મુખ્ય હાઇલાઇટ્સ:
- સાણંદ તાલુકાના ચાચરાવાડી વાસણા ગામના જગતના તાત છેલ્લા દોઢ દાયકાથી જળબંબાકારની સ્થિતિથી ત્રસ્ત.
- વહીવટી તંત્ર સમક્ષ વારંવાર લેખિત-મૌખિક રજૂઆતો કરવા છતાં પ્રશ્ન જસની તસ રહેતા ખેડૂતોમાં ભારે આક્રોશ.
- ચોમાસાની ઋતુમાં ખેતરો બેટમાં ફેરવાઈ જતાં પાક સંપૂર્ણ નિષ્ફળ અને આજીવિકા સામે મોટું સંકટ.
- સમસ્યાનો કાયમી અને યોગ્ય નિકાલ ન આવે ત્યાં સુધી ૫૦થી વધુ ખેડૂતોએ આંદોલનનું શસ્ત્ર ઉગામ્યું.
દોઢ દાયકા જૂની સમસ્યાથી જગતનો તાત લાચાર
અમદાવાદ જિલ્લાના ઔદ્યોગિક હબ ગણાતા સાણંદ તાલુકામાંથી એક ચિંતાજનક પ્રજાકીય પ્રશ્ન સામે આવ્યો છે. સાણંદના ચાચરાવાડી વાસણા ગામના ખેડૂતો છેલ્લા ૧૫ વર્ષ જેવા લાંબા સમયથી પોતાના ખેતરોમાં પાણી ભરાઈ જવાની ગંભીર સમસ્યાથી પીડાઈ રહ્યા છે. વિકાસની મોટી-મોટી વાતો વચ્ચે આ વિસ્તારના અન્નદાતા દોઢ દાયકાથી સ્થાનિક કક્ષાએથી લઈને ઉચ્ચ કક્ષા સુધી રજૂઆતો કરી ચૂક્યા છે, પરંતુ સરકારી તંત્રની ઘોર ઉદાસીનતાને કારણે આ સમસ્યાનો આજદિન સુધી કોઈ કાયમી અને નક્કર ઉકેલ આવી શક્યો નથી. તંત્રની આ ઢીલી નીતિને કારણે હવે ખેડૂતોની ધીરજ ખૂટી છે અને તેમનામાં વહીવટી તંત્ર સામે ભારે રોષ જોવા મળી રહ્યો છે.
ખેતરો બેટમાં ફેરવાતા પાકને વ્યાપક નુકસાન અને આજીવિકાનું સંકટ
ધરણાં પર બેસેલા આક્રોશિત ખેડૂતોએ પોતાની આપવીતી જણાવતા કહ્યું હતું કે, દર વર્ષે ચોમાસાની ઋતુમાં સામાન્ય વરસાદમાં પણ આસપાસના પાણીના યોગ્ય નિકાલના અભાવે તમામ ખેતરોમાં ઢીંચણસમા પાણી ભરાઈ જાય છે. લાખો રૂપિયાનું દેવું કરીને વાવેલો મોંઘોદાટ પાક અઠવાડિયા સુધી પાણીમાં ડૂબેલો રહેવાના કારણે સડી જાય છે. દર વર્ષે એક જ પરિસ્થિતિનું નિર્માણ થવાના લીધે ખેડૂતોને આર્થિક રીતે મોટું નુકસાન વેઠવાનો વારો આવે છે. પાક નિષ્ફળ જતાં હવે તો પરિવારનું ગુજરાન ચલાવવું અને આજીવિકા મેળવવી પણ અત્યંત મુશ્કેલ બની ગઈ છે.
કાયમી ઉકેલની માંગ સાથે અચોક્કસ મુદતના ધરણાં શરૂ
વારંવારની રજૂઆતો છતાં આ બહેરા તંત્રના પેટનું પાણી ન હલતાં આખરે ચાચરાવાડી વાસણા ગામના ૫૦થી વધુ પ્રભાવિત ખેડૂતોએ એક થઈને આરપારની લડાઈ લડવાનો નિર્ણય કર્યો છે. ખેડૂતોએ ગામમાં જ પોતાના હક્ક માટે અને પાણીના નિકાલની કાયમી વ્યવસ્થા ઊભી કરવાની માંગ સાથે અચોક્કસ મુદતના ધરણાં પ્રદર્શનની શરૂઆત કરી દીધી છે. ખેડૂત આગેવાનોએ ચીમકી ઉચ્ચારી છે કે, જ્યાં સુધી જવાબદાર અધિકારીઓ સ્થળ પર આવીને આ પ્રશ્નનું કાયમી નિવારણ લાવવાની લેખિત ખાતરી નહીં આપે, ત્યાં સુધી આ આંદોલન વધુ ઉગ્ર બનાવવામાં આવશે અને ધરણાં ચાલુ રાખવામાં આવશે.
ગાંધીનગર પ્રવાસી પત્રકાર રાજેશ પરીખ
About the Author
