મુખ્ય હાઇલાઇટ્સ:
- વિરમગામમાં છેલ્લા ૧૫ દિવસમાં ૨૯ ઇંચથી વધુ વરસાદ બાદ જર્જરિત મકાનો અને દીવાલો ધરાશાયી થવાની ઘટનાઓ વધી.
- બાવામિયાની મસ્જિદ, મંડલી વાસ, અદામીયાના ટેકરા અને ખેડૂવારા વિસ્તારમાં જૂના બંધ મકાનોની દીવાલો પડી.
- સદનસીબે કોઈ જાનહાની નહીં, પરંતુ ૧૦૦ વર્ષ જૂના મકાનોના કારણે સ્થાનિક રહીશોમાં ભારે ભયનો માહોલ.
- ભયજનક મકાનો દૂર કરવાને બદલે પાલિકા તંત્ર માત્ર નોટિસો આપી સંતોષ માનતું હોવાનો નાગરિકોનો આક્રોશ.
વરસાદે વિરામ લીધા બાદ વિરમગામમાં જર્જરિત મકાનો ધરાશાયી
અમદાવાદ જિલ્લાના પૌરાણિક શહેર વિરમગામમાં ચાલુ ચોમાસા દરમિયાન છેલ્લા ૧૫ દિવસમાં ૨૯ ઇંચથી વધુ ભારે વરસાદ નોંધાયો છે. જોકે છેલ્લા બે દિવસથી વરસાદે વિરામ લીધો હોવા છતાં, શહેરમાં વર્ષો જૂના બંધ અને જર્જરિત મકાનો તથા દીવાલો ધરાશાયી થવાનો સિલસિલો યથાવત રહ્યો છે. રવિવારે શહેરના બાવામિયાની મસ્જિદ પાસે, મંડલી વાસ, અદામીયાના ટેકરા પર તેમજ ખેડૂવારાના જમાતખાના પાછળ આવેલા એક જૂના બંધ મકાનની દીવાલ એકાએક ધરાશાયી થઈ ગઈ હતી. સદનસીબે આ ઘટના બની ત્યારે આસપાસ કોઈ હાજર ન હોવાથી મોટી જાનહાની કે ઈજા ટળી હતી.
તિરાડોમાં પાણી ઉતરતાં લાકડાના માળખાં બોદા બન્યાં
વિરમગામ શહેરના કોટ વિસ્તારની અંદર આશરે ૧૦૦ વર્ષથી પણ વધુ જૂના મકાનો આવેલા છે. સતત પડેલા ભારે વરસાદના કારણે આ મકાનોની માટીની દીવાલોમાં તિરાડો પડી ગઈ છે અને પાણી અંદર ઉતરવાને કારણે લાકડાના જૂના માળખાં બોદા થઈ ગયા છે. વરસાદ અટક્યા બાદ ભેજ અને વજનના કારણે આવા ભયજનક મકાનો અને દીવાલો તૂટી પડવાની ઘટનાઓ સતત સામે આવી રહી છે, જેના કારણે આસપાસના વિસ્તારોમાં રહેતા લોકો અને રાહદારીઓમાં ભારે ફફડાટ વ્યાપી ગયો છે.
નગરપાલિકા તંત્ર સામે નાગરિકોનો ભારે આક્રોશ
શહેરમાં સતત બની રહેલી આવી ભયાનક હોનારતો વચ્ચે નગરપાલિકાની કામગીરી સામે સ્થાનિક રહીશોમાં ભારે રોષ જોવા મળી રહ્યો છે. નાગરિકોએ ગંભીર આક્ષેપ કર્યો છે કે નગરપાલિકા તંત્ર દ્વારા આવા ભયજનક અને જર્જરિત મકાનોને ઉતારી લેવા માટેની નક્કર કામગીરી કરવાને બદલે માત્ર કાગળ પર જાહેર નોટિસો ફટકારીને સંતોષ માની લેવામાં આવે છે. જો તંત્ર દ્વારા સત્વરે આ ભયજનક મકાનો દૂર કરવામાં નહીં આવે તો આગામી દિવસોમાં મોટી દુર્ઘટના સર્જાવાની ભીતિ સેવાઈ રહી છે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
