર વિભાગના પોલીસ મહાનિરીક્ષક આર. વી. અસારી અને અમરેલી જિલ્લા પોલીસ અધિક્ષક સંજય ખરાત દ્વારા નાના બાળકોના અપહરણ જેવા ગંભીર બનાવોમાં ત્વરિત પગલાં ભરી બાળકને હેમખેમ શોધી કાઢવા ખાસ માર્ગદર્શન આપવામાં આવ્યું હતું. આ દરમિયાન અમરેલી તાલુકાના મોટા આંકડીયા ખાતે ખેતમજૂરી કરતા અને મૂળ મધ્યપ્રદેશના વતની રાકેશભાઈ બામણીયાએ પોતાના ૫ વર્ષના પુત્રના અપહરણ અંગે અમરેલી રૂરલ પોલીસ સ્ટેશનમાં ફરિયાદ નોંધાવી હતી. અગાઉ ઓળખાણના નાતે રહેવા આવેલા લલિત નામના શખ્સે ખેતરમાં મોટરસાઈકલ પર માસૂમ બાળકને બેસાડીને અપહરણ કરી પલાયન થઈ ગયો હતો.
મોબાઈલ વગરના આરોપીનો સીસીટીવી અને ‘નેત્રમ’ દ્વારા પીછો
ઘટનાની ગંભીરતા જોઈ અમરેલી વિભાગના નાયબ પોલીસ અધિક્ષક ચિરાગ દેસાઈની સૂચનાથી એલસીબી પોલીસ ઈન્સ્પેક્ટર સી. પી. વાઘેલા અને અમરેલી રૂરલ પીઆઈ ઓ. કે. જાડેજાની આગેવાનીમાં વિશેષ ટીમોનું ગઠન કરવામાં આવ્યું હતું. આરોપી પાસે મોબાઈલ ફોન ન હોવાથી પોલીસે માત્ર મોટરસાઈકલના નંબરના આધારે તપાસ શરૂ કરી હતી. અમરેલી જિલ્લા ‘નેત્રમ’ શાખા, રાજકોટ ગ્રામ્ય ‘નેત્રમ’ અને સ્ટેટ કંટ્રોલ રૂમ ગાંધીનગરની ‘ત્રિનેત્ર’ શાખાની મદદથી વાહનની લોકેશન જેતપુર ટાઉન તરફ હોવાનું માલૂમ પડ્યું હતું.
૧૫ કલાકની સઘન તપાસ બાદ વીરપુર ખાતેથી બાળકની મુક્તિ
પોલીસ ટીમોએ રાજકોટ-પોરબંદર નેશનલ હાઈવે તેમજ જેતપુરથી આગળના રૂટ પરના આશરે ૧૭૦ થી વધુ સીસીટીવી કેમેરા, હ્યુમન ઈન્ટેલિજન્સ અને સર્વેલન્સના આધારે તપાસ લંબાવી હતી. આરોપી હાઈવે પરથી વીરપુર ગામ તરફ જતો જોવા મળતાં પોલીસે વીરપુરના તમામ ધર્મશાળા, હોટેલો, ઝૂંપડપટ્ટી અને સીમ વિસ્તારોમાં તપાસ હાથ ધરી હતી. આખરે ચોક્કસ બાતમીના આધારે પોલીસે આરોપી લલિતભાઈ રૂપસિંગભાઈ જમરે (ઉંમર વર્ષ ૨૫, મૂળ રહે. બડવાણી, મધ્યપ્રદેશ) ના કબ્જામાંથી ૫ વર્ષના માસૂમ બાળકને સુરક્ષિત રીતે છોડાવી લીધું હતું અને તેના માતા-પિતા સાથે ભાવુક મિલન કરાવ્યું હતું. પોલીસે આરોપી સામે ભારતીય ન્યાય સંહિતાની કલમ ૧૩૭(૨) મુજબ કાયદેસરની કડક કાર્યવાહી હાથ ધરી છે.
અહેવાલ ભાવેશ વાઘેલા અમરેલી
About the Author
